മകളെ പീഡിപ്പിച്ചയാളെ കൊലപ്പെടുത്തി പിതാവിന്റെ പ്രതികാരം. മൃതദേഹത്തിന്റെ ലൈംഗികാവയവത്തിന് തീ കൊളുത്തിയ ശേഷം പോലീസില്‍ നേരിട്ട് കീഴടങ്ങി. വടക്കുകിഴക്കന്‍ ഡല്‍ഹിയിലെ ഖാജുരി ഖാസ് മേഖലയിലാണ് സംഭവം. ഓംകാര്‍ സിംഗ് എന്ന 36 കാരനാണ് കൊലപാതകത്തിനിരയായത്. വധിക്കാന്‍ ഉപയോഗിച്ച ഇരുമ്പ് കമ്പിയുമായി സ്‌റ്റേഷനിലേക്ക് നേരിട്ട് ചെന്ന് കീഴടങ്ങിയ പിതാവ് 14 കാരിയായ മകളോട് ചെയ്തതിനുള്ള പ്രതികാരമാണെന്ന് പറഞ്ഞു.
മൂന്ന് മാസങ്ങള്‍ക്ക് മുമ്പായിരുന്നു മകള്‍ ലൈംഗിക പീഡനത്തിന് ഇരയായത്. പെണ്‍കുട്ടിയെ ബലാത്സംഗത്തിന് ഇരയാക്കിയ ശേഷം പോലീസില്‍ പരാതിപ്പെട്ടാല്‍ വലിയ പ്രത്യാഘാതങ്ങള്‍ നേരിടേണ്ടി വരുമെന്ന് ഓംകാര്‍ സിംഗ് പെണ്‍കുട്ടിയേയും പിതാവിനെയും ഭീഷണിപ്പെടുത്തി. പെണ്‍കുട്ടി പിന്നീട് ഗര്‍ഭിണിയാകുകയും ഗര്‍ഭം അലസിപ്പിക്കുകയും ചെയ്തു. സംഭവത്തില്‍ ഒരിടത്തും പരാതി നല്‍കാതെ സ്വന്തം നീതി നടപ്പാക്കാന്‍ പിതാവ് പിന്നീട് തീരുമാനിക്കുകയായിരുന്നു.
ഇതേ തുടര്‍ന്ന് വെള്ളിയാഴ്ച ഓംകാറിനെ മകളുടെ കാര്യം സംസാരിക്കാനെന്ന വ്യാജേനെ വിളിച്ചു വരുത്തിയ ശേഷം കഴുത്തില്‍ കമ്പിമുറുക്കി ശ്വാസം മുട്ടിച്ചു കൊല്ലുകയായിരുന്നു. കൊന്ന ശേഷം ഇയാളുടെ ലൈംഗികാവയവം കത്തിച്ചു. പിന്നീട് ഇരുമ്പുകമ്പിയുമായി ഖജുരിഖാസ് പോലീസ് സ്‌റ്റേഷനില്‍ നേരിട്ടെത്തി കീഴടങ്ങി. പോലീസ് ഓംകാറിന്റെ മൃതദേഹം പിന്നീട് പോസ്റ്റുമാര്‍ട്ടത്തിനായി അയച്ചു. വിദഗ്ദ്ധ പരിശോധനയില്‍ പെണ്‍കുട്ടി പീഡനത്തിനിരയായതായി കണ്ടെത്തിയിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha