എന്റെ സുഹൃത്തുക്കളായവരും അല്ലാത്തവരുമായ ഹിന്ദു ക്രിസ്ത്യന്‍ സഹോദരിമാരെ കുറിച്ച് ആലോചിക്കുമ്പോള്‍ വല്ലാത്ത വിഷമം തോന്നുന്നു. സ്വര്‍ഗ്ഗത്തിന്റെ താക്കോല്‍ സ്വന്തമായി കൈവശം ഉള്ള 'ഫെയ്‌സ്ബുക്ക് ആങ്ങിളമാര്‍ അവര്‍ക്കില്ലല്ലോ.... പാവങ്ങള്‍...... എന്നാണ് സൈറാ സലിം എന്ന ഗായിക ഫെയിസ്ബുക്കിലൂടെ കളിയാക്കുന്നത്. മലപ്പുറത്ത് എയിഡ്‌സ് ബോധവല്‍ക്കരണത്തിനായി തട്ടമിട്ട് ഫഌഷ്‌മോബ് നടത്തിയ പെണ്‍കുട്ടികളെയും അവരുടെ കുടുംബാംഗങ്ങളെയും പെണ്‍കുട്ടികളെ പ്രോല്‍സാഹിപ്പിച്ച ആര്‍.ജെ സൂര്യയെയും ഫെയിസ്ബുക്കിലൂടെ ചീത്തപറയുകയും മോശമാക്കുകയും ചെയ്തവരെയാണ് ഈ യുവഗായിക പരിഹസിക്കുന്നത്.

ഇസ്ലാമിനെ ഫഌഷ്‌മോബിലൂടെ പൊതുസമൂഹത്തില്‍ തെറ്റിദ്ധരിപ്പിക്കുകയാണ് പെണ്‍കുട്ടികള്‍ ചെയ്തതെന്ന ന്യായീകരണം പറഞ്ഞാണ് ഈ ആങ്ങിളമാര്‍ ഇത് ചെയ്യുന്നത്. അതിനായി മോബില്‍ പങ്കെടുത്ത കുട്ടികളുടെ മാതാപിതാക്കളെ വരെ ഇവര്‍ വെറുതെ വിടുന്നില്ലെന്നും സൈറാ സലിം ചൂണ്ടിക്കാട്ടുന്നു. മുസ്്‌ലിമായ ഒരു വ്യക്തി തെറ്റ് ചെയ്താലും ശരി ചെയ്താലും അതില്‍ വിധിനിര്‍ണയം നടത്തുന്നത് പടച്ചോനാണ്. അത് ആ വ്യക്തിയും പടച്ചോനും തമ്മിലുള്ള കാര്യമാണ്. അത് ഇസ്ലാമിക നിയമത്തിന് അകത്തോ പുറത്തോ ഉള്ള കാര്യങ്ങളാകാം. അതിലൊന്നും മൂന്നാമതൊരാള്‍ക്ക് ഇടപെടാന്‍ അവകാശമില്ല. വിധി നിര്‍ണയം നടത്തുന്നത് പടച്ചവനാണ്.

ഇസ്ലാമിന്റെ വക്താക്കളെന്ന് സ്വയം അവകാശവാദമുന്നയിച്ച് നടക്കുന്ന ഫെയിസ്ബുക്ക് ആങ്ങിളമാര്‍ പറയുന്നത് ഇസ്്‌ലാം ഏറെ തെറ്റിദ്ധരിക്കപ്പെടുന്നെന്നാണ് , അവരോട് സൈറ ചോദിക്കുന്നത് ഇതാണ്. ഇസ്്‌ലാം മുന്നോട്ട് വയ്ക്കുന്ന പൊതുനീതി അനുസരിച്ച് സോഷ്യല്‍ മീഡിയ പോലുളള പബഌക് പഌറ്റ്‌ഫോമില്‍ നിന്ന് കൊണ്ട് ആരെയും പുലഭ്യം പറയാന്‍ പാടില്ല. അപ്പോള്‍ ഫഌഷ് മോബ് നടത്തിയ പെണ്‍കുട്ടികളാണോ അവരെ പുലഭ്യം പറഞ്ഞ നിങ്ങളാണോ ഇസ്്‌ലാമിനെ തെറ്റിദ്ധരിപ്പിക്കുന്നതെന്ന് ചിന്തിക്കുന്നത് നല്ലതായിരിക്കും. ഇത്തരം അഭിപ്രായപ്രകടനങ്ങളിലൂടെ മതത്തെ തെറ്റിദ്ധരിപ്പിക്കുന്നത് ഫെയിസ്ബുക്ക് ആങ്ങിളമാരാണെന്നും ഈ യുവ ഗായിക കുറ്റപ്പെടുത്തുന്നു.

പാട്ട് പാടുന്നതും ഡാന്‍സ് ചെയ്യുന്നതും വ്യക്തിസ്വാതന്ത്ര്യമാണ്. അതിനകത്ത് മറ്റുള്ളവര്‍ അഭിപ്രായം പറയുന്നത് ശരിയല്ല. ഇസ്്‌ലാം മുന്നോട്ട് വയ്ക്കുന്ന പൊതുധാര്‍മികത പെണ്ണിന് മാത്രം ബാധകമുള്ള കാര്യമല്ല. ആദ്യമത് കാത്ത് സൂക്ഷിക്കേണ്ടത് പുരുഷന്‍മാരാണ്. ഈ വിഷയത്തില്‍ അഭിപ്രായപ്രകടനം നടത്തിയ ആര്‍. ജെ സൂരജിനെതിരെ വ്യക്തിഹത്യ നടത്തി. അവസാനം മാപ്പ് പറയുന്ന ഘട്ടത്തില്‍ വരെ എത്തിച്ചു. അത് പലരും വിജയമായി കാണുന്നു, അല്ലെങ്കില്‍ തെറ്റിദ്ധരിക്കുന്നു. എന്നാലത് വിജയമല്ല, നിങ്ങളുടെ പരാജയമാണെന്ന് ഫെയിസ്ബുക്ക് ആങ്ങിളമാരോട് സൈറ വ്യക്തമാക്കുന്നു. മാന്യമായ രീതിയില്‍ അഭിപ്രായം പറയുകയും പ്രതികരിക്കുകയും വേണമെന്നും പറഞ്ഞ് നല്ലൊരു പാട്ട് പാടിയാണ് സൈറ തന്റെ വീഡിയോ അവസാനിപ്പിക്കുന്നത്.