ഓഖി ചുഴലിക്കാറ്റ് നിരവധി മത്സ്യതൊഴിലാളികളുടെ ജീവനെടുത്തപ്പോള്‍ കാണാത്തവരെപ്പറ്റി ആശങ്കയും വര്‍ധിച്ചു. പ്രിയപ്പെട്ടവര്‍ ജീവിച്ചിരിപ്പില്ലെന്ന് മനസാ സ്വീകരിച്ച് കഴിഞ്ഞെങ്കിലും അവര്‍ യേശുവപ്പനില്‍ മുറുകെ വിശ്വസിച്ചു. ദേ വരുന്നു തങ്ങളുടെ പ്രിയപ്പെട്ടവര്‍. ഓഖിയോ, അതെന്തെന്ന് ചോദിച്ചാണ് അവര്‍ കടലില്‍ നിന്നുമെത്തിയത്. റോസാ മിസ്റ്റിക്ക, യഹോവ സാക്ഷി എന്നീ ബോട്ടുകളില്‍ മീന്‍ പിടിക്കാന്‍പോയവരാണ് കരഞ്ഞു കലങ്ങിയ കണ്ണുകളുമായി എത്തിയ തങ്ങളുടെ പ്രിയപ്പെട്ടവരോട് ഓഖി എന്താണെന്ന് ചോദിച്ചത്. മഹാരാഷ്ട്ര തീരത്ത് മത്സ്യബന്ധനത്തിന് പോയി തിരിച്ചെത്തിയ ബോട്ടിലെ തൊഴിലാളികളാണ് അത്ഭുതത്തോടെ ഓഖിയെ കുറിച്ച് ചോദിച്ചറിഞ്ഞത്.

ഓഖി ചുഴലിക്കാറ്റിന് മുമ്പ് മീന്‍ പിടിക്കാന്‍ പോയ ഇവര്‍ ബോട്ടുകള്‍ നിറയെ മത്സ്യവുമായി ഇന്നലെയാണ് കൊച്ചിയില്‍ തിരിച്ചെത്തിയത്. തിരമാലകള്‍ ശക്തമായിരുന്നെങ്കിലും കാര്യമായ ബുദ്ധിമുട്ട് നേരിട്ടില്ലെന്നു തൊഴിലാളികള്‍ പറഞ്ഞു. 13 മലയാളികള്‍ ഉള്‍പ്പെടെ 29 തൊഴിലാളികളാണ് രണ്ട് ബോട്ടിലുമായി ഉണ്ടായിരുന്നത്.

അതേസമയം ഓഖി ചുഴലിക്കാറ്റിനു മുമ്പ് കൊച്ചിയില്‍നിന്നു മത്സ്യബന്ധനത്തിനായി പുറപ്പെട്ട 45 ബോട്ടുകളെക്കുറിച്ച് ഇനിയും വിവരം ലഭിച്ചില്ല. അഞ്ഞൂറോളം തൊഴിലാളികളാണ് ഇവയിലുള്ളത്. കൊച്ചിയില്‍നിന്നുള്ള ഒന്‍പത് ബോട്ടുകള്‍ മംഗലാപുരം, ഗുജറാത്ത്, മഹാരാഷ്ട്ര, ലക്ഷദ്വീപ് എന്നിവിടങ്ങളില്‍ എത്തിയതായി വിവരം ലഭിച്ചു.

എന്നാല്‍, കടലാക്രമണത്തില്‍ തകര്‍ന്നതായി രക്ഷപ്പെട്ടെത്തിയ തൊഴിലാളികള്‍ അറിയിച്ച ഗ്രീഷ്മ, തുഴല്‍ അന്തോണിയാന്‍ ഒന്ന്, വിജോവിന്‍, താജ് മഹല്‍, ആവേ മരിയ, സെന്റ് പീറ്റര്‍ പോള്‍, മാതാ ബോട്ടുകളെ സംബന്ധിച്ചോ അതിലെ തൊഴിലാളികളെക്കുറിച്ചോ യാതൊരു വിവരവും ലഭിച്ചിട്ടില്ല. ഇവര്‍ക്കായുള്ള തിരച്ചില്‍ ശക്തമാക്കിയിട്ടുണ്ട്.

തൂത്തുക്കുടിയില്‍ നിന്നു മത്സ്യബന്ധനത്തിനായി പുറപ്പെട്ട ഐലന്റ് ക്യൂന്‍, ദിവ്യ ബോട്ടുകള്‍ ഇന്നലെ തോപ്പുംപടി ഹാര്‍ബറിലെത്തി. 18 തൊഴിലാളികളാണ് രണ്ട് ബോട്ടുകളിലുമായി ഉണ്ടായിരുന്നത്. കപ്പല്‍ ഗതാഗതം നിര്‍ത്തിവെച്ചതോടെ കോഴിക്കോട് ലോഡ്ജില്‍ കഴിയുകയായിരുന്ന ലക്ഷദ്വീപ് സ്വദേശികള്‍ നാട്ടിലേക്ക് മടങ്ങി.ഇന്നലെ രാവിലെ ബേപ്പൂരില്‍നിന്ന് പുറപ്പെട്ട കപ്പലിലായിരുന്നു മടക്കം. ബേപ്പൂരില്‍നിന്നു കാണാതായ മിറാന്‍ഡ ബോട്ട് ഗോവയ്ക്കു സമീപം കണ്ടെത്തിയതായി ജില്ലാ ഭരണകൂടത്തിനു വിവരം ലഭിച്ചു. ബോട്ടിലുണ്ടായിരുന്ന മത്സ്യത്തൊഴിലാളികള്‍ സുരക്ഷിതരാണ്.

ലക്ഷദ്വീപില്‍ കുടുങ്ങിയ മത്സ്യ തൊഴിലാളികള്‍ക്ക് കുടിവെള്ളവും ഭക്ഷണവും താമസിക്കാനുള്ള വാസസ്ഥലവും ഒരുക്കി ലക്ഷദ്വീപില്‍ നാവികസേന പുനരധിവാസപ്രവര്‍ത്തനം ഊര്‍ജിതമാക്കി. കവരത്തിയില്‍ ദുരിതാശ്വാസക്യാമ്പ് തുറന്നു. കുട്ടികളടക്കം നൂറുകണക്കിനുപേരാണു ക്യാമ്പില്‍ എത്തിയത്. ബിസ്‌കറ്റ്, കുടിവെള്ളം എന്നിവയും വിതരണം ചെയ്തു. അവശ്യമരുന്നുകളും എത്തിച്ചുനല്‍കി.

ലക്ഷദ്വീപ് ഭരണകൂടത്തിന്റെ അഭ്യര്‍ത്ഥനപ്രകാരമാണു നാവികസേന മിനിക്കോയിയിലും കവരത്തിയിലും ക്യാമ്പുകള്‍ തുറന്നത്. 12,500 ലിറ്റര്‍ കുടിവെള്ളവും വിതരണം ചെയ്തു. താല്‍ക്കാലിക വാസഗൃഹങ്ങള്‍ ഉണ്ടാക്കാനുള്ള സാധനസാമഗ്രികളും ലഭ്യമാക്കി.