ഓഖി ചുഴലി മുന്നറിയിപ്പ് നവംബര്‍ 29ന് കേരളത്തെ ഫാക്‌സ് മുഖേന അറിയിച്ചെന്ന കേന്ദ്രകാലാവസ്ഥാ നിരീക്ഷണകേന്ദ്രത്തിന്റെ വാദം തെറ്റാണെന്ന് രേഖകള്‍ വ്യക്തമാക്കുന്നു. 30ന് ഉച്ചയ്ക്ക് 12 മണിക്കാണ് ചുഴലിക്കാറ്റ് അടിക്കുമെന്ന മുന്നറിയിപ്പ് ലഭിച്ചത്. അന്ന് രാവിലെ എട്ടിന് നല്‍കിയ മുന്നറിയിപ്പിലും ചുഴലിയുടെ കാര്യം പറയുന്നില്ല. 29ന് രണ്ടരയ്ക്ക് ലഭിച്ച സന്ദേശത്തില്‍ ബംഗാള്‍ ഉള്‍ക്കടലില്‍ ശ്രീലങ്കന്‍ തീരത്തിന് സമീപം ന്യൂനമര്‍ദ്ദം രൂപപ്പെടുന്നു. വലിയ തിരമാലകള്‍ക്ക് സാധ്യതയുണ്ട്. കടല്‍ പ്രക്ഷുബ്ധമാകും. മല്‍സ്യത്തൊഴിലാളികള്‍ കടലില്‍ പോകരുത് എന്നാണ് പറയുന്നത്. അല്ലാതെ ഓഖി കേരള തീരത്ത് എത്തുമെന്ന് പറയുന്നേയില്ല.

30ന് രാവിലെ എട്ടിന് ലഭിച്ച ഫാക്‌സിലും ചുഴലി കേരളത്തിലേക്ക് എത്തുമെന്ന സൂചനയില്ല. കന്യാകുമാരി മേഖലയില്‍ ന്യൂനമര്‍ദ്ദം ശക്തിപ്രാപിക്കുന്നുണ്ട്. ലക്ഷദ്വീപിന് സമീപം ചുഴലിക്കാറ്റിന് സാധ്യതയുണ്ട്. കേരള തീരത്ത് കനത്ത മഴയ്ക്ക് സാധ്യത. 75 കിലോമീറ്റര്‍ വേഗത്തില്‍ കാറ്റടിക്കും. ചുഴലിക്കാറ്റിന്റെ സഞ്ചാര പാതയില്‍ കേരളം ഉള്‍പ്പെട്ടിട്ടില്ല എന്നും വ്യക്തമാക്കുന്നു. അന്ന് ഉച്ചയ്ക്ക് 12ന് ചീഫ് സെക്രട്ടറിയുടെ ഓഫീസില്‍ ലഭിച്ച ഫാക്‌സില്‍ ചുഴലിക്കാറ്റ് എന്ന ഓറഞ്ച് മെസേജ് ഉണ്ട്. കേരള തീരത്തിന് 125 കിലോമീറ്റര്‍ അകലെ ഓഖി രൂപപ്പെടുന്നു എന്നായിരുന്നു സന്ദേശം. രാവിലെ എട്ട് മണിക്ക് മുമ്പ് ഓഖിയുടെ ദിശ മനസിലാക്കാന്‍ കാലാവസ്ഥാ നിരീക്ഷണ ശാസ്ത്രജ്ഞര്‍ക്ക് പോലും കഴിഞ്ഞില്ല എന്നതിന് തെളിവാണിത്.

ചുഴലിക്കാറ്റ് ഉണ്ടെന്നറിഞ്ഞയുടനെ ഫോണില്‍ കേരളത്തെയും ലക്ഷദ്വീപിനെയും അറിയിച്ചെന്നും കേന്ദ്രകാലാവസ്ഥാ നിരീക്ഷണകേന്ദ്രം പറയുന്നു. 30നാണ് ഓഖി മുന്നറിയിപ്പ് ലഭിച്ചതെന്ന് മുഖ്യമന്ത്രി ആവര്‍ത്തിച്ച് പറഞ്ഞിട്ടും ആരും വിശ്വസിച്ചില്ല. സര്‍ക്കാരിന് വീഴ്ചപറ്റിയെന്ന വിവാദങ്ങള്‍ മാത്രമാണ് ഉണ്ടായത്. അതേസമയം 29ന് ലഭിച്ച മുന്നറിയിപ്പില്‍ ശ്രീലങ്കന്‍ തീരത്തിന് സമീപം ന്യൂനമര്‍ദ്ദം രൂപപ്പെടുന്നു. വലിയ തിരമാലകള്‍ക്ക് സാധ്യതയുണ്ട്. കടല്‍ പ്രക്ഷുബ്ധമാകും. മല്‍സ്യത്തൊഴിലാളികള്‍ കടലില്‍ പോകരുത് എന്ന് പറയുന്നുണ്ട്. ഈ വിവരം ഫിഷറീസ് വകുപ്പും ദുരന്തനിവാരണ അതോറിട്ടിയും അവഗണിച്ചു.