കേരളത്തില്‍ കാലവര്‍ഷം ആരംഭിച്ച മേയ് 29 മുതല്‍ ഇന്നലെ വരെ സംസ്ഥാനത്ത് കെടുതികളില്‍ 56 പേര്‍ മരണപ്പെട്ടു. 255 വീടുകള്‍ പൂര്‍ണ്ണമായും തകര്‍ന്നു. 5566 വീടുകള്‍ ഭാഗികമായി തകര്‍ന്നു. 3534 പൗള്‍ട്രി ഫാമുകള്‍ തകര്‍ന്നു. 4217.91 ഹെക്ടറിലെ കൃഷി നശിച്ചു. 28,700 പേര്‍ ദുരിതാശ്വാസ ക്യാമ്പുകളില്‍ കഴിയുന്നു. 241.42 കിലോമീറ്റര്‍ പഞ്ചായത്ത് റോഡ്‌നശിച്ചു. 450 കിലോമീറ്റര്‍ പി.ഡബ്ല്യൂ.ഡി റോഡ് നശിച്ചു. സംരക്ഷണ ഭിത്തി, കലുങ്ക്, റോഡിനോട് ചേര്‍ന്ന ഓടകള്‍ എല്ലാം കൂടി ചേര്‍ന്ന് 140 എണ്ണം നശിച്ചു. പി.ഡബ്ല്യൂ.ഡി നിര്‍മ്മിതികളുടെ നഷ്ടം 101 കോടി. 11 കെ.വി ട്രാന്‍സ്‌ഫോര്‍മര്‍ 1198 എണ്ണം തകര്‍ന്നു. 1971 ഇലക്ട്രിക് പോസ്റ്റുകള്‍ നശിച്ചു.

മരണമടഞ്ഞവരുടെ ആശ്രിതര്‍ക്ക് നാലു ലക്ഷം രൂപ വീതം നല്‍കാന്‍ സര്‍ക്കാര്‍ തീരുമാനിച്ചു. പൂര്‍ണ്ണമായും തകര്‍ന്നതോ വാസയോഗ്യമല്ലാത്തതോ ആയ ഒരു വീടിന്, ദുരന്തബാധിതര്‍ പുതുതായി വീട് നിര്‍മ്മിക്കും എന്ന വ്യവസ്ഥയോടെ സംസ്ഥാന ദുരന്ത പ്രതികരണ നിധിയില്‍ നിന്നുള്ള വിഹിതവും മുഖ്യമന്ത്രിയുടെ ദുരിതാശ്വാസ നിധിയില്‍ നിന്നുള്ള വിഹിതവും ചേര്‍ത്ത് നാല് ലക്ഷം രൂപയായി ഉയര്‍ത്തി പരിഷ്‌കരിച്ച് നല്‍കും. പൂര്‍ണ്ണമായും സ്ഥലം ഒഴുകിപ്പോയവര്‍ക്ക് വേറെ സ്ഥലം കേരളത്തില്‍ സ്വന്തമായി ഇല്ലെങ്കിലോ, നിലവിലെ സ്ഥലം വീട് വയ്ക്കുന്നതിന് അനുയോജ്യമല്ലെങ്കിലോ സ്ഥലം വാങ്ങുവാനായി ആറ് ലക്ഷം രൂപയോ, പ്രമാണത്തില്‍ ഉള്ള തുകയോ ഏതാണോ കുറവ് അത് അനുവദിക്കാന്‍ തീരുമാനിച്ചു.

ദുരന്തബാധിതര്‍, വീട് തകര്‍ന്ന അതേസ്ഥലത്താണ് വീട് പുനര്‍നിര്‍മ്മിക്കുന്നതെങ്കില്‍ തദ്ദേശസ്ഥാപനം ഒരു ദിവസത്തിനുള്ളില്‍ അനുമതി നല്‍കണമെന്ന് നിര്‍ദ്ദേശിച്ചിട്ടുണ്ട്. ദുരന്തബാധിതര്‍ക്ക് തുക രണ്ട് ഗഡുക്കളായാണ് അനുവദിച്ച് നല്‍കുക. ആദ്യ ഗഡുവായി സംസ്ഥാന ദുരന്ത പ്രതികരണ നിധിയില്‍നിന്നുമുള്ള മുഴുവന്‍ തുകയും തുടര്‍ന്ന്, വീടിന്റെ നിര്‍മ്മാണം 25% പൂര്‍ത്തീകരിച്ചതിനുശേഷം മുഖ്യമന്ത്രിയുടെ ദുരിതാശ്വാസനിധിയില്‍നിന്നും ബാക്കി തുകയും അനുവദിച്ചു നല്‍കും. സംസ്ഥാന ദുരന്ത പ്രതികരണ നിധിയില്‍ നിന്നും 2016 മുതലുള്ള കുടിശ്ശിക തീര്‍ക്കാന്‍ ആവശ്യമായ 12 കോടി രൂപയും, 2016 മുതലുള്ള സംസ്ഥാന സര്‍ക്കാര്‍ ഈ ഇനത്തില്‍ നല്‍കുവാനുണ്ടായിരുന്ന പ്രളയക്കെടുതിയുടെ കുടിശ്ശിക തീര്‍ക്കാന്‍ 44.82 കോടി രൂപയും 2018 ലെ നഷ്ടപരിഹാര ഇനത്തില്‍ 64.19 കോടി രൂപയും ചേര്‍ത്ത് 121.01 കോടി രൂപ അനുവദിക്കാന്‍ തീരുമാനിച്ചിട്ടുണ്ട്.