ശ്രീജീവിന്റെ കസ്റ്റഡി മരണം സി.ബി.ഐ അന്വേഷിക്കണമെന്നാവശ്യപ്പെട്ട് സെക്രട്ടേറിയറ്റിന് മുന്നില്‍ സഹോദരന്‍ ശ്രീജിത്ത് നടത്തുന്ന സമരം ചൊവ്വാഴ്ച മുതല്‍ അനിശ്ചിതകാല നിരാഹാരത്തിലേക്ക്. വെള്ളിയാഴ്ച മുതല്‍ അനിശ്ചിതകാല നിരാഹാര സമരത്തിലേക്ക് കടക്കുമെന്ന് നേരത്തേ അറിയിച്ചിരുന്നെങ്കിലും സി.ബി.ഐ അന്വേഷണം സംബന്ധിച്ച് എന്തെങ്കിലും അറിയിപ്പ് കിട്ടുമെന്ന പ്രതീക്ഷയിലാണ് നീട്ടിയത്.

സി.ബി.ഐ കേസ് ഏറ്റെടുത്തുവെന്ന് പറഞ്ഞതല്ലാതെ ഇതുവരെ ഒരറിയിപ്പും കിട്ടിയില്ലെന്നാണ് ശ്രീജിത്ത് പറയുന്നത്. തിങ്കളാഴ്ച കൂടി നോക്കിയശേഷം ചൊവ്വാഴ്ച മുതല്‍ നിരാഹാരത്തിലേക്ക് കടക്കാനാണ് തീരുമാനം. ഇതിനിടെ സെക്രട്ടേറിയറ്റിന് മുന്നിലെ സമരം 779ാം ദിവസത്തിലേക്ക് കടന്നു. സി.ബി.ഐ അന്വേഷണം തുടങ്ങിയതായി വിവരം കിട്ടിയതല്ലാതെ തുടര്‍നടപടികള്‍ ഒന്നുംതന്നെ ഉണ്ടായിട്ടില്ല. മൊഴിയെടുക്കാന്‍ വിളിച്ചിട്ടില്ല. അധികൃതരുടെ അനാസ്ഥയില്‍ പ്രതിഷേധിച്ചും കുറ്റക്കാര്‍ക്കെതിരെ &ിയുെ;നടപടി ആവശ്യപ്പെട്ടുമാണ് അനിശ്ചിതകാല നിരാഹാരസമരം ആരംഭിക്കുന്നത്. നേരത്തേ സി.ബി.ഐ കേസ് ഏറ്റെടുത്ത് എഫ്.ഐ.ആര്‍ രജിസ്റ്റര്‍ ചെയ്തിരുന്നു.

സമൂഹമാധ്യമ കൂട്ടായ്മ പിന്മാറിയെങ്കിലും ശക്തമായി സമരം മുന്നോട്ട് കൊണ്ടുപോകാനാണ് ശ്രീജിത്തിന്റെ തീരുമാനം. എന്നാല്‍, കേസ് ഏറ്റെടുത്ത സി.ബി.ഐ തുടര്‍ നടപടികള്‍ക്കുശേഷം ശ്രീജിത്തിന്റെ മൊഴി രേഖപ്പെടുത്തുമെന്നാണ് അറിയുന്നത്. സി.ബി.ഐയുടെ തിരുവനന്തപുരം യൂനിറ്റിനാണ് അന്വേഷണ ചുമതല.