സ്വര്‍ണം വാങ്ങാനായി പശ്ചിമ ബംഗാളിലെത്തിയ വിമുക്തഭടന്മാരായ മലയാളി സഹോദരന്മാരുടെ അവസ്ഥയറിഞ്ഞ വേദനയിലാണ് നാട്ടുകാര്‍. ആലപ്പുഴ ജില്ലയിലെ പാണാവള്ളി പള്ളിവെളി കുന്നേല്‍വെളി വീട്ടില്‍ മാമ്മച്ചന്‍ ജോസഫ് (58), കുഞ്ഞുമോന്‍ ജോസഫ് (51) എന്നിവരാണ് സ്വര്‍ണം തേടി പോയത്. അവസാനം അവര്‍ ദുരൂഹ സാഹചര്യത്തില്‍ കൊല്ലപ്പെട്ടു. വിഷം ഉള്ളില്‍ച്ചെന്നാണ് മരണമെന്നാണ് റിപ്പോര്‍ട്ട്. ഇവരുടെ കൈവശമുണ്ടായിരുന്ന 12 ലക്ഷം രൂപയും ആറുപവന്റെ മാലയും നഷ്ടപ്പെട്ടതായി നാട്ടിലുള്ള ബന്ധുക്കള്‍ പറഞ്ഞു. വിഷം നല്‍കി കൊലപ്പെടുത്തിയ ശേഷം പണവും സ്വര്‍ണവും കവര്‍ന്നതാകാമെന്നാണ് വിലയിരുത്തല്‍.

കൊല്‍ക്കത്തയില്‍നിന്ന് നൂറിലേറെ കിലോമീറ്റര്‍ അകലെ ബര്‍ദ്വാനിലെ ബ്രഹ്മചന്ദപൂരിലുള്ള ശരണ്യ ആശുപത്രിയിലാണ് ഇരുവരെയും ആദ്യം പ്രവേശിപ്പിച്ചത്. മാമ്മച്ചന്‍ അവിടെ മരിച്ചു. കുഞ്ഞുമോന്‍ ജോസഫിനെ പിന്നീട് കൊല്‍ക്കത്തയിലെ അപ്പോളോ ആശുപത്രിയിലെ തീവ്രപരിചരണവിഭാഗത്തില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല. സ്വര്‍ണം വാങ്ങാന്‍ ഇവര്‍ നാട്ടില്‍നിന്ന് എന്തിനു കൊല്‍ക്കത്തവരെ എത്തിയെന്നതിലാണ് ദുരൂഹത.

പാണാവള്ളിയിലുള്ള ഇവരുടെ വീട് ബംഗാളില്‍നിന്നുള്ള പണിക്കാര്‍ക്ക് വാടകയ്ക്ക് കൊടുത്തിട്ടുണ്ട്. ഇവര്‍ വഴിയാണ് സ്വര്‍ണ്ണത്തെ കുറിച്ചുള്ള വിവരങ്ങള്‍ ഇരുവരും അറിഞ്ഞതെന്നും. സ്വര്‍ണ് നിധിയെന്ന വിശ്വസിച്ച് അതു തേടിപ്പോയ വഴിയെയാണ് മരണം സംഭവിച്ചതെന്നും റിപ്പോര്‍ട്ടുകളുണ്ട്. വാടക വീട്ടില്‍ താമസിക്കുന്ന ഒരു നിര്‍മ്മാണത്തൊഴിലാളിയുമായി ഇവര്‍ രണ്ടാഴ്ച മുമ്പും കൊല്‍ക്കത്തയ്ക്ക് പോയിരുന്നു. അന്നു കൂടെ പോയ ബംഗാളി ഇത്തവണത്തെ യാത്രയില്‍ ഒപ്പമില്ല. പക്ഷേ, അയാളെപ്പറ്റി ഇപ്പോള്‍ വിവരമൊന്നുമില്ല. മൊബൈല്‍ നമ്പര്‍ സ്വിച്ച് ഓഫ് ചെയ്ത നിലയിലുമാണ്.

നേരത്തേ ഇവര്‍ കൊല്‍ക്കത്തയ്ക്ക് പോയപ്പോള്‍ പൂച്ചാക്കലിലുള്ള സ്വര്‍ണപ്പണിക്കാരനെയും കൂടെക്കൂട്ടിയിരുന്നു. ഇവര്‍ വാങ്ങാനുദ്ദേശിക്കുന്ന സ്വര്‍ണത്തിന്റെ മാറ്റുനോക്കാനും വില നിര്‍ണയിക്കാനുമാണ് അയാളെ കൂടെക്കൂട്ടിയതെന്നാണ് പറയുന്നത്. ഇത്തവണ അയാളും ഒപ്പം പോയിരുന്നില്ലെന്നാണ് വിവരം. സ്വര്‍ണം വാങ്ങാനായി കൈയില്‍ കരുതിയ പണമാണ് നഷ്ടമായിരിക്കുന്നത്. സ്വര്‍ണ്ണ നിധി തേടിയുള്ള യാത്രയാണ് ഇരുവരുടെയും ജീവനെടുത്തതെന്ന വിധത്തിലാണ് പുറത്തുവരുന്ന വാര്‍ത്തഖല്‍.

ചെന്നൈയില്‍ പോകുന്നു എന്നു പറഞ്ഞാണ് ഇരുവരും നാട്ടില്‍ നിന്ന് പോയത്. നിധിയുമായി ബന്ധപ്പെട്ട യാത്രയാണ് എന്നറിയാവുന്ന വീട്ടുകാര്‍ വിലക്കിയിരുന്നതായും സൂചനയുണ്ട്. കേരള പൊലീസിന് സംഭവത്തെ പറ്റി കൂടുതല്‍ ധാരണകളില്ല. ടെറസില്‍ താമസിക്കുന്ന മറ്റു ബംഗാളികളെ കസ്റ്റഡിയില്‍ എടുത്തിട്ടുണ്ട്.

വിവരമറിഞ്ഞ് ഇവരുടെ സഹോദരന്മാര്‍ നാട്ടില്‍നിന്ന് കൊല്‍ക്കത്തയിലെത്തിയിട്ടുണ്ട്. മാമ്മച്ചനും കുഞ്ഞുമോനും മടക്കയാത്രയ്ക്ക് ടിക്കറ്റ് ബുക്ക്‌ചെയ്തിരുന്നതായി ബന്ധുക്കള്‍ പറയുന്നു. ഇരുവരും വിമുക്തഭടന്മാരാണ്. മാമ്മച്ചന്റെ ഭാര്യ: മേരി. മക്കള്‍: സൗമ്യ, ക്‌ളിഫിന്‍. മരുമക്കള്‍: സിബി, ആശ. കുഞ്ഞുമോന്‍ ജോസഫിന്റെ ഭാര്യ: ജയന്തി. മക്കള്‍: ആല്‍ഫിന്‍, അലക്‌സ്.