മലയാളികൾക്ക് ഏറെ സുപരിചിതസമായ സർക്കാർ സംരംഭമായ കെഎസ്എഫ്ഇ അടിമുടി മാറ്റത്തിനൊരുങ്ങുന്നു . ഒരു ആഗോള ബ്രാൻഡായി കെഎസ്എഫ്ഇയെ ഉയർത്താനാണ് സർക്കാർ ലക്ഷ്യമിടുന്നത്. സുവർണ ജൂബിലി വർഷത്തിലേക്ക് കടക്കുന്ന കെഎസ്എഫ്ഇ പ്രവാസിച്ചിട്ടികൾ പോലുള്ള പദ്ധതികളിലൂടെ പ്രവർത്തന രംഗം ആഗോള തലത്തിലേക്ക് മാറ്റാനുള്ള നീക്കത്തിലാണ്. ഇതിന്റെ ഭാഗമായാണ് ലോഗോയിൽ അടക്കം മാറ്റം കൊണ്ട് വന്നത്. ഇക്കഴിഞ്ഞ പതിനെട്ടാം തീയതി പ്രവാസി ചിട്ടിയുടെ ഉദ്‌ഘാടനത്തോട് അനുബന്ധിച്ച്മുഖ്യമന്ത്രി പിണറായി വിജയൻ പുതിയ ലോഗോ പുറത്തിറക്കി.

ലോഗോക്ക് പുറമെ കെഎസ്എഫ്ഇ യുടെ ഓഫീസുകളിലും മാറ്റം വരുത്തും. ഉപഭോക്താക്കൾക്ക് കൂടുതൽ സ്വീകാര്യവും എളുപ്പവുമായ രീതിയിൽ ഓഫീസുകളുടെ രൂപ കല്പനയും മാറും. കെഎസ്എഫ്ഇ യെ ഒരു ആഗോള ബ്രാൻഡായി ഉയർത്തുമ്പോൾ പാലിക്കേണ്ട മാറ്റങ്ങൾ കൂടി പരിഗണിച്ചാണ് ഈ നീക്കം.

പ്രവാസി ചിട്ടികൾക്ക് പുറമെ മറ്റു ചില വായ്പകൾ അടക്കമുള്ള കാര്യങ്ങളും കെഎസ്എഫ്ഇ പദ്ധതിയിടുന്നുണ്ട്. സംസ്ഥാന സർക്കാരിന്റെ ഒരു പ്രധാന വരുമാന സ്ത്രോതസ്സായി കെഎസ്എഫ്ഇയെ മാറ്റുന്ന കാര്യവും പരിഗണിക്കും. ഇത്രയും കാലം കെഎസ്എഫ്ഇ യെ അംഗീകരിച്ച ജനങ്ങൾ ഈ മാറ്റവും അംഗീകരിക്കുമെന്നാണ് സർക്കാരിന്റെ പ്രതീക്ഷ.