കലാമണ്ഡലം ഗീതാനന്ദന് അന്തരിച്ചു; തുള്ളല് കലയെ ജനകീയമാക്കിയ കലാകാരന്; അവിട്ടത്തൂര് ശ്രീമഹാദേവ ക്ഷേത്രത്തില് തുള്ളല് അവതിപ്പിച്ചു കൊണ്ടിരിക്കെയാണ് കുഴഞ്ഞു വീണത്; 32 സിനിമകളില് വലുതും ചെറുതുമായ വേഷങ്ങളില് അഭിനയിച്ചു
തുള്ളല് കലയെ ജനകീയമാക്കിയ കലാകാരന് കലാമണ്ഡലം ഗീതാനന്ദന് (58) അന്തരിച്ചു. അവിട്ടത്തൂര് ശ്രീമഹാദേവ ക്ഷേത്രത്തില് തുള്ളല് അവതിപ്പിച്ചു കൊണ്ടിരിക്കെ കുഴഞ്ഞു വീഴുകയായിരുന്നു. ഉടന് തന്നെ ആശുപത്രിയിലെത്തിച്ചുവെങ്കിലും രക്ഷപ്പെടുത്താനായില്ല. എട്ടാമത്തെ വയസില് പിതാവില് നിന്നാണ് തുള്ളല്കച്ച സ്വീകരിച്ചത്. ചിലങ്കയണിഞ്ഞ്, കിരീടം വെച്ച് 1969ല് ആ മക്കാവ് ദേവീക്ഷേത്ര തിരുമുറ്റത്തായിരുന്നു അരങ്ങേറ്റം.
പിന്നീടങ്ങോട്ട് തിരിഞ്ഞ് നോക്കേണ്ടി വന്നിട്ടില്ല. പാരീസ്, മസ്ക്കറ്റ്, ഖത്തര്, യു.എ.ഇ (ദുബായ്, അബുദാബി, ഷാര്ജ, അലൈന്, റാസല്ഖൈമ), ബഹറിന് എന്നീ വിദേശ രാജ്യങ്ങളിലും 5000ത്തിലധികം സ്വദേശ വേദികളിലും തുള്ളല് അവതരിപ്പിച്ചിട്ടുണ്ട്. കേരള സംഗീത നാടക അക്കാദമി അവാര്ഡുള്പടെ 12 ഓളം പ്രശസ്ത അവാര്ഡുകള് കരസ്ഥമാക്കി. കലാമണ്ഡലം തുള്ളല് വിഭാഗം മേധാവി പദവിയില് നിന്നും 2017 മാര്ച്ചിലാണ് വിരമിച്ചത്.
അഭിനേതാവ് എന്നതിനേക്കാള് പ്രശസ്തനായ തുള്ളല് കലാകാരന് എന്ന് കലാലോകം തിരിച്ചറിയുന്ന വ്യക്തി. അച്ഛനും ഗുരുവുമായ മഠത്തില് പുഷ്പവത്ത് കേശവന് നമ്പീശന് പ്രശസ്തനായ തുള്ളല് കലാകാരനായിരുന്നു. തുള്ളല് കലയില് നിന്ന് ദാരിദ്ര്യം മാത്രം സമ്പാദ്യമായുണ്ടായിരുന്ന കേശവന് നമ്പീശന്, മകനെ തുള്ളല് പഠിപ്പിക്കുവാന് ആദ്യം വിസമ്മതിച്ചു, പക്ഷേ ഗീതാനന്ദന്റെ വാശിയില് അച്ഛന് തന്നെ തുള്ളലിന്റെ ആദ്യ പാഠങ്ങള് ഗീതാനന്ദനു പറഞ്ഞു കൊടുത്തു. അമ്പലത്തില് കഴകം ജോലി ചെയ്തിരുന്ന അദ്ദേഹത്തെ അച്ഛനാണ് 1974ല് കലാമണ്ഡലത്തില് ചേര്ത്തത്.
1983 മുതല് കലാമണ്ഡലത്തില് അധ്യാപകനായി ജോലിക്കു ചേര്ന്നു. തുള്ളലിനെ പ്രോത്സാഹിപ്പിക്കുവാനും പ്രചരിപ്പിക്കുവാനും വേണ്ടി കലോത്സവ വേദികളിലെ നിരന്തര സാന്നിധ്യമായി മാറിയ വ്യക്തിയാണ് അദ്ദേഹം. അദ്ദേഹത്തിന്റെ ശിഷ്യന്മാര് തുള്ളല് അവതരിപ്പിക്കാതെ കടന്നു പോകുന്ന ഒരു സംസ്ഥാന കലോത്സവവും ഇല്ല എന്ന് തന്നെ പറയാം. കമലദളം എന്ന ചിത്രത്തിലൂടെ സിനിമയിലേക്കെത്തി. 'തൂവല് കൊട്ടാരം', 'മനസ്സിനക്കരെ', 'നരേന്ദ്രന് മകന് ജയകാന്തന് വക' തുടങ്ങി നിരവധി 32 സിനിമകളില് വലുതും ചെറുതുമായ വേഷങ്ങളില് അദ്ദേഹം അഭിനയിച്ചു. ഇത് വരെ രാജ്യത്തിനകത്തും പുറത്തുമായി 5000ത്തിലധികം തുള്ളല് വേദികള് പൂര്ത്തിയാക്കിയ അദ്ദേഹത്തിന്റെ ജീവിതം തുള്ളല് എന്ന കലയ്ക്കായി ഉഴിഞ്ഞു വച്ചതാണ്.
ഭാര്യ: ശോഭ ഗീതാനന്ദന്, മക്കള് സനല് കുമാര്, ശ്രീലക്ഷ്മി. പ്രശസ്തനായ കഥകളിയാചാര്യന് നീലകണ്ഠന് നമ്പീശന് അമ്മാവനാണ്, ജ്യേഷ്ഠന് കലാമണ്ഡലം വാസുദേവന് പ്രശസ്തനായ മൃദംഗം വിദ്വാന്.
https://www.facebook.com/Malayalivartha
