കടലാക്രമണത്തെ തുടര്‍ന്ന് രക്ഷാപ്രവര്‍ത്തനം വൈകുന്നെന്ന് ആരോപിച്ച് തീരദേശത്ത് വലിയതുറ മുതല്‍ ശംഖുമുഖം വരെയുള്ള റോഡുകള്‍ മത്സ്യതൊഴിലാളികള്‍ ഉപരോധിക്കുന്നു. കാണാതായവരെ കണ്ടെത്താന്‍ അധികൃതര്‍ സഹായിക്കുന്നില്ലെന്നും നാട്ടുകാര്‍ ആരോപിച്ചു. തീരവും പുറംകടലും പ്രക്ഷുബ്ദമാണ്. താഴംപള്ളിയില്‍ ഉള്‍ക്കടലിലൂടെ ഒരാള്‍ മരത്തടിയില്‍ ഒഴുകിപ്പോകുന്നതായി കണ്ടെത്തി. ഇയാള്‍ക്കായി കോസ്റ്റ് ഗാര്‍ഡ് ഹെലികോപ്റ്റര്‍ നിരീക്ഷണം നടത്തുകയാണ്. പൂന്തുറയില്‍ കടലില്‍ നിന്ന് രക്ഷപെടുത്തിയയാളെ കരക്ക് എത്തിച്ചു. അടുത്ത 12 മണിക്കൂര്‍ നിര്‍ണായകമാണെന്ന് കാലാവസ്ഥാ നിരീക്ഷണകേന്ദ്രം അറിയിച്ചു.

മൂന്ന് ദിവസമായി കടലില്‍ പോയവരെ കുറിച്ച് യാതൊരു വിവരവുമില്ലെന്ന് കോവളത്ത് മല്‍സ്യത്തൊഴിലാളികളുടെ ബന്ധുക്കള്‍ ആരോപിച്ചു. ഇക്കാര്യം അറിയിച്ചിട്ടും അധികൃതരുടെ ഭാഗത്ത് നിന്ന് യാതൊരു നടപടിയും ഉണ്ടായില്ലെന്നും ഇവര്‍ വ്യക്തമാക്കി. വലിയതുറയില്‍ കടല്‍ക്ഷോഭത്തില്‍ നിരവധി വീടുകള്‍ നശിച്ചു. കടലില്‍ കനത്ത ചുഴലിക്കാറ്റ് തുടരുകയാണ്. മണിക്കൂറില്‍ 80 മുതല്‍ 100 കിലോമീറ്റര്‍ വരെയാണ് കാറ്റ് വീശുന്നത്. തിരുവനന്തപുരത്തും കൊല്ലത്തും കനത്തമഴ തുടരുകയാണ്. അതിന് പുറമേ കരയിടച്ചിലും തുടരുകയാണ്. വിഴിഞ്ഞത്ത് ഉരുവില്‍ പോയവരെ കടലില്‍ കണ്ടെത്തിയെങ്കിലും രക്ഷാപ്രവര്‍ത്തനത്തിനുള്ള ശ്രമം തുടരുകയാണ്.