ഇന്ത്യയിലാകമാനം വര്‍ദ്ധിക്കുന്ന മത വര്‍ഗ്ഗീയതയെയും അസഹിഷ്ണുതയെയും വിമര്‍ശിച്ച് നടന്‍ പ്രകാശ് രാജ്. 22ാമത് കേരള അന്താരാഷ്ട്ര ചലച്ചിത്രോത്സവത്തിന്റെ ഉദ്ഘാടന വേദിയിലാണ് കേരളത്തെ വാനോളം പ്രശംസിച്ച് പ്രമുഖ നടനായ പ്രകാശ് രാജ് സംസാരിച്ചത്.

എഴുതി തയ്യാറാക്കിയ പ്രസംഗവുമായല്ല ഞാന്‍ കേരളത്തിലേക്ക് വന്നത്. ഇങ്ങോട്ടേക്ക് അങ്ങിനെ വരേണ്ട കാര്യമില്ല. ഇവിടെ ഒന്നിനും സെന്‍സറിംഗ് ഇല്ല. ആരെയും ഒന്നിനെയും ഭയക്കാതെ എനിക്ക് എന്തിനെ കുറിച്ചും സംസാരിക്കാവുന്ന ഇടങ്ങളില്‍ ഒന്നാണിത്.പ്രകാശ് രാജ് ഉദ്ഘാടന ചടങ്ങിലെ തന്റെ പ്രസംഗത്തില്‍ പറഞ്ഞു.

പത്രപ്രവര്‍ത്തകരുടെ മാത്രം ശബ്ദമല്ല, രാജ്യമൊട്ടാകെയുള്ള എല്ലാത്തരം പ്രതിഷേധ സ്വരങ്ങളും അടിച്ചമര്‍ത്തപ്പെടുകയാണ്. ഞാനിത് വരെ സംസാരിച്ചു തുടങ്ങിയിട്ടില്ല. എനിക്ക് അവരോടു പറയാനുള്ളത് ഇതാണ്, നിങ്ങള്‍ നിശബ്ദമാക്കപ്പെടുന്നതെന്തും കൂടുതല്‍ ശക്തിയാര്‍ജ്ജിച്ചു തിരിച്ചു വരും, കൂടുതല്‍ മുഴക്കത്തില്‍.

അവരെന്നെ ഭീഷണിപ്പെടുത്തുകയാണ്, ഞാനവരോട് ഉറക്കെ ചിരിക്കുന്നു. അവരെന്നെ നിശബ്ദനാക്കാന്‍ ശ്രമിച്ചപ്പോഴെല്ലാം ഞാന്‍ പാടിക്കൊണ്ടിരുന്നു.

പ്രകാശ് രാജ് തനിക്കെതിരായി ഉയര്‍ന്ന ഭീഷണികളെ പരാമര്‍ശിച്ച് പറഞ്ഞുഅവര്‍ക്ക് എസ് ദുര്‍ഗ എന്ന സിനിമയെ കുറിച്ച് പ്രശ്‌നങ്ങളുണ്ട്. എന്നാല്‍ അവര്‍ക്ക് ദുര്‍ഗ വൈന്‍ പാര്‍ലറിനെ കുറിച്ച് പ്രശ്‌നങ്ങളൊന്നും ഇല്ല. ഹിറ്റലറുടെ ആശയങ്ങളെ പിന്തുടരുന്നവരാണ് അവര്‍”, പ്രകാശ് രാജ് കൂട്ടിച്ചേര്‍ത്തു.

സമൂഹത്തെ സ്‌നേഹിക്കുന്നവനാണ് യഥാര്‍ത്ഥ കലാകാരന്‍. സമൂഹത്തിനു വേണ്ടി തന്റെ പേരും പ്രശസ്തിയും പണവും എന്തിനു ജീവന്‍ വരെ കൊടുക്കാന്‍ തയ്യാരാകുന്നവരാകണം അവര്‍. കലാകാരന്മാര്‍, സര്‍ഗാത്മക പ്രവര്‍ത്തിയില്‍ ഏര്‍പ്പെട്ടവര്‍ പ്രതികരിച്ചില്ലെങ്കില്‍ സമൂഹം മുഴുവന്‍ അതിനു ധൈര്യമില്ലത്തവരായിത്തീരും.

ശബ്ദമില്ലാത്തവരുടെ ശബ്ദമാകണം കലാകാരന്‍. ജനപക്ഷത്ത് നില്‍ക്കാന്‍, അനീതിക്കെതിരെ സ്വരം ഉയര്‍ത്താന്‍ ഒരു രാഷ്ട്രീയ പാര്‍ട്ടിയുടെ പിന്‍ ബലവും ആവശ്യമില്ലെന്നും പ്രകാശ് രാജ് പറഞ്ഞു.