ഉമ്മന്‍ചാണ്ടിക്കെതിരെ മുന്‍ കെ.പി.സി.സി പ്രസിഡന്റ് വാര്‍ത്താസമ്മേളനത്തില്‍ അക്കമിട്ട് ആരോപണങ്ങള്‍ ഉന്നയിച്ചതിന്റെ പകരം വീട്ടാന്‍ എ ഗ്രൂപ്പ് ഒളിപ്പോര് തുടങ്ങി. ഇതിന്റെ ഭാഗമായി തലസ്ഥാനത്ത് എ ഗ്രൂപ്പ് നേതാക്കളുടെ രഹസ്യ യോഗം ചേര്‍ന്നു. എ.ഐ.സി.സി സെക്രട്ടറി വിഷ്ണുനാഥിന്റെ നേതൃത്വത്തിലായിരുന്നു യോഗം. ഷാഫി പറമ്പില്‍ എം.എല്‍.എയുടെ എം.എല്‍.എ ഹോസ്റ്റലിലെ റൂമിലായിരുന്നു യോഗം.(പമ്പാ ബ്ലോക്ക് 404). യോഗത്തില്‍ കെ.സി ജോസഫ്, ബെന്നി ബഹാന്‍, സിദ്ദിഖ്, കെ.എം.അഭിജിത്ത്, ഷാഫി പറമ്പില്‍ തുടങ്ങി യൂത്ത് കോണ്‍ഗ്രസ്, കെ.എസ്.യു നേതാക്കള്‍ പങ്കെടുത്തു. രാജ്യ സീറ്റ് വിവാദത്തില്‍ ഉമ്മന്‍ ചാണ്ടിയെ കടന്നാക്രമിച്ച വി.എം.സുധീരന്‍, പി.ജെ.കുര്യന്‍ എന്നിവര്‍ക്കെതിരെ എ ഗ്രൂപ്പ് നേതാക്കളെ അണിനിരത്തുകയായിരുന്നു യോഗ ലക്ഷ്യം.

ഉമ്മന്‍ചാണ്ടിയെ എ.ഐ.സി.സി സെക്രട്ടറിയാക്കി തലസ്ഥാനത്ത് നിന്ന് കെട്ട് കെട്ടിച്ചതിന് പിന്നില്‍ ഗൂഢലക്ഷ്യമുണ്ടെന്നാണ് ഗ്രൂപ്പ് വിലയിരുത്തുന്നത്. രാജ്യസഭാ സീറ്റ് വിവാദത്തില്‍ ഉമ്മന്‍ചാണ്ടിയെ രക്ഷിക്കുന്നതിന്റെ ഭാഗമായി തിരുവഞ്ചൂര്‍ രാധാകൃഷ്ണന്‍ ഇന്നലെ രംഗത്തെത്തിയിരുന്നു. രാജ്യസഭാ സീറ്റ് കേരളാകോണ്‍ഗ്രസിന് നല്‍കിയതിന് പിന്നില്‍ കോണ്‍ഗ്രസ് പ്രവര്‍ത്തകസമിതി അംഗം എ.കെ ആന്റണിയാണെന്ന പരോക്ഷ പരാമര്‍ശമാണ് തിരുവഞ്ചൂര്‍ നടത്തിയത്. പി.ജെ കുര്യനും സുധീരനും ഉമ്മന്‍ചാണ്ടിക്കെതിരെ നടത്തിയ രൂക്ഷവിമര്‍ശനങ്ങളെ രാഷ്ട്രീയമായി എങ്ങനെ നേരിടണമെന്ന് യോഗം ചര്‍ച്ച ചെയ്തു. അടുത്ത പാര്‍ലമെന്റ് തെരഞ്ഞെടുപ്പില്‍ പി.ജെ കുര്യന് സീറ്റ് നല്‍കാതിരിക്കാന്‍ ശ്രമിക്കണമെന്ന് യൂത്ത് കോണ്‍ഗ്രസ് നേതാക്കള്‍ ആവശ്യപ്പെട്ടു. ഹൈക്കമാന്‍ഡിനെ സ്വാധീനിച്ച് സീറ്റ് തരപ്പെടുത്തിയാല്‍ തോല്‍പ്പിക്കണമെന്നും അഭിപ്രായം ഉയര്‍ന്നു. 

ആന്റോ ആന്റണിയുടെ മണ്ഡലമായ പത്തനംതിട്ട യാതൊരു കാരണവശാലും വിട്ട് കൊടുക്കരുതെന്നും നിര്‍ദ്ദേശിച്ചു. അതേസമയം രാജ്യസഭാ ഡെപ്യൂട്ടി ചെയര്‍മാനായി പി.ജെ കുര്യന്‍ വീണ്ടും വരാനുള്ള നീക്കം ഡല്‍ഹി വഴി നടക്കുന്നുണ്ടെന്നും അതിന് തടയിടണമെന്നും ആവശ്യം ഉയര്‍ന്നു. ആന്ധ്രയുടെ ചുമതലയുണ്ടെങ്കിലും സംസ്ഥാനത്തെ കാര്യങ്ങളില്‍ ഉമ്മന്‍ചാണ്ടി സജീവമാകണമെന്നും അടുത്തനിയമസഭാ തെരഞ്ഞെടുപ്പ് ലക്ഷ്യം കണ്ട് ഗ്രൂപ്പ് പ്രവര്‍ത്തിക്കണമെന്നും യോഗം അഭിപ്രായപ്പെട്ടു.