ഹൈക്കോടതിയില് മാത്രമല്ല, സെക്രട്ടേറിയറ്റ് ഉള്പ്പെടെയുള്ള ഓഫീസുകളില് ഫയല് മോഷണം തുടര്ക്കഥ,എടുത്തു മാറ്റുന്നത് ഒരു 'ചുമ്മാ സേവന'മാണെന്ന് ചിന്തിക്കരുത്, ഫയലിന്റെ പ്രാധാന്യമനുസരിച്ച് നോട്ടുകെട്ടുകളുടെ കനവും വര്ധിക്കും
കേരള ഹൈക്കോടതിയില് നിന്നു മാത്രമല്ല സെക്രട്ടേറിയറ്റ് ഉള്പ്പെടെയുള്ള സംസ്ഥാനത്തെ പ്രധാന ഓഫീസുകളില് നിന്നും ഫയലുകള് കാണാതാകുന്നത് തുടര്ക്കഥ.
പ്രമാദമായ ഫയലുകളാണ് പലപ്പോഴും കാണാതാകുന്നത്. ഒരിക്കല് പോയാല് പിന്നെ തിരിച്ചു കിട്ടാറില്ല. ഫയല് മോഷണം ഹൈക്കോടതിയിലായതു കൊണ്ട് മാത്രമാണ് പുറം ലോകം അറിഞ്ഞത്. സെക്രട്ടേറിയറ്റിലോ മറ്റോ ആയിരുന്നെങ്കില് ഇരുചെവി അറിയില്ലായിരുന്നു. ഹൈക്കോടതിയില് നിന്നും കാണാതായത് അന്പതിലധികം നിര്ണായക രേഖകളാണെന്നാണ് കണ്ടെത്തിയിരിക്കുന്നത്.
മലബാര് സിമന്റ്സിലെ അഴിമതി കോടികളുടേതാണ്. കമ്പനിയുടെ നിയമോപദേശകന്റെയും മക്കളുടെയും ദുരൂഹമായ തൂങ്ങി മരണത്തിന് ഇന്നും തുമ്പുണ്ടാക്കാന് കഴിഞ്ഞിട്ടില്ല. ആരോപണം ഉന്നയിച്ച മറ്റൊരാള് കോയമ്പത്തൂരിലെ ഉക്കടം ബസ് സ്റ്റാന്റില് വാഹനം ഇടിച്ച് മരിച്ചതും എങ്ങനെയാണെന്ന് കണ്ടെത്തിയിട്ടില്ല. അതായത് മനുഷ്യരെ പട്ടികളെ പോലെ കൊല്ലാന് കഴിയുന്നവരാണ് സിമന്റ്സിലെ ആരോപണ വിധേയര്. അവര്ക്ക് ഹൈക്കോടതിയിലെ ഫയല് ഒരു വിഷയമാകാത്തത് സ്വാഭാവികം മാത്രം.
അന്തര് സംസ്ഥാന നദീജല കരാറുമായി ബന്ധപ്പെട്ട ഒരു ഫയല് സെക്രട്ടേറിയറ്റില് നിന്നും കാണാതായത് വലിയ വാര്ത്തയായിരുന്നു. തമിഴ്നാട് സര്ക്കാര് കേരളത്തില് നിയമിച്ചിരിക്കുന്ന ഒരു ഉദ്യോഗസ്ഥനെതിരെ ആരോപണവും ഉയര്ന്നിരുന്നു.എന്നാല് പിന്നീടൊന്നും സംഭവിച്ചില്ല. ഒരിക്കലും ഒരാളുടെ കസ്റ്റഡിയിലുള്ള ഫയല് കാണാതെ പോകില്ല. അത് തീര്ച്ചയായും താത്പര്യമുള്ളവര് എടുത്തു മാറ്റുന്നതായിരിക്കും. അത്തരത്തില് എടുത്തു മാറ്റുന്നത് ഒരു 'ചുമ്മാ സേവന'മാണെന്ന് ചിന്തിക്കരുത്. ഫയലിന്റെ പ്രാധാന്യമനുസരിച്ച് നോട്ടുകെട്ടുകളുടെ കനവും വര്ധിക്കും. പലപ്പോഴും ഓഫീസുകളിലെ കീഴ്ജീവനക്കാരെയായിരിക്കും ഇത്തരം കൃത്യങ്ങള്ക്ക് ഉപയോഗിക്കുക. എന്നാല് ഇത്തരം പ്രവര്ത്തനങ്ങള് ഹൈകോടതിയിലും നടക്കുന്നു എന്നത് മനസിലാക്കുമ്പോഴാണ് വേലി തിന്നുന്ന വിളവിന്റെ വ്യാപ്തി മനസിലാക്കാന് കഴിയുക.
സര്ക്കാര് ഓഫീസുകളില് ആധുനിക സാങ്കേതിക വിദ്യയുടെ ആവിര്ഭാവത്തോടെ ഉണ്ടായ മറ്റൊരു മാറ്റമാണ് വാട്ട്സ്ആപ്പിലൂടെയുള്ള ഫയല് കൈമാറ്റാം. അതാണ് ഉദ്യോഗസ്ഥരെ സംബന്ധിച്ചിടത്തോളം കൂടുതല് സുരക്ഷിതത്വം. വാട്ട്സ്ആപ്പില് നിന്നും ഇ-മെയിലിലേക്കയക്കും. മെയിലില് നിന്നും പ്രിന്റെടുക്കാം. ഫയലുകളുടെ ഒറിജിനല് കാണാതെ പോകുന്നു എന്ന പരാതിയും ഇതുവഴി ഒഴിവാക്കാം.
ഹൈക്കോടതിയില് നിന്നും ഫയല് കാണാതെ പോയ സംഭവം തേഞ്ഞു മാഞ്ഞു പോയാല് അഴിമതിരേഖകള് കാണാതാകുന്നത് തുടര്ക്കഥയാവും. സംസ്ഥാനത്തെ വിജിലന്സ് ഓഫീസുകളില് നിലവിലുള്ള ഫയലുകള് പരിശോധിക്കുമ്പോഴറിയാം ബാക്കി വിവരങ്ങള്. സി സി റ്റി വി ദൃശ്യങ്ങള് പരിശോധിക്കാനാണ് ഹൈക്കോടതി ആലോചിക്കുന്നത്. എന്നാല് ഫയല് കൊണ്ടു പോകുന്നവര് അത് സി സി റ്റി വിക്ക് മുന്നിലൂടെയായിരിക്കുകയില്ല. മാത്രവുമല്ല ഹൈക്കോടതിയിലെ സി സി റ്റി വി ദൃശ്യങ്ങള് എത്ര കാലം സൂക്ഷിക്കുമെന്നറിയില്ല.
സര്ക്കാര് ഓഫീസുകളില് നിന്നും ഫയല് കാണാതെ പോകുമ്പോള് പോലീസിനെ അറിയിക്കണമെന്നാണ് നിയമം. എന്നാല് അങ്ങനെയൊരു കാര്യം നടക്കാറില്ല. ഫയല് മോഷണം പോയ വിവരം രഹസ്യമായി സൂക്ഷിക്കും. വിവരാവകാശ അപേക്ഷ വരുമ്പോഴായിരിക്കും പലപ്പോഴും ഫയല് ഇല്ലാത്ത വിവരം പുറം ലോകം അറിയുന്നത്.
https://www.facebook.com/Malayalivartha
