സെക്രട്ടേറിയറ്റില്‍ ഹാജര്‍ പഞ്ചിങ് നിര്‍ബന്ധമാക്കി സര്‍ക്കാര്‍ ഉത്തരവ്. 2018 ജനുവരി ഒന്നുമുതലാണ് പഞ്ചിങ് നിര്‍ബന്ധമാക്കുന്നത്. ഈ സംവിധാനത്തില്‍ ഹാജര്‍ രേഖപ്പെടുത്തുന്നവര്‍ക്കു മാത്രമേ ഇനി മുതല്‍ ശമ്പളം ലഭിക്കൂ.

എല്ലാ ജീവനക്കാരും തിരിച്ചറിയില്‍ കാര്‍ഡ് പുറമേ കാണുന്നവിധം ധരിക്കണം. ഈ മാസം 15ന് മുന്‍പ് എല്ലാവരും തിരിച്ചറിയല്‍ കാര്‍ഡ് കൈപ്പറ്റണമെന്നും പൊതുഭരണ പ്രിന്‍സിപ്പല്‍ സെക്രട്ടറി ബിശ്വനാഥ് സിന്‍ഹ ഉത്തരവിട്ടു. 

ജീവനക്കാര്‍ ഓഫീസിലെത്തി പഞ്ച് ചെയ്തു കഴിഞ്ഞാല്‍ പിന്നെ മുങ്ങുന്നതായി നേരത്തെ പരാതി ഉയര്‍ന്നിരുന്നു. നിലവില്‍ പഞ്ചിംഗ് മെഷീന്‍ സ്ഥാപിച്ചിട്ടുള്ളത് സെക്രട്ടേറിയറ്റ് മെയിന്‍ കെട്ടിടത്തിലും അനക്‌സ് ഒന്നിലുമാണ്. അനക്‌സ് രണ്ടിലുള്ളവര്‍ രാവിലെ 10.15 നകം മെയിന്‍ കെട്ടിടത്തിലോ, അനക്‌സ് ഒന്നിലോ പഞ്ചിംഗ് നടത്തി സ്വന്തം കാര്യത്തിനായി പോകുന്നുവെന്നാണ് ആക്ഷേപം. പിന്നെ ഓഫീസിലെത്തുന്നത് തോന്നിയ നേരത്താണ്. പഞ്ചിംഗില്‍ കൃത്യസമയം പാലിച്ചിരിക്കുന്നതിനാല്‍ ആര്‍ക്കുമൊട്ട് ചോദിക്കാനുമാവില്ല. അനക്‌സ് രണ്ടില്‍ കാന്റീന്‍ സൗകര്യമില്ലാത്തതിനാല്‍ ചായ കുടിക്കാനും ഊണ് കഴിക്കാനുമെല്ലാം പുറത്തേക്ക് പോകുന്നവരും തിരിച്ചെത്തുന്നത് തോന്നുംപടിയാണ്.

എം.എം. മണി, സി. രവീന്ദ്രനാഥ്, വി.എസ്. സുനില്‍കുമാര്‍, കടകംപള്ളി സുരേന്ദ്രന്‍, കെ. രാജു എന്നീ മന്ത്രിമാരുടെ ഓഫീസുകള്‍ ഇവിടെയാണ്. ആരോഗ്യം, പൊതു വിദ്യാഭ്യാസം, റവന്യൂ, ഉന്നത വിദ്യാഭ്യാസം, കൃഷി, വനം എന്നീ വകുപ്പുകളുടെ ഓഫീസുകളും പ്രവര്‍ത്തിക്കുന്നു. ഓഫീസുകള്‍ ഇവിടെയാണെങ്കിലും വകുപ്പ് സെക്രട്ടറിമാരില്‍ അധികവും ഇരിക്കുന്നത് സെക്രട്ടേറിയറ്റിലെ പ്രധാന കെട്ടിടത്തിലാണ്. അതും ജീവനക്കാര്‍ക്ക് മുങ്ങാന്‍ സൗകര്യമായി. 2016 മാര്‍ച്ചില്‍ തുടങ്ങിയ അനക്‌സ് രണ്ടില്‍ 1250 ജീവനക്കാരാണുള്ളത്.