പഴയ പാളയത്തിലേക്ക് തിരിക്കാന്‍ തയ്യാറായി നില്‍ക്കുന്ന ജെ.ഡി.യു നേതാവ് എം.പി വീരേന്ദ്രകുമാറിനെ അനുനയിപ്പിക്കാന്‍ പി.കെ കുഞ്ഞാലിക്കിട്ടി ഇറങ്ങുന്നു. യു.ഡി.എഫ് നിര്‍ദ്ദേശപ്രകാരമാണ് കുഞ്ഞാലിക്കുട്ടി ചര്‍ച്ചനടത്തുന്നത്. ഉമ്മന്‍ചാണ്ടിയെ ചര്‍ച്ചയ്ക്ക് നിയോഗിച്ചെങ്കിലും അദ്ദേഹം പിന്‍മാറിയിരുന്നു. തുടര്‍ന്ന് ഉമ്മന്‍ചാണ്ടിയുടെ നിര്‍ദ്ദേശപ്രകാരമാണ് കുഞ്ഞാലിക്കുട്ടി ചര്‍ച്ച നടത്തുന്നത്. യു.ഡി.എഫ് വിടുന്നതിനെ വീരേന്ദ്രകുമാറിന്റെ കൂടെയുള്ള ഒരു വിഭാഗം എതിര്‍ക്കുന്നുണ്ട്. കോഴിക്കോട് ജില്ലാ പ്രസിഡന്റ് മനയത്ത് ചന്ദ്രനുമായും മുന്‍ മന്ത്രി കെ.പി മോഹനനുമായും ഉമ്മന്‍ചാണ്ടി സംസാരിച്ച ശേഷമാണ് കുഞ്ഞാലിക്കുട്ടിയോട് കാര്യങ്ങള്‍ പരിഹരിക്കാന്‍ ആവശ്യപ്പെട്ടത്.

17ന് മുമ്പ് ജെ.ഡിയു സംസ്ഥാന കമ്മിറ്റി കോഴിക്കോട് നടക്കും. അതിന് മുമ്പ് വയനാട് ലോക്‌സഭാ സീറ്റ് വീരേന്ദ്രകുമാറിന്റെ മകന്‍ ശ്രേയാംസ് കുമാറിന് നല്‍കാമെന്ന് ഉറപ്പ് നല്‍കിയാണ് അനുനയ ചര്‍ച്ച നടത്തുന്നത്. മറ്റ് പ്രശ്‌നങ്ങളും പരിഹരിക്കും. ജെ.ഡി.യു അനുകൂലമായി പ്രതികരിക്കുകയാണെങ്കില്‍ ചെന്നിത്തലയും ഉമ്മന്‍ചാണ്ടിയും അടക്കമുള്ളവര്‍ വീണ്ടും ചര്‍ച്ച നടത്തും. പാര്‍ട്ടിയില്‍ അഭിപ്രായഐക്യം ഉണ്ടാക്കിയെടുക്കാന്‍ വീരേന്ദ്രകുമാറിന് കഴിഞ്ഞിട്ടില്ല. അതാണ് യു.ഡി.എഫിനുള്ള ആശ്വാസം. ഇത് മുതലെടുത്ത് വീരേന്ദ്രകുമാറിനെ മുന്നണിയില്‍ നിര്‍ത്തുകയാണ് കോണ്‍ഗ്രസും ലീഗും അടക്കും ലക്ഷ്യം വയ്ക്കുന്നത്.

വീരേന്ദ്രകുമാര്‍ തീരുമാനം വ്യക്തമാക്കിയ ശേഷം എല്‍.ഡി.എഫ് നിലപാട് വ്യക്തമാക്കാമെന്നും അവര്‍ വരുന്നതില്‍ എതിര്‍പ്പില്ലെന്നും സി.പി.എം സംസ്ഥാന സെക്രട്ടറി കോടിയേരി ബാലകൃഷ്ണന്‍ വ്യക്തമാക്കിയിരുന്നു. എന്നാല്‍ എല്‍.ഡി.എഫിനെ ജനതാദള്‍ സെക്യുലര്‍ ഇതിനെതിരെ രംഗത്തെത്തിയിട്ടുണ്ട്. പ്രത്യേകിച്ച് മന്ത്രി മാത്യു ടി തോമസ് അടക്കം. വീരേന്ദ്രകുമാറിനോട് സെക്യുലറില്‍ ലയിക്കാന്‍ സി.പി.എം ആവശ്യപ്പെട്ടേക്കും. ഇതൊക്കെ സാധ്യമാകുന്ന കാര്യം പ്രയാസമാണ്. അങ്ങനെ വീരന്‍ രണ്ട് മുന്നണികള്‍ക്കും തലവേദനയായിരിക്കുകയാണ്.

വയനാട് ലോക്‌സഭാ സീറ്റ് നല്‍കാത്തതിനെ തുടര്‍ന്ന് 2009ലാണ് വീരേന്ദ്രകുമാറിന്റെ നേതൃത്വത്തിലുള്ള ജനതാദള്‍ (യു) എല്‍.ഡി.എഫ് വിട്ടത്. പിണറായി വിജയന്റെ ഏകാധിപത്യമാണ് സീറ്റ് നിഷേധിക്കാന്‍ കാരണമെന്നാണ് അന്ന് വിരേന്ദ്രകുമാര്‍ ആരോപിച്ചത്. ഇന്ന് അതേ പിണറായി വിജയനാണ് വീരേന്ദ്രകുമാറിനെയും കൂട്ടരെയും രണ്ട് കയ്യും നീട്ടി സ്വീകരിക്കാന്‍ കാത്തിരിക്കുന്നത്.