കെ.പി.സി.സി പ്രസിഡന്റ് സ്ഥാനത്തേക്കുള്ള നോമിനിയെ ചൊല്ലി സാധാരണ എ, ഐ ഗ്രൂപ്പ് പോരാണ് നടന്നിരുന്നതെങ്കില്‍ ഇത്തവണ ഗ്രൂപ്പുകള്‍ക്കുള്ളിലാണ് പടലപ്പിണക്കം. എ ഗ്രൂപ്പിന്റെ കാരണവരായ ഉമ്മന്‍ചാണ്ടി പ്രസിഡന്റ് സ്ഥാനത്തേക്ക് തന്റെ വലംകൈയായ പി.സി വിഷ്ണുനാഥിന്റെ പേര് മുന്നോട്ട് വച്ചതോടെ ഇടംകയ്യനായ ബെന്നിബഹാന്‍ ഇടഞ്ഞു. അങ്ങനെ ആകെ മൊത്തം അലമ്പായിരിക്കുകയാണ്. ചെങ്ങന്നൂരില്‍ പി.സി വിഷ്ണുനാഥിന് മല്‍സരിക്കാനാവാത്ത സാഹചര്യവും യുവാക്കള്‍ അധ്യക്ഷ സ്ഥാനത്തേക്ക് വരണമെന്ന രാഹുല്‍ഗാന്ധിയുടെ നിര്‍ദ്ദേശവും പരിഗണിച്ചാണ് ഉമ്മന്‍ചാണ്ടി പി.സിയെ കളത്തിലിറക്കിയത്. കഴിഞ്ഞ നിയമസഭാ തെരഞ്ഞെടുപ്പില്‍ ഉമ്മന്‍ചാണ്ടിക്ക് വേണ്ടി ബലിയാടായ ആളാണ് താനെന്നും തന്നെ അധ്യക്ഷനാക്കണമെന്നും ബെന്നിബഹാന്‍ ആവശ്യപ്പെട്ടിട്ടുണ്ട്. ഇക്കാര്യത്തില്‍ ഇതുവരെ സമവായത്തിലെത്തിയിട്ടില്ല.

ചെങ്ങന്നൂര്‍ ഉപതെരഞ്ഞെടുപ്പ് തീരുന്നത് വരെ എം.എം ഹസനെ അധ്യക്ഷസ്ഥാനത്ത് നിലനിര്‍ത്തണമെന്ന് ചെന്നിത്തലയും ഉമ്മന്‍ചാണ്ടിയും രാഹുല്‍ഗാന്ധിയോട് ആവശ്യപ്പെട്ടിട്ടുണ്ട്. അതിനാല്‍ തല്‍ക്കാലം തല്‍സ്ഥിതി തുടരാനാണ് സാധ്യത. വിശാല ഐ ഗ്രൂപ്പില്‍ നിന്നും ബിന്ദുകൃഷ്ണ , വി.ഡി സതീശന്‍ എന്നിവരും മുതിര്‍ന്ന നേതാക്കളായ കെ. സുധാകരന്‍, കെ.മുരളീധരന്‍, എ. ഐ.സി.സി ജനറല്‍ സെക്രട്ടറി കെ.സി വേണുഗോപാല്‍ എന്നിവരും എ.ഐ.സി.സിയുടെ പരിഗണനയിലുണ്ട്. വി.എം സുധീരന്റെ നോമിനികളെ ഒഴിവാക്കണമെന്ന് കേരളത്തില്‍ നിന്നുള്ള ഭൂരിപക്ഷം നേതാക്കളും ആവശ്യപ്പെട്ടെങ്കിലും എ.കെ ആന്റണി അത് അംഗീകരിച്ചിട്ടില്ല.

ചെന്നിത്തലയും ഉമ്മന്‍ചാണ്ടിയും കൂടി വി.എം സുധീരനെ പുകച്ച് പുറത്ത് ചാടിച്ചപ്പോള്‍ ബെന്നി ബഹനാനെ കൊണ്ടുവരാന്‍ ഉമ്മന്‍ചാണ്ടി ശ്രമിച്ചിരുന്നു. എന്നാല്‍ മറ്റുള്ളവരുടെ സമ്മര്‍ദ്ദത്തിന് വഴങ്ങി ഹസന്റെ പേര് മുന്നോട്ട് വയ്ക്കുകയായിരുന്നു. ചെന്നിത്തല അതിനെ പിന്തുണയ്ക്കുകയും ചെയ്തതോടെ ബെന്നിയുടെ സ്വപ്‌നങ്ങള്‍ കെട്ടടങ്ങി. സോളാര്‍ കേസില്‍ ഉമ്മന്‍ചാണ്ടിയെ സഹായിക്കാന്‍ പോയതിനാലാണ് താന്‍ കുഴിയില്‍ വീണതെന്ന് ബെന്നി ആരോപിക്കുന്നു. രണ്ടാംവട്ടവും തഴയുമെന്ന് അറിഞ്ഞതോടെ ബെന്നി ഇടഞ്ഞ് നില്‍ക്കുകയാണ്. ഗ്രൂപ്പ് നേതാക്കള്‍ക്കിടയില്‍ വിഷ്ണുനാഥിനേക്കാള്‍ പിന്തുണ ബെന്നിക്കാണ്. അങ്ങനെയൊരു പൊതുവികാരം ഉയര്‍ന്നിട്ടുമുണ്ട്. 

എ, ഐ ഗ്രൂപ്പുകളെ വെട്ടിലാക്കാന്‍ കെ.മുരളീധരനും കെ.സുധാകരനും അടക്കമുള്ളവര്‍ രംഗത്തുണ്ട്. നിലവിലെ രാഷ്ട്രീയ സാഹചര്യത്തില്‍ ഇവരിലാരെങ്കിലും അധ്യക്ഷസ്ഥാനത്തെത്തിയാല്‍ അത് പാര്‍ട്ടിക്ക് ഗുണമാകുമെന്ന് ഹൈക്കമാന്‍ഡ് വിലയിരുത്തുന്നു. എ.കെ ആന്റണിക്കും ഇക്കാര്യത്തില്‍ അഭിപ്രായവ്യത്യാസമില്ല. മുരളീധരനെ എതിര്‍ക്കാന്‍ ഉമ്മന്‍ചാണ്ടി തയ്യാറാകത്തില്ല. അറുപത് കഴിഞ്ഞ ആരെയും അധ്യക്ഷസ്ഥാനത്ത് പ്രതിഷ്ഠിക്കണ്ടെന്നാണ് കോണ്‍ഗ്രസ് അധ്യക്ഷന്‍ രാഹുലിന്റെ തീരുമാനം. മൂന്ന് പേരുടെ ചുരുക്ക പട്ടിത തരാനാണ് ഇന്നത്തെ ചര്‍ച്ചയില്‍ രാഹുല്‍ ഗാന്ധി ചെന്നിത്തലയോടും ഉമ്മന്‍ചാണ്ടിയോടും ആവശ്യപ്പെട്ടത്. അതിനാല്‍ എന്ത് സംഭവിക്കുമെന്ന് കാത്തിരുന്ന് കാണാം