എരുമേലിയിലെ ബസ് സ്റ്റാന്‍ഡ് റോഡിലുള്ള സ്വകാര്യ പണമിടപാട് സ്ഥാപനത്തില്‍നിന്ന് നാലരക്കിലോയോളം സ്വര്‍ണം നഷ്ടപ്പെട്ടതായി പരാതി. സ്വര്‍ണത്തിന് പകരം കവറുകളിലുള്ളതാകട്ടെ സാധാരണ നാണയങ്ങള്‍. സംഭവത്തെ തുടര്‍ന്ന് ഓഫീസ് അസിസ്റ്റന്റ് കനകപ്പലം അലങ്കാരത്ത് വീട്ടില്‍ ജെസ്‌ന അജി(30) ക്കെതിരേ പോലീസ് കേസെടുത്തു. കോഴഞ്ചേരി ആസ്ഥാനമായുള്ള മുളമൂട്ടില്‍ ഫൈനാന്‍സിയേഴ്‌സിന്റെ റീജണല്‍ മാനേജര്‍ ബിനോയ് ആണ് വ്യാഴാഴ്ച രാത്രി എട്ടുമണിയോടെ െജസ്‌നക്കെതിരേ എരുമേലി പോലീസില്‍ പരാതി നല്‍കിയത്. െജസ്‌നയെ തേടി വീട്ടിലെത്തിയെങ്കിലും കണ്ടെത്താനായില്ലെന്ന് പോലീസ് പറഞ്ഞു. ഡി.വൈ.എഫ്.ഐ. മേഖലാ സെക്രട്ടറിയുടെ ഭാര്യയാണ് ജെസ്‌ന.

അമ്പതോളം ആളുകളുടെ പണയഉരുപ്പടികളാണ് നഷ്ടപ്പെട്ടത്. 243 പായ്ക്കറ്റുകളിലായി സൂക്ഷിച്ചിരുന്ന 4.493 കിലോ സ്വര്‍ണം വരുമിത്. വിപണിവില 1.40 കോടി രൂപയോളം. പലിശയടയ്ക്കാതെ കാലാവധി കഴിഞ്ഞ പണയഉരുപ്പടികള്‍ ജീവനക്കാരി സ്വന്തമായി പലിശയടച്ച ശേഷം സ്വര്‍ണം മാറ്റി അതേ തൂക്കത്തില്‍ നാണയങ്ങള്‍ വെക്കുകയായിരുന്നുവെന്ന് അന്വേഷണചുമതലയുള്ള പോലീസ് ഇന്‍സ്‌പെക്ടര്‍ ടി.ഡി.സുനില്‍കുമാര്‍ പറഞ്ഞു. തൂക്കം ക്രമീകരിക്കാനായി നാണയങ്ങള്‍ക്കൊപ്പം വ്യാജസ്വര്‍ണവും സ്‌റ്റേപ്പിള്‍ പിന്നുകളും ഉപയോഗിച്ചിരുന്നു.

ഉരുപ്പടികള്‍ സൂക്ഷിച്ച കവറിന്റെ ബാര്‍ കോഡ് ഇളക്കി സ്വര്‍ണം എടുത്തശേഷം നാണയങ്ങളും മറ്റും പകരം വെച്ച് പഴയരീതിയിലാക്കുകയായിരുന്നു. അപഹരിച്ച സ്വര്‍ണം കുറെ വിറ്റതായും ബാക്കി മറ്റു സ്ഥലങ്ങളില്‍ പണയംവെച്ചതായുമാണ് പോലീസിന്റെ നിഗമനം. ജീവനക്കാരിയെ സഹായിക്കാന്‍ പുറമെനിന്നുള്ള രണ്ട് യുവാക്കളുള്ളതായും സൂചനകളുണ്ട്. ഇതുസംബന്ധിച്ചും അന്വേഷണം നടക്കുന്നു. തഹസില്‍ദാര്‍ ജോസ് ജോര്‍ജിന്റെ സാന്നിദ്ധ്യത്തിലാണ് പോലീസ് പണമിടപാട് സ്ഥാപനത്തില്‍നിന്ന് സ്വര്‍ണത്തിന് പകരം നാണയങ്ങള്‍ നിറച്ച പായ്ക്കറ്റുകള്‍ കണ്ടെടുത്തത്.

രണ്ടു വര്‍ഷത്തോളമായി ജെസ്‌ന ഇവിടെ ഓഫീസ് അസിസ്റ്റന്റായി ജോലി ചെയ്യുന്നു. ഇക്കാലയളവില്‍ പല തവണകളായാവും തട്ടിപ്പ് നടന്നതെന്ന് കരുതുന്നു. ഇടപാടുകാരെത്താതെ തന്നെ പലിശത്തുക അടയ്ക്കുന്നതില്‍ പുതിയതായെത്തിയ ജീവനക്കാരിക്ക് സംശയം തോന്നിയതാണ് തട്ടിപ്പ് പുറത്തറിയാന്‍ കാരണമായത്. ഹെഡ് ഓഫീസില്‍ വിവരമറിയിച്ചതിനെ തുടര്‍ന്ന് നടത്തിയ പരിശോധനയില്‍ സ്വര്‍ണഉരുപ്പടികള്‍ക്ക് പകരം നാണയങ്ങള്‍ കണ്ടെത്തി.