ഇടുക്കി മരക്കാട്ടുകുടിയില്‍ എട്ടു ദിവസം പ്രായമുള്ള നവജാത ശിശുവിന്റെ കഴുത്ത് ഞെരിച്ച് കൊന്ന സംഭവത്തില്‍ അമ്മയെ പോലീസ് അറസ്റ്റ് ചെയ്തു. കണ്ടവന്‍കരയില്‍ ബിനുവിന്റെ ഭാര്യ സന്ധ്യ (28) യാണ് അറസ്റ്റിലായത്. തുണി ഉപയോഗിച്ചാണ് അമ്മ കുഞ്ഞിനെ കഴുത്ത് ഞെരിച്ചു കൊലപ്പെടുത്തിയതെന്ന് പോലീസ് പറഞ്ഞു.

കുഞ്ഞിന്റെ കഴുത്തില്‍ പാടും മുറിവും കണ്ടതിനെത്തുടര്‍ന്നു പോലീസ് അസ്വഭാവികമരണത്തിനു കേസ് എടുത്തിരുന്നു. ശ്വാസം മുട്ടിയാണു കുഞ്ഞിനെ കൊലപ്പെടുത്തിയതെന്നു പോസ്റ്റ്‌മോര്‍ട്ടത്തില്‍ സൂചന ലഭിച്ചു. തുടര്‍ന്നു നടന്ന ചോദ്യം ചെയ്യലില്‍ ശനിയാഴ്ച രാവിലെയാണു സന്ധ്യയെ അറസ്റ്റ് ചെയ്തത്.

കറുത്തനിറമുള്ള തങ്ങളുടെ കുട്ടിക്കു വെളുത്ത നിറമായതിനാല്‍ ഭര്‍ത്താവ് സംശയിക്കുമോയെന്ന ആശങ്കമൂലമാണു കൊലപ്പെടുത്തിയതെന്ന് പ്രതി പോലീസിനു മൊഴി നല്‍കി. എട്ടു ദിവസം പ്രായമായ കുഞ്ഞിനു ഭര്‍ത്താവിന്റെ മുഖഛായയില്ലാത്തതും കൊലപാതകത്തിനു പ്രചോദനമായി.

ഭര്‍ത്താവുമായി പിണങ്ങി മാതാവിനും സഹോദരനുമൊപ്പം മുരിക്കാട്ടുകുടിയിലുള്ള തറവാട്ടു വീട്ടിലായിരുന്നു ഒരുവര്‍ഷത്തോളമായി സന്ധ്യ താമസിക്കുന്നത്. പിന്നീടു തര്‍ക്കം പറഞ്ഞു തീര്‍ത്തതിനാല്‍ ഭര്‍ത്താവും ഇവിടെ താമസമാരംഭിച്ചു. 

കോട്ടയം മെഡിക്കല്‍ കോളജ് ആശുപത്രിയില്‍ നവംബര്‍ മുപ്പതിനാണ് ആണ്‍കുഞ്ഞിനു ജന്മം നല്‍കിയത്. ആറു ദിവസത്തെ ആശുപത്രിവാസത്തിനുശേഷം ബുധനാഴ്ചയാണ് ഇവര്‍ വീട്ടില്‍ തിരിച്ചെത്തിയത്. പിറ്റേദിവസം രാവിലെ സന്ധ്യയുടെ അമ്മ കുഞ്ഞിനെ കുളിപ്പിച്ച് കിടത്തിയതിനു ശേഷം സമീപത്തെ തോട്ടില്‍ വസ്ത്രങ്ങള്‍ കഴുകാന്‍ പോയി.

ഈ സമയം, കട്ടിലിലുണ്ടായിരുന്ന വെള്ളത്തുണി കുഞ്ഞിന്റെ കഴുത്തില്‍ മുറുക്കി കൊലപ്പെടുത്തുകയായിരുന്നു. പീരുമേട് മ്ലാമല എസ്‌റ്റേറ്റില്‍ ജോലിക്കു പോയ ഭര്‍ത്താവ് ബിനുവിനെ ഫോണില്‍ വിളിച്ച് കുട്ടിക്കു അനക്കമില്ലെന്നു യുവതി പറഞ്ഞു. വിവരം ഭാര്യാസഹോദരനെയും ബന്ധുക്കളെയും ഇയാള്‍ അറിയിച്ചു. 

കട്ടപ്പനയിലെ സ്വകാര്യ ആശുപത്രിയില്‍ എത്തിച്ചെങ്കിലും നേരത്തേ മരണം സംഭവിച്ചതായി ഡോക്ടര്‍ സ്ഥിരീകരിച്ചു കുട്ടിയുടെ കഴുത്തില്‍ മുറിവു കണ്ടെത്തിയ ആശുപത്രി അധികൃതര്‍, പോലീസിനെ ഇക്കാര്യം അറിയിക്കുകയായിരുന്നു.

തുടര്‍ന്ന് കോട്ടയം മെഡിക്കല്‍ കോളജ് ആശുപത്രിയില്‍ നടത്തിയ പോസ്റ്റ്‌മോര്‍ട്ടത്തിലാണ് ശ്വാസം മുട്ടിച്ചു കൊലപ്പെടുത്തിയതാണെന്നു തെളിഞ്ഞത്. ഇതിനിടെ, കുട്ടിയെ കൊലപ്പെടുത്തിയ കാര്യം മുരിക്കാട്ടുകുടിയിലെ ആശാപ്രവര്‍ത്തകയോടു സന്ധ്യ വെളിപ്പെടുത്തിയിരുന്നു.