പ്രണയവിവാഹത്തിന്റെ പേരില്‍ തട്ടിക്കൊണ്ടുപോയി കെവിന്‍ കൊല്ലപ്പെട്ട സംഭവത്തില്‍ മൂന്ന് പേര്‍ കൂടി പിടിയില്‍. കെവിനെ തട്ടിക്കൊണ്ടുപോയ സംഘത്തിലുണ്ടായിരുന്ന കൊല്ലം ഇടമണ്‍ സ്വദേശികളായ ഷാനു, ഷിനു, വിഷ്ണു എന്നിവരെയാണ് കോയമ്പത്തൂരില്‍നിന്ന് കൊല്ലം പോലീസ് അറസ്റ്റ് ചെയ്തത്. ഇതോടെ കേസുമായി ബന്ധപ്പെട്ട് അറസ്റ്റിലായവരുടെ എണ്ണം 12 ആയി. 

കൊല്ലം തെന്മല ഒറ്റക്കല്‍ ഷാനു ഭവനില്‍ ഷാനു ചാക്കോയാണ് കേസില്‍ ഒന്നാം പ്രതി. ഷാനുവിന്റെ പിതാവ് ചാക്കോ ജോണ്‍, പുനലൂര്‍ സ്വദേശി മനു മുരളീധരന്‍, നിയാസ് മോന്‍, ഇബ്രാഹിം റിയാസ്, ഇഷാന്‍, ഇര്‍ഷാദ്, ഷെഫിന്‍, ടിന്റോ ജെറോം എന്നിവരെ നേരത്തെ പോലീസ് അറസ്റ്റ് ചെയ്തിരുന്നു. വധക്കേസില്‍ അറസ്റ്റിലായവരില്‍നിന്നു കൈക്കൂലി വാങ്ങിയ പോലീസ് ഉദ്യോഗസ്ഥരെയും അന്വേഷണസംഘം അറസ്റ്റ് ചെയ്തിരുന്നു. സസ്‌പെന്‍ഷനിലായ ഗാന്ധിനഗര്‍ എഎസ്‌ഐ ടി.എം. ബിജു, െ്രെഡവര്‍ അജയകുമാര്‍ എന്നിവരെയാണ് അറസ്റ്റ് ചെയ്തത്. 

അതേ സമയം കെവിന്റെ അന്തിമ പോസ്റ്റ്‌മോര്‍ട്ടം റിപ്പോര്‍ട്ട് വൈകുന്നത് അന്വേഷണ സംഘത്തെ കുഴക്കുന്നുണ്ട്. കെവിന്‍ കാറില്‍നിന്ന് ചാടിപ്പോയതാണെന്ന മൊഴിയില്‍ പ്രതികള്‍ ഉറച്ചുനില്‍ക്കുകയാണ്, ഒറ്റക്കും കൂട്ടായും ചോദ്യം ചെയ്തിട്ടും മൊഴിയില്‍ മാറ്റം വരുത്തിയിട്ടുമില്ല. ഇത് ആസൂത്രിതമാണോയെന്ന സംശയം പ്രകടിപ്പിക്കുമ്പൊഴും അതേ നിഗമനമാണ് പൊലീസും പങ്കുവെക്കുന്നത്. തട്ടിക്കൊണ്ടുപോയശേഷം വിട്ടയച്ച അനീഷിന്റെ എഫ്.ഐ.ആറിലെ മൊഴിയും പ്രതികളുടെ മൊഴിയും തമ്മില്‍ വൈരുദ്ധ്യമൊന്നും കണ്ടെത്താനായിട്ടില്ലെന്നാണ് അന്വേഷണസംഘം തലവന്‍ ഐ.ജി വിജയ് സാഖറെ പറയുന്നത്. ചാടിപ്പോയെന്ന നിഗമനം അദ്ദേഹം ആവര്‍ത്തിക്കുന്നുമുണ്ട്. എന്നാല്‍, പിന്നീട് എന്തുസംഭവിച്ചെന്ന് വ്യക്തമാക്കാന്‍ കഴിയുന്നില്ല. റിമാന്‍ഡ് റിപ്പോര്‍ട്ടില്‍ കെവിനെ പുഴയിലേക്ക് ഓടിച്ചിറക്കുകയാണെന്ന് പറയുന്നുണ്ടെങ്കിലും മരണകാരണത്തെക്കുറിച്ച് വ്യക്തമായ സൂചനകളില്ല.

സംഭവം നടന്ന ദിവസം നല്‍കിയ മൊഴിക്കുശേഷം അനീഷ് മറ്റ് പല സംഭവങ്ങളും മാധ്യമങ്ങളോട് വെളിപ്പെടുത്തിയിരുന്നു. അതൊന്നും പൊലീസ് രേഖകളില്ല. മര്‍ദനമേറ്റ് തളര്‍ന്നതിനാലും അക്രമത്തിന്റെ ഭീതി വിട്ടുമാറാത്തതിനാലും അന്നത്തെ മൊഴി പൂര്‍ണമല്ലെന്ന വിലയിരുത്തലുകളുമുണ്ട്. എന്നാല്‍, ഇതേക്കുറിച്ച് കൂടുതല്‍ വിവരങ്ങള്‍ തേടാനോ അനീഷിന്റെ മൊഴി വീണ്ടും രേഖപ്പെടുത്താനോ പൊലീസ് തയാറായിട്ടില്ല. പകരം അനീഷിന്റെ മൊഴിയും പ്രതികളുടെ മൊഴിയും സാമ്യമുണ്ടെന്ന് ആവര്‍ത്തിക്കുകയാണ് പൊലീസ്. അനീഷ് പിന്നീട് പറഞ്ഞ കാര്യങ്ങള്‍ പലതും തള്ളിക്കളയുകയും ചെയ്തു. സത്യം കണ്ടെത്തുമെന്നും അന്വേഷണം പുരോഗമിക്കുന്നുവെന്നുമാണ് ഇതേക്കുറിച്ച് ഐ.ജിയുടെ പ്രതികരണം. കെവിന്‍ മുങ്ങിമരിച്ചതാണെന്നാണ് പോസ്റ്റ്‌മോര്‍ട്ടം റിപ്പോര്‍ട്ടിലെ പ്രഥമിക നിഗമനം. വെള്ളത്തില്‍ മുക്കി കൊന്നതാണോ, സ്വയം വീണപ്പോള്‍ മുങ്ങി മരിച്ചതാണോ എന്ന കാര്യത്തില്‍ വ്യക്തത വരുത്താനായിട്ടില്ല. മര്‍ദനമേറ്റ് ബോധം മറഞ്ഞ കെവിനെ പുഴയില്‍ വലിച്ചെറിഞ്ഞതായിരിക്കുമോയെന്ന സംശയവുമുണ്ട്. ഇതടക്കമുള്ളവ സ്ഥിരികരിക്കണമെങ്കില്‍ അന്തിമ പോസ്റ്റ്‌മോര്‍ട്ടം റിപ്പോര്‍ട്ട് ലഭിക്കണം.

അതിനിടെ, അറസ്റ്റിലായ ഗാന്ധിനഗര്‍ എ.എസ്.ഐ ബിജു, ൈഡ്രവര്‍ അജയകുമാര്‍ എന്നിവരുടെ ജാമ്യാപേക്ഷ കോടതി തള്ളി. ഇരുവരെയും കസ്റ്റഡിയില്‍ വാങ്ങാന്‍ ശനിയാഴ്ച കോടതിയില്‍ അപേക്ഷ നല്‍കുമെന്ന് ജില്ല പൊലീസ് മേധാവി ഹരിശങ്കര്‍ പറഞ്ഞു. കസ്റ്റഡിയിലുള്ള പ്രതികളുടെ ചോദ്യം ചെയ്യല്‍ ശനിയാഴ്ച പൂര്‍ത്തിയാകുമെന്നും എസ്.പി പറഞ്ഞു.