അതിഗംഭീര മേക്കോവറില് മോഹന്ലാല് എത്തുമ്പോള്...
മോഹന്ലാല്ശ്രീകുമാര് മേനോന് കൂട്ടുകെട്ടില് പുറത്തിറങ്ങുന്ന ബ്രഹ്മാണ്ഡ ചിത്രം ഒടിയന്റെ മൂന്നാം ഷെഡ്യൂള് ഡിസംബര് ഇരുപതിന് ആരംഭിക്കും. സിനിമയുടെ അവസാന ഷെഡ്യൂള് കൂടിയാണിത്.
ഒടിയന് മാണിക്യന്റെ യൗവന കാലഘട്ടമാണ് ഈ ഘട്ടത്തില് ചിത്രീകരിക്കുക. ഇതിനായി അതിഗംഭീര മേക്കോവറിലാണ് മോഹന്ലാല് എത്തുക. ശരീരഭാരം കുറച്ച്, മുറുക്കി ചുവപ്പിച്ച ചുണ്ടും ക്ലീന് ഷേവ് ലുക്കുമായാകും മോഹന്ലാല് വരുന്നത്. ഇതിനായുള്ള തയ്യാറെടുപ്പിലാണ് അദ്ദേഹം. സംവിധായകന് ശ്രീകുമാര് മേനോന്റെ നിര്ദേശ പ്രകാരം ഫ്രാന്സില് നിന്നുള്ള 25 പേരടങ്ങുന്ന വിദഗ്ധരുടെ സംഘമാണ് ലാലിന്റെ വേഷപകര്ച്ചയ്ക്ക് പിന്നില്.
ശ്രീകുമാര് എന്ന സംവിധായകന്റെയും ഒടിയന് എന്ന സിനിമയുടെയും പിന്ബലത്തിലാണ് മോഹന്ലാല് ഇത്തരമൊരു രൂപമാറ്റത്തിന് തയ്യാറെടുത്തതെന്ന് അണിയറപ്രവര്ത്തകര് വ്യക്തമാക്കുന്നു. ഇത്രയും വര്ഷത്തെ അഭിനയ ജീവിതത്തില് മറ്റൊരു കഥാപാത്രത്തിനും നടത്താത്ത മേക്കോവറാണ് മോഹന്ലാല് നടത്തുക.
ഒടിയന് ഫസ്റ്റ്ലുക്കില് കാണുന്ന ഒടിയന് മാണിക്യനെ വരച്ചത് സംവിധായകന് ശ്രീകുമാര് തന്നെയാണ്. ഇതാണ് താന് മനസ്സില് കാണുന്ന ഒടിയന് മാണിക്യന്റെ യൗവനമെന്ന് സംവിധായകന് പറഞ്ഞപ്പോള് മോഹന്ലാല് അത് അംഗീകരിച്ച് ആ കഥാപാത്രത്തെ എല്ലാതലത്തിലും ആവഹിക്കാന് തയ്യാറാകുകയായിരുന്നു.
ഏകദേശം 45 ദിവസമാണ് ഈ മേക്കോവറിന് വേണ്ടി വരുക. വളരെ വേദന നിറഞ്ഞ ഈ പ്രക്രിയയില് അതികഠിനമായ ഘട്ടങ്ങളിലൂടെ മോഹന്ലാല് കടന്നുപോകേണ്ടി വരും. ആറുമണിക്കൂര് വ്യായാമം, ചിട്ടയായ ഭക്ഷണക്രമം തുടങ്ങിയവ ഇതില് ഉള്പ്പെടും. സംവിധായകന് ശ്രീകുമാറും ഈ ദിവസങ്ങളില് എല്ലാ സഹായങ്ങളുമായി മോഹന്ലാലിനൊപ്പമുണ്ട്. രൂപമാറ്റം കഴിഞ്ഞുവരുന്ന മോഹന്ലാലിനെ മാണിക്യനാക്കാനുള്ള ഒരുക്കത്തിലാണ് സംവിധായകന്.
മറ്റൊരു പുതുമുഖ സംവിധായകന്റെ ചിത്രത്തിനും ലഭിക്കാത്ത ജനപ്രീതിയാണ് ഒടിയന് പ്രേക്ഷകരുടെ ഇടയില് ലഭിച്ച് കൊണ്ടിരിക്കുന്നത്. അതേസമയം ഒടിയന് സിനിമയുടെ പേരില് പ്രചരിക്കുന്ന വ്യാജവാര്ത്ത നിഷേധിച്ച് അണിയറ പ്രവര്ത്തകര് രംഗത്തെത്തി. ഇത്തരം വാര്ത്തകള്ക്ക് പ്രതികരണം പോലും അര്ഹിക്കുന്നില്ലെന്നും അവര് വ്യക്തമാക്കി.
പാലക്കാട് തന്നെയാണ് ലൊക്കേഷന്. മാണിക്യനൊപ്പം പ്രകാശ് രാജ്, മഞ്ജു വാരിയര്, സിദ്ദിഖ് എന്നിവരുടെ കഥാപാത്രങ്ങളുടെ ചെറുപ്പകാലവും ചിത്രീകരിക്കുന്നുണ്ട്. കൂടാതെ സംഘട്ടന രംഗങ്ങളും ഉണ്ടാകും.
മാധ്യമ പ്രവര്ത്തകനും ദേശീയ പുരസ്കാര ജേതാവുമായ ഹരി കൃഷ്ണനാണ് തിരക്കഥ. പീറ്റര് ഹെയ്നാണ് ആക്ഷന് ഒരുക്കുന്നത്. ചിത്രത്തിന്റെ ക്ലൈമാക്സ് ചിത്രീകരിച്ചുകഴിഞ്ഞിരുന്നു. മലയാളത്തിലെ ഏറ്റവും നീളം കൂടിയ ക്ലൈമാക്സ് ഷൂട്ടായിരുന്നു ചിത്രത്തിന്റേത്. 28 രാത്രികളാണ് ചിത്രീകരണത്തിനായി ഉപയോഗിച്ചത്. മാനായും ആടായും കാട്ടുപോത്തായും മാറുന്ന മാണിക്യനെയാണ് ചിത്രം കാത്തുവയ്ക്കുന്നത്.
https://www.facebook.com/Malayalivartha
