രക്ഷാപ്രവര്ത്തനത്തില് കര്മ്മനിരതനായി മന്ത്രി കടകംപള്ളി സുരേന്ദ്രന്
സംസ്ഥാനത്തെ പിടിച്ചു ഉലച്ച ഓഖി ചുഴലിക്കാറ്റ് ദുരന്തത്തില് ആദ്യം മുതലേ കര്മ്മനിരതനായിരുന്നു തലസ്ഥാനത്ത് നിന്നുള്ള മന്ത്രി കടകംപള്ളി സുരേന്ദ്രന്. ചുഴലിക്കാറ്റ് വീശിയടിച്ച വ്യാഴാഴ്ച മുതല് തന്നെ മന്ത്രി രക്ഷാപ്രവര്ത്തനം ഏകോപിപ്പിക്കാന് രംഗത്ത് എത്തിയിരുന്നു. കഴിഞ്ഞ വ്യാഴാഴ്ച അപ്രതീക്ഷിതമായി ഓഖി ചുഴലിക്കാറ്റ് സംസ്ഥാനത്ത് നാശം വിതച്ചപ്പോള് തലസ്ഥാന ജില്ലയില് നിന്നുള്ള മന്ത്രിയായ കടകംപള്ളി സുരേന്ദ്രന് അസുഖബാധിതനായി വിശ്രമിക്കുകയായിരുന്നിട്ടും ഉടന് തന്നെ ദുരന്ത സ്ഥലങ്ങളില് എത്തി. അടിമലത്തുറയില് മഴയത്ത് ഉച്ചയ്ക്ക് രണ്ടര മണിയോടെ മന്ത്രി എത്തി . ജില്ലാ ഭരണകൂടവുമായി ബന്ധപ്പെട്ട് ദുരിതാശ്വാസ പ്രവര്ത്തനങ്ങള് വേഗത്തിലാക്കി. കനത്ത മഴയെ അവഗണിച്ച് വിഴിഞ്ഞത്തും തുടര്ന്ന് പൂന്തുറയിലുമെത്തി.
ദുരന്തത്തില് കൂടുതല് പേരെ കാണാതായി എന്നത് അറിഞ്ഞതോടെ സര്ക്കാര് കേന്ദ്ര ഏജന്സികളുടെ സഹായം തേടി രക്ഷാപ്രവര്ത്തനം ഊര്ജിതമാക്കി. വെള്ളിയാഴ്ച പുലര്ച്ചെ തന്നെ എയര്പോര്ട്ടിലെ ടെക്നിക്കല് ഏര്യയിലെ കണ്ട്രോള് റൂമിലിരുന്ന് നാവിക വ്യോമ സേനകളുടേയും, കോസ്റ്റ് ഗാര്ഡിന്റെയും സംസ്ഥാനജില്ലാ ഭരണകൂടങ്ങളുടെ പ്രവര്ത്തനങ്ങള് മന്ത്രിയുടെ നേതൃത്വത്തില് ഏകോപ്പിപ്പിച്ചു. മത്സ്യതൊഴിലാളികളുടെ പരാതി പരിഗണിച്ച് മന്ത്രി കടകംപള്ളി സുരേന്ദ്രന് രക്ഷാപ്രവര്ത്തനം നടത്തുന്ന ഹെലികോപ്റ്ററില് സേനാംഗങ്ങള്ക്ക് ഒപ്പം പോയി . ആ സമയത്ത് ഹെലികോപ്റ്ററില് ആറ് മത്സ്യതൊഴിലാളികളെ രക്ഷപ്പെടുത്തി കരക്കെത്തിച്ചു.
തന്റെ ഔദ്യോഗിക പരിപാടികളെല്ലാം റദ്ദ് ചെയ്ത് കഴിഞ്ഞ അഞ്ച് ദിവസം മുഴുവനായി ഇപ്പോഴും ദുരന്തനിവാരണ പ്രവര്ത്തനങ്ങള് ഏകോപിപ്പിക്കുകയാണ്. ഇതിനിടയില് കടലില് നിന്ന് പരിക്കേറ്റ് കൊണ്ടു വന്നവരുടെ പേര് വിവരങ്ങള് ശേഖരിക്കുകയും അത് ബന്ധുക്കളെ അറിയിക്കാനും മെഡിക്കല് കോളേജ് ആശുപത്രിയിലെ ചികിത്സാ സംഘവുമായി ബന്ധപ്പെട്ടുവരെ മന്ത്രി നേരിട്ട് പ്രവര്ത്തനങ്ങള് ക്രോഡീകരിച്ചു. ഇതിനിടയില് തിരച്ചില് ഊര്ജിതമല്ലെന്ന മത്സ്യതൊഴിലാളികളുടെ പരാതിയെ തുടര്ന്ന് മന്ത്രി ഇടപെട്ടെന്ന് നേവിയുടെ പ്രത്യേക അനുമതി വാങ്ങി 3 മത്സ്യതൊഴിലാളികളേയും തിരച്ചിലിനായി അയച്ചു. ഈ സമയം അത്രയും കണ്ട്രോള് റൂമിലിരുന്ന മന്ത്രി മുഖ്യമന്ത്രിയുമായി സ്ഥിതിഗതികള് വിലയിരുത്തി തുടര് നടപടികള് സ്വീകരിക്കുകയായിരുന്നു.
ഇതിനിടയില് പരിക്കേറ്റവരെ സന്ദര്ശിക്കാന് മുഖ്യമന്ത്രിയോടൊപ്പവും കേന്ദ്ര മന്ത്രിമാരായ നിര്മ്മല സീതാരാമന്, അല്ഫോണ്സ് കണ്ണന്താനം എന്നിവര്ക്കൊപ്പം മുഴുവന് സമയവും ഉണ്ടായിരുന്നു. വിവാദങ്ങള്ക്കും വിമര്ശനങ്ങള്ക്കുമിടയില് മന്ത്രി കടകംപള്ളി സുരേന്ദ്രന്റെ ഇടപെടലുകള് ശ്രദ്ധിക്കപ്പെടാതെ പോകരുത്.
https://www.facebook.com/Malayalivartha
