ഓഖി ചുഴലിക്കാറ്റില്‍ സംസ്ഥാനത്ത് മരിച്ചവരുടെ എണ്ണം സൂനാമിയിലുണ്ടായതിനെക്കാള്‍ ഉയര്‍ന്നേക്കുമെന്ന് കണക്കുകള്‍. 2004ലെ സൂനാമിയില്‍ കേരളത്തില്‍ മരിച്ചത് 172 പേരാണ്. സര്‍ക്കാറിന്റെ ഔദ്യോഗിക കണക്കുകള്‍ പ്രകാരം ഓഖി ചുഴലിക്കാറ്റില്‍ ഇതുവരെ 45 പേര്‍ മരിച്ചെന്നാണ് പുതിയ വിവരം. ഇതില്‍ കാര്യമായ അന്തരമുണ്ടെന്നാണ് ചൂണ്ടിക്കാണിക്കപ്പെടുന്നത്.
ഓഖി ചുഴലിക്കാറ്റില്‍ കരയിലുണ്ടായ അപകടങ്ങളില്‍ അഞ്ചുപേരോളം മരിച്ചിട്ടുണ്ട്. അതുകൂടി കൂട്ടിയാല്‍ മരണനിരക്ക് ഉയരും. ദുരന്തംവിതച്ച് 12 ദിവസം പിന്നിട്ടിട്ടും കടലിലകപ്പെട്ട് ഇനിയും മടങ്ങിവരാത്തവര്‍ നിരവധി പേരുണ്ട്. ഞായറാഴ്ച വൈകീട്ട് ആറുവരെയുള്ള സര്‍ക്കാര്‍ കണക്കില്‍ 95 പേര്‍ മടങ്ങിയെത്താനുണ്ടെന്ന വിവരമാണ് നല്‍കിയത്. അന്ന് രാത്രിയോടെ കണക്ക് 146 ആയി ഉയര്‍ന്നു.

ഓഖി ദുരന്തത്തില്‍ നേരിട്ട് ഇരകളായത് 2500ലേറെ േപരാണ്. കോടികളുടെ നാശവും സംഭവിച്ചു. തിരുവനന്തപുരം ജില്ലയില്‍നിന്നുമാത്രം കട്ടമരത്തില്‍ മത്സ്യബന്ധനത്തിനു പോയ 98 പേര്‍ മടങ്ങിവരാനുണ്ടെന്നാണ് ലത്തീന്‍ അതിരൂപത പറയുന്നത്. പരുത്തിയൂര്‍ മുതല്‍ തുമ്പവരെ തീരമേഖലയില്‍നിന്ന് നാടന്‍ വള്ളങ്ങളില്‍ പോയ 300 പേരുണ്ട്.
ബോട്ടുകളില്‍ പോയ 162 പേര്‍ ഇനിയും മടങ്ങിവരാനുണ്ട്. അതു നീണ്ടകര, കൊച്ചി, ബേപ്പൂര്‍, തൂത്തൂര്‍ എന്നിവിടങ്ങളില്‍നിന്ന് പോയവരാണ്. കുളച്ചലില്‍നിന്ന് പോയ 300 പേര്‍ തിരിച്ചുവരാനുണ്ട്. അതിലും മലയാളികളുണ്ടെന്നാണ് അതിരൂപത പറയുന്നത്. ലക്ഷദ്വീപിലും മിനിക്കോയ്, മഹാരാഷ്ട്ര തുടങ്ങി തീരങ്ങളില്‍ ബോട്ടുകളില്‍ പോയ മത്സ്യത്തൊഴിലാളികളെ രക്ഷിച്ച് കരക്കെത്തിക്കുന്ന ദൗത്യം തുടരുകയാണ്.

നിരവധി മൃതദേഹങ്ങള്‍ കടലില്‍ ഒഴുകിനടക്കുന്നതായി രക്ഷപ്പെട്ടെത്തിയ മത്സ്യത്തൊഴിലാളികള്‍ വിവരം നല്‍കിയിട്ടുണ്ട്. മത്സ്യബന്ധനത്തിനു പോയി ഏഴുമാസം കഴിഞ്ഞിട്ടും മടങ്ങിവന്നില്ലെങ്കില്‍ മാത്രമേ നിലവിലെ വ്യവസ്ഥകള്‍ പ്രകാരം നഷ്ടപരിഹാരത്തിന് അര്‍ഹതയുണ്ടാകൂ. ഓഖിയുടെ കാര്യത്തില്‍ ഈ കാലപരിധി കുറക്കുമെന്ന് സര്‍ക്കാര്‍ അറിയിച്ചിട്ടുണ്ട്.