പ്രമുഖ പൊതുമേഖലാ ബാങ്കായ പഞ്ചാബ് നാഷണൽ ബാങ്ക് (പിഎൻബി) തങ്ങളുടെ 132-ാം സ്ഥാപക ദിനം ഡൽഹിയിലെ യശോഭൂമിയിൽ വിപുലമായ പരിപാടികളോടെ ആഘോഷിച്ചു. സ്ഥാപക ദിനത്തോടനുബന്ധിച്ച് വിവിധ വിഭാഗങ്ങളിലായി 22 പുതിയ ബാങ്കിംഗ് ഉൽപ്പന്നങ്ങൾ ബാങ്ക് പുറത്തിറക്കി. ഒരു നൂറ്റാണ്ടിലേറെയായി രാജ്യത്തിൻ്റെ സാമ്പത്തിക വളർച്ചയിൽ ബാങ്ക് നൽകിവരുന്ന വിശ്വസനീയമായ സേവനങ്ങളെയും കരുത്തിനെയും അനുസ്‌മരിച്ചുകൊണ്ടായിരുന്നു ചടങ്ങ്.

ബാങ്കിൻ്റെ അഭിമാനകരമായ ഈ യാത്രയിൽ പ്രതിബദ്ധത പുലർത്തുന്ന മുഴുവൻ പിഎൻബി കുടുംബത്തെയും മാനേജിംഗ് ഡയറക്ടറും സിഇഒയുമായ അശോക് ചന്ദ്ര അഭിനന്ദിച്ചു. ബാങ്കിൻ്റെ പൈതൃകത്തെ ആദരിക്കുന്നതിനൊപ്പം ഡിജിറ്റൽ യുഗത്തിലെ നൂതനമായ കാഴ്ചപ്പാടുകളും അദ്ദേഹം പങ്കുവെച്ചു. ഡിഎഫ്എസ് സെക്രട്ടറി എം. നാഗരാജു മുഖ്യാതിഥിയായെത്തിയ ചടങ്ങിൽ ഡിഎഫ്എസ് സ്പെഷ്യൽ സെക്രട്ടറി സഞ്ജയ് ലോഹിയ, അഡീഷണൽ സെക്രട്ടറി ഹരിഹർ മിശ്ര എന്നിവരും ആർബിഐയിലെയും മറ്റ് ധനകാര്യ സ്ഥാപനങ്ങളിലെയും ഉന്നത ഉദ്യോഗസ്ഥരും പങ്കെടുത്തു.

വിശ്വാസത്തിൻ്റെയും സേവനത്തിൻ്റെയും പാതയിൽ 132 വർഷം പൂർത്തിയാക്കുന്ന പിഎൻബി, പുതിയ ഉൽപ്പന്നങ്ങളിലൂടെ കൂടുതൽ ജനകീയമായ ബാങ്കിംഗ് സേവനങ്ങൾ ഉറപ്പാക്കുമെന്ന് അധികൃതർ വ്യക്തമാക്കി.