കൊച്ചിയിൽ നടി ആക്രമിച്ച കേസിൽ കുറ്റാരോപിതനായ നടൻ ദിലീപിനെ താരസംഘടനയായ അമ്മയിൽ തിരിച്ചെടുത്തതിൽ പ്രതിഷേധം ശക്തം. അമ്മയുടെ പ്രസിഡന്‍റും നടനുമായ മോഹൻലാലിന്‍റെ കൊച്ചിയിലെ വസതിയിലേക്ക് യൂത്ത് കോണ്‍ഗ്രസ് പ്രവർത്തകർ മാർച്ച് നടത്തി. മോഹൻലാലിന്‍റെ കൊച്ചിയിലെ പുതുകാലവട്ടത്തുള്ള ലാലിന്‍റെ ശ്രീഗണേഷ് എന്ന് പേരിട്ട വസതിയിലേക്കാണ് മാർച്ച് നടത്തിയത്.

നടിയെ ആക്രമിച്ച കേസിൽ കുറ്റക്കാർക്കൊപ്പം നിൽക്കുന്ന മോഹൻലാലും അമ്മയുടെ ഭാരവാഹികളായ ഇടത് ജനപ്രതിനിധികളും സാംസ്കാരിക കേരളത്തിന് അപമാനമാണെന്ന് പ്രതിഷേധക്കാർ കുറ്റപ്പെടുത്തി. അമ്മയ്ക്കും താരങ്ങൾക്കും ആദരാഞ്ജലികൾ അർപ്പിച്ചുള്ള ഫ്ലെക്സ് ബോർഡുമായാണ് പ്രതിഷേധക്കാർ എത്തിയത്. ഫ്ലെക്സ് ബോർഡ് മോഹൻലാലിന്‍റെ വീടിന് മുന്നിലെ ഗേറ്റിൽ സ്ഥാപിച്ചു. വീടിന് മുന്നിൽ റീത്ത് വെച്ചു. മാർച്ച് പൊലീസ് തടഞ്ഞതോടെ പ്രവർത്തകർ റോഡിൽ കുത്തിയിരുന്ന് പ്രതിഷേധിച്ചു.