മടുത്തു ഈ വേഷം... എംഎല്എ ജീവിതം മടുത്തതായി ബി.ജെ.പി.യുടെ ഏക എംഎല്എ ആയ ഒ. രാജഗോപാല്; ഇനി തെരഞ്ഞെടുപ്പില് മത്സരിക്കില്ല; നിയമസഭാംഗമെന്ന നിലയില് പ്രവര്ത്തനം പ്രതീക്ഷയ്ക്കൊപ്പം ഉയര്ന്നില്ല
ബിജെപിയ്ക്ക് കേരളത്തില് ആദ്യ എംഎല്എയെ സമ്മാനിച്ചത് ഒ. രാജഗോപാലിലൂടെയാണ്. നേമത്ത് ഒ. രാജഗോപാലിവ് ലഭിച്ച ജനപിന്തുണ ഇടതു വലതു പാര്ട്ടികളെ അമ്പരപ്പിച്ചിരുന്നു. എന്നാല് രാഷ്ട്രീയം അവസാനിപ്പിക്കാന് ഒരുങ്ങുകയാണ് രാജഗോപാല്. എംഎല്എ സ്ഥാനം മടുത്തുവെന്നും ഇനി തെരഞ്ഞെടുപ്പുകളില് മത്സരിക്കില്ലെന്നും ബിജെപി നേതാവ് ഒ രാജഗോപാല് പറഞ്ഞു. പ്രതീക്ഷക്കൊത്ത് ഉയരാന് തനിക്ക് സാധിച്ചില്ല എന്ന വിമര്ശനത്തില് വിഷമമില്ല എന്നും അദ്ദേഹം പറഞ്ഞു. ന്യൂസ് 18 ചാനലിലെ പരിപാടിയിലാണ് ഒ രാജഗോപാല് എംഎല്എ തന്റെ നിലപാട് വ്യക്തമാക്കിയിരിക്കുന്നത്.
അടുത്ത നിയമസഭാ തെരഞ്ഞെടുപ്പിനുള്ള സ്ഥാനാര്ത്ഥി നിര്ണയം പോലും ബിജെപി പൂര്ത്തിയാക്കിയെന്നുള്ള അഭ്യൂഹങ്ങള് പ്രചരിക്കുന്നതിനിടെയാണ് പാര്ട്ടിയിലെ തലമുതിര്ന്ന നേതാവ് പാര്ലമെന്ററി രാഷ്ട്രീയം വേണ്ടെന്ന തുറന്ന പ്രഖ്യാപനം നടത്തിയിരിക്കുന്നത്. താങ്കളുടെ തീരുമാനം പാര്ട്ടിയെ പ്രതികൂലമായി ബാധിക്കില്ലെ എന്ന ചോദ്യത്തോട് തനിക്കതിന് വിഷമമില്ലെന്ന മറുപടിയായിരുന്നു രാജഗോപാല് നല്കിയത്. പ്രതീക്ഷയ്ക്കൊത്ത് ഉയരാത്തതുകൊണ്ടാണോ താങ്കള് പിന്മാറുന്നതെന്ന് ചോദിച്ചാലും തനിക്ക് വിഷമമില്ലെന്നും രാജഗോപാല് പറഞ്ഞു. ബാക്കിയുള്ള കാലം പുസ്തക വായനയും ആശ്രമ ജീവിതവുമായി മുന്നോട്ട് പോകാനാണ് കരുതുന്നതെന്നും അദ്ദേഹം വ്യക്തമാക്കി.
കേരളത്തിലെ ബിജെപിയുടെ മുതിര്ന്ന നേതാവാണ് ഒ രാജഗോപാല്. നിരവധി തവണ നിയമസഭയിലേക്ക് മത്സരിച്ചിരുന്നുവെങ്കിലും കഴിഞ്ഞ നിയമസഭാ തെരഞ്ഞെടുപ്പിലാണ് ആദ്യമായി ജയിക്കുന്നത്. ബിജെപി സംസ്ഥാന പ്രസിഡന്റ് കുമ്മനം രാജശേഖരന് അടക്കമുള്ളവരുടെ നയങ്ങളില് രാജഗോപാലിന് താല്പ്പര്യമില്ല. മെഡിക്കല് കോഴ വിവാദവും മുതിര്ന്ന നേതാവിന് അലോസരങ്ങളുണ്ടാക്കി. ഇതെല്ലാം ബിജെപി നേതൃത്വത്തില് നിന്ന് രാജഗോപാലിനെ അകറ്റി. ഈ സാഹചര്യത്തിലാണ് ഇനി മത്സരത്തിനില്ലെന്ന് രാജഗോപാല് പ്രഖ്യാപിക്കുന്നത്.
ഇതോടെ നേമത്തെ സ്ഥാനാര്ത്ഥി മോഹികളും ബിജെപിയില് സജീവമായി രംഗത്ത് എത്തുകയാണ്. അടുത്ത തവണ നിയമസഭയിലേക്ക് നേമത്ത് നിന്ന് മത്സരിക്കാനാണ് ചരടു വലികള്. ഇങ്ങനേയും ആര് എസ് എസിനെ അനുകൂലമാക്കാനാണ് നീക്കം. ബിജെപി എംപി കൂടിയായ സുരേഷ് ഗോപി അടക്കമുള്ളവര് നേമത്ത് സജീവമാണ്. ലോക്സഭാ തെരഞ്ഞെടുപ്പിന് ശേഷം മാത്രമേ ആരാകും സ്ഥാനാര്ത്ഥിയെന്ന ചിത്രം തെളിയൂ. ലോക്സഭാ തെരഞ്ഞെടുപ്പില് സുരേഷ് ഗോപി മത്സരിച്ചില്ലെങ്കില് നിയമസഭയില് സുരേഷ് ഗോപി മത്സരിക്കാന് സാധ്യത ഏറെയാണ്. എംടി രമേശ്, സുരേഷ്, കൃഷ്ണദാസ്, കുമ്മനം രാജശേഖരന് തുടങ്ങിയവരെല്ലാം നേമത്തെ മനസ്സില് കൊണ്ടു നടക്കുന്നവരാണ്.
ബിജെപിയുടെ ആദ്യ കേരളാഎംഎല്എ എന്ന നിലയില് പാര്ട്ടിയിലും കേരള രാഷ്ട്രീയത്തിലും അപൂര്വ്വ വ്യക്തിത്വമായി മാറിയ ഒ രാജഗോപാല് പക്ഷേ സ്പീക്കര് തിരഞ്ഞെടുപ്പില് എല്.ഡി.എഫിനു വോട്ട് രേഖപ്പെടുത്തിയതും പയ്യന്നൂരിലെ ആര്എസ്എസ് പ്രവര്ത്തകന്റെ കൊലപാതകത്തില് ബിജെപി നേതാക്കള് നടത്തിയ അഭിപ്രായങ്ങളെ നിയമസഭയില് എതിര്ത്ത് സംസാരിച്ചതും വിവാദമായി മാറിയിരുന്നു. കേരളത്തിലെ പല മണ്ഡലങ്ങളില്നിന്ന് ജനവിധി തേടിയിട്ടുള്ള ഒ. രാജഗോപാല് ആദ്യമായി വിജയിക്കുന്നത് കഴിഞ്ഞ നിയമസഭാ തെരഞ്ഞെടുപ്പിലായിരുന്നു. 1998ലെ വാജ്പേയി മന്ത്രിസഭയില് റയില്വേ സഹമന്ത്രിയായിരുന്ന രാജഗോപാല് മദ്ധ്യപ്രദേശില് നിന്നും രാജ്യസഭയെ പ്രതിനിധീകരിച്ചിരുന്നു. അഴിമതി വിരുദ്ധതയും വികസനവുമായിരുന്നു കേന്ദ്രമന്ത്രിയെന്ന നിലയില് രാജഗോപാലിനെ ശ്രദ്ധേയനാക്കിയത്. ഇത് തന്നെയാണ് നേമത്ത് നിന്നുള്ള ജയത്തിന് അടിസ്ഥാന കാരണമായതും.
രജഗോപാല് റെയില്വേ സഹമന്ത്രിയായിരുന്ന കാലത്താണ് കേരളം എന്നൊരു സംസ്ഥാനമുണ്ടെന്ന് റെയില്മന്ത്രാലയം അറിഞ്ഞത് തന്നെ. കേരളത്തില് ഇന്നുവരെ ഉണ്ടാകാത്ത അത്ര റെയില് വികസനം ഉണ്ടായത് രാജഗോപാല് മന്ത്രിയായ കാലത്താണെന്ന് കോണ്ഗ്രസുകാരും സി പി എമ്മുകാരും പോലും സമ്മതിക്കും. പാതയിരട്ടിപ്പിക്കല്, പുതിയ ട്രയിനുകള്, മേല്പ്പാലങ്ങള്, റെയില്വേ സ്റ്റേഷന് നവീകരണം, റെയില്വേ വൈദ്യുതീകരണം തുടങ്ങി റെയില്വേ വികസനത്തിന്റെ സമസ്ത മേഖലകളിലും രാജഗോപാലിന്റെ കൈരേഖ പതിഞ്ഞിരുന്നു. രണ്ട് തവണ തിരുവനന്തപുരം ലോക്സഭാ മണ്ഡലത്തില് മികച്ച പ്രകടനം കാഴ്ചവച്ചയാളുമാണ് രാജഗോപാല്. വ്യക്തിപരമായി അഴിമതിയോ സ്വജനപക്ഷപാതമോ അക്രമവാസനയോ ഇതുവരെ അദ്ദേഹത്തെ കുറിച്ച് കേട്ടിട്ടില്ല. ഇതെല്ലാം തന്നെയാണ് ഇന്നും രാജഗോപാലിന്റെ ജനസമ്മതിയുടെ അടിത്തറ. ഇതിനുള്ള അംഗീകാരമാണ് എണ്പത്തിയേഴാം വയസ്സിലെ നേമത്തെ നിയമസഭാ വിജയത്തിന് അടിസ്ഥാന ഘടകമായതും.
https://www.facebook.com/Malayalivartha
