ബംഗളൂരുവിലെ ചര്‍ച്ച് സ്ട്രീറ്റില്‍ ഞായറാഴ്ച രാത്രിയില്‍ നടന്ന ബോംബ് സ്‌ഫോടനത്തില്‍ ഒരാള്‍ മരിച്ചു. ചെന്നൈ സ്വദേശി ഭവാനി(37)യാണ് മരിച്ചത്. ചെന്നൈ സ്വദേശി കാര്‍ത്തിക എന്ന യുവാവിനും സ്‌ഫോടനത്തില്‍ പരിക്കേറ്റു. ഇയാളുടെ പരിക്ക് ഗുരുതരമല്ലെന്ന് പോലീസ് പറഞ്ഞു.
ചര്‍ച്ച് സ്ട്രീറ്റിലെ ഒരു റസ്‌റ്റോറന്റിന് മുന്നില്‍ ഞായറായഴ്ച രാത്രി 8.30ഓടെയാണ് സ്‌ഫോടനമുണ്ടായത്. പാതയോരത്ത് പേപ്പറില്‍ പൊതിഞ്ഞു വെച്ചിരുന്ന ഐ.ഇ.ഡി ബോംബാണ് പൊട്ടിത്തെറിച്ചതെന്ന് പൊലീസ് പറഞ്ഞു. സ്‌ഫോടനം താരതമ്യേന ശക്തി കുറഞ്ഞതായിരുന്നു.
എന്നാല്‍ സംസ്ഥാനത്ത് ഉണ്ടായത് ഭീകരാക്രമമാണെന്ന് കേന്ദ്ര ആഭ്യന്തര മന്ത്രി രാജ്‌നാഥ് സിംഗ് പറഞ്ഞു. സ്‌ഫോടനത്തെ തുടര്‍ന്ന് രാജ്‌നാഥ് സിംഗ് മുഖ്യമന്ത്രി സിദ്ധരാമയ്യയെ ഫോണില്‍ വിളിച്ച് സ്ഥിതിഗതികള്‍ വിലയിരുത്തി. ഇത്തരം ആക്രമണങ്ങളെ നേരിടാന്‍ കേന്ദ്രം സജ്ജമാണെന്നും സംസ്ഥാനത്തിന് കേന്ദ്രത്തിന്രെ പൂര്‍ണ പിന്തുണയുണ്ടാകുമെന്നും സിംഗ് പറഞ്ഞു.
സ്‌ഫോടന സ്ഥലത്ത് പൊലീസ് ശക്തമായ കാവല്‍ ഏര്‍പ്പെടുത്തി. ഫോറന്‍സിക് ഉദ്യോഗസ്ഥരും ബോംബ് സ്‌ക്വാഡും സംഭവസ്ഥലം പരിശോധിച്ചുവരികയാണ്. സ്‌ഫോടനത്തിന് പിന്നില്‍ ആരാണെന്ന് വ്യക്തമായിട്ടില്ല. രണ്ട് പേരെ കസ്റ്റഡിയില്‍ എടുത്ത് ചോദ്യം ചെയ്തു വരികയാണ് പൊലീസ്. മുന്‍ മുഖ്യമന്ത്രിയും കേന്ദ്ര നിയമമന്ത്രിയുമായ സദാനന്ദ ഗൗഡ സംഭവ സ്ഥലം സന്ദര്‍ശിച്ചു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha