ജിഷ വധക്കേസിലെ വാദം അന്തിമ ഘട്ടത്തിലാകവേ വാദം കേള്‍ക്കാനെത്തിയ ജിഷയുടെ അമ്മ രാജേശ്വരി വികാരാധീനനായി. വാദത്തിനിടെ കോടതി മുറിയില്‍ പ്രതിഭാഗം അഭിഭാഷകന്‍ അഡ്വ.ആളൂരിനെതിരെയാണ് രാജേശ്വരി അലമുറയിട്ടത്. ഇന്നലെ ഉച്ചക്ക് ഒരു മണിയോടടുത്തായിരുന്നു വാദത്തിനിടെ കോടതിക്കുള്ളില്‍ രാജേശ്വരിയുടെ ബഹളം. ജിഷ ഭക്ഷണം കഴിച്ച് അധികം താമസിയാതെയാണ് കൊല്ലപ്പെട്ടതെന്നും പ്രൊസിക്യൂഷന്‍ സമര്‍പ്പിച്ചിട്ടുള്ള പോസ്റ്റുമോര്‍ട്ടം റിപ്പോര്‍ട്ടിലെ മരണസമയം ശരിയല്ലന്നുമുള്ള ആളൂരിന്റെ പരാമര്‍ശമാണ് രാജേശ്വരിയെ ചൊടിപ്പിച്ചത്.

ഇംഗ്ലീഷിലുള്ള വാദത്തിനിടെ കടന്നുകൂടിയ മലയാള പദങ്ങളില്‍ നിന്നും വിവരം മനസിലാക്കിയായിരുന്നു രാജേശ്വരി പ്രതിഷേധവുമായി ഇരിപ്പിടത്തില്‍ നിന്നും എഴുന്നേറ്റത്. രൂക്ഷമായ ഭാഷയില്‍ അഭിഭാഷകനെതിരെ പ്രതികരിച്ച ഇവര്‍ ഇടക്ക് അസഭ്യവര്‍ഷവും നടത്തിയെന്നാണ് കോടതി മുറിക്കുള്ളിലുണ്ടായിരുന്നവരുടെ നേര്‍സാക്ഷ്യം. വികാരം പ്രകടനം അതിരുവിട്ടതോടെ വാദം കേട്ടിരുന്ന ജില്ലാ ജഡ്ജി രാജേശ്വരിയെ താക്കീത് ചെയ്തു. സംരക്ഷണച്ചുമതലയുണ്ടായിരുന്ന വനിത പൊലീസുകാരോടൊപ്പമാണ് രാജേശ്വരി വാദം കേള്‍ക്കാന്‍ എത്തിയത്. പ്രതിഭാഗം വാദം നടക്കുന്നതിനിടെ ആദ്യമായിട്ടാണ് രാജേശ്വരി കോടതിയില്‍ എത്തിയത്.

പ്രതി അമിറുള്‍ ഇസ്ലാമിനെ നിയമക്കുരുക്കില്‍ നിന്നും രക്ഷിച്ചെടുക്കാന്‍ അഡ്വ.ആളൂര്‍ അവസാനവട്ട വാദം ആരംഭിച്ച ദിവസം രാജേശ്വരി മൂകാംബിക ക്ഷേത്രദര്‍ശനത്തിനെന്ന് പറഞ്ഞ് വീട്ടില്‍ നിന്നും അകമ്പടി പൊലീസുകാര്‍ക്കൊപ്പം പുറപ്പെട്ടിരുന്നു. മകള്‍ ദീപയാണ് ഇക്കാര്യം മാധ്യമങ്ങളോട് സ്ഥിരീകരിച്ചത്. നേരത്തെ ജിഷ നീലക്കുറിഞ്ഞി പൂത്തുനില്‍ക്കുന്നത് കാണാന്‍ പോകണമെന്ന ആഗ്രഹം പ്രകടിപ്പിച്ചിരുന്നെന്നും അതിനാല്‍ മടക്കയാത്രില്‍ പറ്റിയാല്‍ നീലക്കൂറിഞ്ഞി കാണുമെന്നും രാജേശ്വരി അടുപ്പക്കാരോട് സൂചിപ്പിരുന്നതായുള്ള വിവരവും പിന്നാലെ പുറത്ത് വന്നു. ദിവസങ്ങള്‍ക്ക് ശേഷം വീട്ടില്‍ തിരിച്ചെത്തിയ രാജേശ്വരി തന്റെ യാത്രയെക്കുറിച്ചുള്ള കൂടുതല്‍ വിവരങ്ങള്‍ പുറത്ത് വിട്ടില്ല.

ജിഷ ദാരുണമായി കൊല്ലപ്പെട്ട കേസില്‍ പ്രതി അമിറൂള്‍ ഇസ്ലാമിന്റെ സുഹൃത്ത് അനാറുള്‍ ഇസ്ലാം അസാന്നിധ്യം പ്രോസിക്യൂഷന് തലവേദനയാകുമെന്നാണ് സൂചന. കേസില്‍ അഡ്വ.ബിഎ ആളൂര്‍ പ്രതി അമിറുള്‍ ഇസ്ലാമിന്റെ വക്കാലത്ത് ഏറ്റെടുത്തതിന് പിന്നാലെയാണ് വീണ്ടും അനാറുളിന്റെ പേര് ഉയര്‍ന്നുവരുന്നത്. കൊല നടത്തിയത് അനാറുള്‍ ആണെന്നും, പൊലീസിന്റെ മര്‍ദ്ദനത്തില്‍ ഇയാള്‍കൊല്ലപ്പെട്ടതോടെ അമിറൂളിനെ പ്രതിയാക്കുകയായിരുന്നുവെന്നാണ് പ്രതിഭാഗത്തിന്റെ ഭാക്ഷ്യം. എറണാകുളം പ്രിന്‍സിപ്പല്‍ സെഷന്‍സ് കോടതിയില്‍ അടച്ചിട്ട മുറിയിലാണ് കേസിന്റെ വാദം നടക്കുന്നത്. 27 ആം തിയതി മുതല്‍ മുപ്പത് വരെയാണ് പ്രതിഭാഗത്തിന്റെ അന്തിമവാദം. അനാറുളിന്റെ അസാന്നിധ്യം മുതലെടുത്ത് പ്രോസിക്യൂഷന്റെ വാദങ്ങളെ ഖണ്ഡിക്കുകയാണ് അഡ്വ. ആളൂര്‍ ലക്ഷ്യമിടുന്നത്. അടച്ചിട്ട കോടതി മുറിയില്‍ ഇതുവരെ 74 ദിവസത്തെ വാദമാണ് നടന്നത്.