ഓഖി ദുരന്തം ദേശീയ ദുരന്തമായി പ്രഖ്യാപിക്കില്ലെന്ന് കേന്ദ്ര ആഭ്യന്തര മന്ത്രി ലോക്‌സഭയില്‍ നടത്തിയ പ്രഖ്യാപനത്തില്‍ സിപിഐ സംസ്ഥാന സെക്രട്ടറി കാനം രാജേന്ദ്രന്‍ ശക്തമായി പ്രതിഷേധിച്ചു. കേരളത്തെ മാത്രമല്ല, മറ്റ് സംസ്ഥാനങ്ങളെയും ബാധിച്ച ദുരന്തമാണിത്. പ്രധാനമന്ത്രി കേരള സന്ദര്‍ശനം നടത്തി എല്ലാ സഹായവും നല്‍കുമെന്ന് പ്രഖ്യാപിച്ചിരുന്നു.

എന്നിട്ടും കേരളത്തിലെ രാഷ്ട്രീയ പാര്‍ട്ടികളും സര്‍ക്കാരും മുന്നോട്ടുവെച്ച ഓഖി ദുരന്തത്തെ ദേശീയ ദുരന്തമായി പ്രഖ്യാപിക്കണമെന്ന ആവശ്യം നിരാകരിച്ച നടപടി കേന്ദ്ര സര്‍ക്കാര്‍ കേരളത്തോട് സ്വീകരിക്കുന്ന അവഗണനയുടെ മറ്റൊരു ഉദാഹരണമാണ്. ഓഖി ദുരന്തം ദേശീയ ദുരന്തമായി പ്രഖ്യാപിക്കണമെന്ന് ആദ്യമായി ആവശ്യപ്പെട്ട രാഷ്ട്രീയപ്പാര്‍ട്ടി സിപിഐയാണ്.

കേരള മന്ത്രിസഭയും മുഖ്യമന്ത്രി വിളിച്ചു ചേര്‍ത്ത സര്‍വ്വകക്ഷിയോഗവും ഈ ആവശ്യം മുന്നോട്ടു വെച്ചിരുന്നു. കേരളത്തിലെ വിവിധ െ്രെകസ്തവ സഭാനേതൃത്വവും ഓഖി ദുരന്തത്തെ ദേശീയ ദുരന്തമായി പ്രഖ്യാപിക്കണമെന്ന് ആവശ്യപ്പെട്ടിരുന്നു. എന്നാല്‍, ഇതൊന്നും മാനിക്കാതെ നിലവിലുള്ള വ്യവസ്ഥകള്‍ ചൂണ്ടിക്കാട്ടി കേരളത്തിന്റെ പൊതു ആവശ്യം നിരാകരിച്ച കേന്ദ്ര സര്‍ക്കാര്‍ നടപടിക്കെതിരെ ശക്തമായി പ്രതിഷേധിക്കാന്‍ പൊതുസമൂഹത്തോട് അഭ്യര്‍ത്ഥിക്കുകയാണെന്നും കാനം പറഞ്ഞു.

ഓഖി ദുരന്ത ബാധിതര്‍ക്ക് ആശ്വാസം എത്തിക്കുന്നതിനും ദുരന്ത മുന്നറിയിപ്പ് നല്‍കുന്നതിലും കേരള സര്‍ക്കാരിനെ കുറ്റപ്പെടുത്തുന്ന ബിജെപിയുടെ സംസ്ഥാന നേതാക്കളുടെ ഇക്കാര്യത്തിലുള്ള അഭിപ്രായമറിയാന്‍ താല്‍പര്യമുണ്ടെന്നും കാനം പറഞ്ഞു.

ഓഖിയെ ദേശീയദുരന്തമായി പ്രഖ്യാപിക്കില്ലെന്ന് കേന്ദ്രസര്‍ക്കാര്‍ ഇന്നലെ അറിയിച്ചിരുന്നു. കേന്ദ്രആഭ്യന്തരമന്ത്രി രാജ്‌നാഥ് സിംഗ് ലോക്‌സഭയിലാണ് ഇക്കാര്യം വ്യക്തമാക്കിയത്. സംസ്ഥാന സര്‍ക്കാരിന്റെ നിരന്തരമായ ആവശ്യമായിരുന്നു ഓഖിയെ ദേശീയദുരന്തമായി പ്രഖ്യാപിക്കുക എന്നത്.

നിലവിലുള്ള ചട്ടങ്ങള്‍ ഓഖിയെ ദേശീയദുരന്തമായി പ്രഖ്യാപിക്കുന്നതിന് തടസമാണെന്ന് രാജ്‌നാഥ് സിംഗ് സഭയില്‍ പറഞ്ഞു. എന്നാല്‍ അതീവ ഗുരുതര സാഹചര്യമായാണ് ഓഖി ദുരന്തത്തെ കേന്ദ്രസര്‍ക്കാര്‍ കാണുന്നതെന്ന് അദ്ദേഹം വ്യക്തമാക്കി. ദുരന്തത്തില്‍ ഇതുവരെ കേരളത്തില്‍ 74 പേര്‍ മരിക്കുകയും 215 പേരെ കാണാതാവുകയും ചെയ്തിട്ടുണ്ടെന്ന് മന്ത്രി പറഞ്ഞു.

രാവിലെ ലോക്‌സഭയില്‍ നടന്ന ചര്‍ച്ചയില്‍ സംസ്ഥാനസര്‍ക്കാരിനെതിരെ കേന്ദ്രമന്ത്രി അനന്ത് കുമാര്‍ വിമര്‍ശനം ഉയര്‍ത്തിയിരുന്നു. ഓഖി ചുഴലിക്കാറ്റ് സംബന്ധിച്ച കേന്ദ്രമുന്നറിയിപ്പ് കേരള സര്‍ക്കാര്‍ ഗൗരവത്തോടെ എടുത്തില്ലെന്ന് അനന്ത് കുമാര്‍ കുറ്റപ്പെടുത്തി. ദുരന്തത്തില്‍ നഷ്ടപ്പെട്ടവര്‍ക്ക് നഷ്ടപരിഹാരവും പുന:രധിവാസ പാക്കേജും ഉള്‍പ്പെടെ നല്‍കുന്നത് സംബന്ധിച്ചകാര്യങ്ങള്‍ സര്‍ക്കാര്‍ പരിഗണിക്കുകയാണെന്നും മന്ത്രി വ്യക്തമാക്കി.