ഉറ്റവരുടെ ജീവനുവേണ്ടിയുള്ള കാത്തിരുപ്പിനിടയില്‍ രാഷ്ട്രീയക്കാര്‍ വന്നത് തീരദേശികള്‍ക്ക് ഒട്ടും ഇഷ്ടമായില്ല. അവര്‍ കൂകി വിളിച്ച് അവരെ ആട്ടിപ്പായിച്ചു. അവരുടെ പ്രതിഷേധം മുഖ്യമന്ത്രിയും മന്ത്രിമാരും പ്രതിപക്ഷനേതാവുമെല്ലാം നന്നായറിഞ്ഞു. ഞാന്‍ മുഖ്യമന്ത്രിയോട് സംസാരിച്ചിട്ട് വരാമെന്ന് പറഞ്ഞാണ് രമേശ് ചെന്നിത്തല മഴ നനഞ്ഞ് അവിടെ നിന്നും രക്ഷപ്പെട്ടത്. പിന്നെയവിടെ തിരിഞ്ഞ് നോക്കിയിട്ടില്ല.

ഈ പ്രതിഷേധത്തിനിടെയാണ് കേന്ദ്ര പ്രതിരോധമന്ത്രി നിര്‍മല സീതാരാമന്‍ എത്തിയത്. മറ്റ് രാഷ്ട്രീയക്കാര്‍ തോറ്റുമടങ്ങിയിടത്തേക്കാണു കൂപ്പുകൈയും സാന്ത്വനവുമായി പ്രതിരോധമന്ത്രി നിര്‍മല സീതാരാമന്‍ എത്തിയത്.

നാന്‍ കൈകൂപ്പി കേക്ക്‌റേന്‍. ഇന്ത സമയത്തില് ദയവുപണ്ണി പഴി പോടവേണ്ടാ. എനക്കു തെരിയും ഉങ്കളുടെ മനം, നാനും ഒരു പൊമ്പിളൈതാന്‍...നാന്‍ ഉങ്കളെ കേക്ക്‌റേന്‍, കേക്ക വേണ്ടിത്താന്‍ വന്‍ട്രേന്‍...

കേന്ദ്രമന്ത്രിയുടെ പരിവേഷം മാറ്റിവച്ച്, 'അയലത്തെ സോദരി'യായി അവര്‍ വിഴിഞ്ഞത്തും പൂന്തുറയിലും നാട്ടുകാരെ ആശ്വസിപ്പിച്ചു. കടലില്‍പെട്ട അവസാന ആളെയും കണ്ടെത്തുന്നതുവരെ ഒപ്പമുണ്ടാകുമെന്നു തുറയുടെ മനസുതൊട്ട തമിഴ്‌പേച്ചില്‍ കേന്ദ്രമന്ത്രി ഉറപ്പുനല്‍കി. അവര്‍ക്കൊപ്പമുണ്ടായിരുന്ന മന്ത്രിമാരായ കടകംപള്ളി സുരേന്ദ്രനും ജെ. മേഴ്‌സിക്കുട്ടിയമ്മയ്ക്കും പോലീസിന്റെ സുരക്ഷാവലയം അപ്പോഴുമുണ്ടായിരുന്നു. 

മുഴുവന്‍സമയം രാഷ്ട്രീയക്കാരായി വളര്‍ന്ന നേതാക്കള്‍ക്കു കഴിയാതിരുന്നതാണ് തിരുച്ചിറപ്പള്ളിയില്‍ ജനിച്ച്, ഡല്‍ഹിയില്‍ പഠിച്ച്, ലണ്ടനില്‍ െ്രെപസ്‌വാട്ടര്‍ഹൗസ് കൂപ്പേഴ്‌സിലും ബി.ബി.സി. വേള്‍ഡ് സര്‍വീസിലും പ്രവര്‍ത്തിച്ച് തിരിച്ചെത്തിയ നിര്‍മലയ്ക്കു കഴിഞ്ഞത്. 

'ഞാനുമൊരു സ്ത്രീയാണ്, നിങ്ങളുടെ വേദനയറിയാവുന്ന സ്ത്രീ...' എന്ന വാക്കുകള്‍ക്കു മുന്നില്‍ തുറയിലെ സ്ത്രീകളുടെ അലമുറ നിലച്ചു. പുരുഷാരം ശാന്തരായി. ഏതാവശ്യമുണ്ടെങ്കിലും നേരിട്ടുവിളിക്കുക, പരിഹാരമുണ്ടാകുമെന്ന ഉറപ്പ് അവരെ ആശ്വസിപ്പിച്ചു. 


രാവിലെ കടകംപള്ളിക്കും മേഴ്‌സിക്കുട്ടിയമ്മയ്ക്കുമൊപ്പം പൂന്തുറ പള്ളിമേടയിലെത്തിയ നിര്‍മല സീതാരാമന്‍ ഇടവകപ്രതിനിധികളുമായി സംസാരിച്ചു. മരിച്ചവരുടെ ആശ്രിതര്‍ക്കുള്ള നഷ്ടപരിഹാരം 25 ലക്ഷമായി ഉയര്‍ത്തുക, രക്ഷാപ്രവര്‍ത്തനം കാര്യക്ഷമമാക്കുക തുടങ്ങിയ ആവശ്യങ്ങളടങ്ങുന്ന നിവേദനം സ്വീകരിച്ചു. ബി.ജെ.പി. സംസ്ഥാനാധ്യക്ഷന്‍ കുമ്മനം രാജശേഖരനും ഒപ്പമുണ്ടായിരുന്നു.

കടലില്‍നിന്നു തിരിച്ചെത്തിയിട്ടില്ലാത്ത 28 പേരുടെ കുടുംബാംഗങ്ങള്‍ പള്ളിയങ്കണത്തിലെ പന്തലില്‍ പ്രാര്‍ഥനയിലായിരുന്നു. കേന്ദ്രമന്ത്രിക്കൊപ്പമെത്തിയ കടകംപള്ളിക്കും മേഴ്‌സിക്കുട്ടിയമ്മയ്ക്കുമെതിരേ അവര്‍ പ്രതിഷേധിച്ചെങ്കിലും വൈദികര്‍ക്കും പോലീസിനും കഴിയാതിരുന്നതു സാധിച്ചാണു കേന്ദ്രമന്ത്രി മടങ്ങിയത്.