നിതിന് രാജിന്റെ മരണത്തില് കര്ശന നിലപാടുമായി മുഖ്യമന്ത്രി
രാജ്യത്ത് വര്ദ്ധിച്ചുവരുന്ന ജാതീയമായ വേര്തിരിവുകള്ക്കെതിരെയും ക്യാമ്പസുകളിലെ വിവേചനങ്ങള്ക്കെതിരെയും ശക്തമായ പ്രതികരണവുമായി മുഖ്യമന്ത്രി പിണറായി വിജയന്. ഭരണഘടനാ ശില്പി ഡോ. ബി.ആര്. അംബേദ്കറുടെ ജന്മദിനത്തില് പങ്കുവെച്ച ഫേസ്ബുക്ക് കുറിപ്പിലാണ് കേരളത്തെ നടുക്കിയ അഞ്ചരക്കണ്ടി മെഡിക്കല് കോളേജ് വിദ്യാര്ത്ഥിയുടെ ആത്മഹത്യയെ പരാമര്ശിച്ച് മുഖ്യമന്ത്രി തന്റെ നിലപാട് വ്യക്തമാക്കിയത്.
ജീവിതം മുഴുവന് ജാതീയ വേര്തിരിവുകള്ക്കെതിരെ പോരാടിയ മഹാനാണ് ഡോ. ബി.ആര്. അംബേദ്കര് എന്ന് മുഖ്യമന്ത്രി അനുസ്മരിച്ചു. വിവേചനരഹിതമായ ഒരു സമൂഹം കെട്ടിപ്പടുക്കാനാണ് അംബേദ്കര് വിഭാവനം ചെയ്തതെങ്കിലും, ആധുനിക കാലഘട്ടത്തിലും ഉന്നത വിദ്യാഭ്യാസ സ്ഥാപനങ്ങളില് ജാതിയുടെ പേരില് വിവേചനങ്ങള് തുടരുന്നത് അത്യന്തം ഗൗരവകരമാണെന്ന് അദ്ദേഹം ചൂണ്ടിക്കാട്ടി.
മിടുക്കനായ ഒരു വിദ്യാര്ത്ഥിയെ മരണത്തിലേക്ക് തള്ളിവിട്ടത് ആരായാലും അത് മാപ്പര്ഹിക്കാത്ത കുറ്റമാണെന്ന് മുഖ്യമന്ത്രി കര്ശനമായ ഭാഷയില് പറഞ്ഞു. അഞ്ചരക്കണ്ടി ഡെന്റല് കോളേജിലെ നിതിന് രാജിന്റെ ആത്മഹത്യയെ മുന്നിര്ത്തിയായിരുന്നു അദ്ദേഹത്തിന്റെ പരാമര്ശം. 'കേരളമാകെ നിതിന് രാജിന്റെ കുടുംബത്തിനൊപ്പമുണ്ട്. പുരോഗമന കേരളത്തിന് ഇത്തരം വാര്ത്തകള് ഒട്ടും ഭൂഷണമല്ല' – മുഖ്യമന്ത്രി കുറിച്ചു.
നമ്മുടെ സമൂഹം നാളിതുവരെ ആര്ജിച്ചെടുത്ത മാനവിക മൂല്യങ്ങള് കൈമോശം വന്നോ എന്ന് ഗൗരവമായി പരിശോധിക്കേണ്ട ഘട്ടമാണിതെന്ന് അദ്ദേഹം ഓര്മ്മിപ്പിച്ചു. ജാതി ചിന്തകള്ക്കും വിവേചനങ്ങള്ക്കും മുകളില് തുല്യതയും നീതിയും ഉറപ്പാക്കുന്ന ഒരു നവകേരളം കെട്ടിപ്പടുക്കാന് ഓരോരുത്തരും പ്രതിജ്ഞാബദ്ധരാകണമെന്നും മുഖ്യമന്ത്രി ആഹ്വാനം ചെയ്തു.
https://www.facebook.com/Malayalivartha
