സത്യം പറയാതെ വയ്യെന്ന് പറഞ്ഞ് സ്വന്തം കുടുംബത്തെ തള്ളി മോദി ഭക്തിയുമായി വരുണ്‍ഗാന്ധി വന്നിരിക്കുന്നു. വരുണും രാഹുലും രാഷ്ട്രീമായി ഒന്നിക്കുമോ എന്ന് വരെ ഒരിടക്ക് കാര്യങ്ങള്‍ കരുതിയിടത്താണ് ഇപ്പോള്‍ എല്ലാം മാറിമറിഞ്ഞിരിക്കുന്നത്. അതായത് തിരഞ്ഞെടുപ്പില്‍ കോണ്‍ഗ്രസും ബി.ജെ.പിയും പരസ്പരം ആക്രമിക്കുന്നത് പതിവാണെങ്കിലും നെഹ്‌റു കുടുംബത്തില്‍ നിന്ന് രണ്ട് ചേരിയിലുളള രാഹുലും വരുണും എപ്പോഴും കടിച്ചുകീറുന്നത് പതിവല്ല. എന്നാല്‍ ആ പതിവ് വരുണ്‍ തെറ്റിച്ചിരിക്കുന്നു.

പ്രധാനമന്ത്രി നരേന്ദ്രമോദിയെ വാനോളം പ്രശംസിച്ച് വരുണ്‍ ഗാന്ധി. മറ്റൊരു പ്രധാനമന്ത്രിയുടെ ഭരണത്തിന്‍ കീഴിലും രാജ്യം ഇത്രയും പുരോഗതി കൈവരിച്ചിട്ടില്ലെന്ന് വരുണ്‍ ഗാന്ധി പറഞ്ഞു. ഉത്തര്‍പ്രദേശിലെ പിലിബിത്തില്‍ തിരഞ്ഞെടുപ്പ് റാലിയെ അഭിസംബോധന ചെയ്ത് സംസാരിക്കവെയാണ് വരുണ്‍ ഗാന്ധി ഇങ്ങനെയൊരു പ്രസ്താവന നടത്തിയത്. സാമ്പത്തികമായി പിന്നോക്കാവസ്ഥയിലുള്ള കുടുംബത്തില്‍ നിന്നാണ് മോദിജി പ്രധാനമന്ത്രി പദവിയിലേക്കെത്തിയത്. ആത്മാര്‍ഥമായി പറഞ്ഞാല്‍ എന്റെ കുടുംബത്തില്‍ നിന്നുള്ള പ്രധാനമന്ത്രിമാരുടെ കീഴില്‍ കൈവരിക്കാതിരുന്ന പുരോഗതിയാണ് മോദിജിയുടെ ഭരണത്തില്‍ രാജ്യത്തിനുണ്ടായത്. വരുണ്‍ പറഞ്ഞു.

രാജ്യത്തിന് വേണ്ടിയാണ് മോദി ജീവിക്കുന്നതെന്നും രാജ്യത്തിന് വേണ്ടി മരിക്കാനും അദ്ദേഹം തയ്യാറാണെന്നും വരുണ്‍ കൂട്ടിച്ചേര്‍ത്തു. അഞ്ച് കൊല്ലത്തിനിടയില്‍ യാതൊരു അഴിമതിയാരോപണവും മോദിയ്ക്ക് നേരിടേണ്ടി വന്നിട്ടില്ലെന്നും രാജ്യത്തെ കുറിച്ചാണ് മോദിയുടെ ആശങ്കയെന്നും വരുണ്‍ പറഞ്ഞു. കുടുംബം ഇല്ലാത്ത ഒരാള്‍ ആര്‍ക്ക് വേണ്ടിയാണ് അഴിമതി നടത്തേണ്ടതെന്നും മോദിയ്ക്ക് അതിന്റെ ആവശ്യകതയില്ലെന്നും വരുണ്‍ കൂട്ടിച്ചേര്‍ത്തു. ലോക്സഭാ തിരഞ്ഞെടുപ്പില്‍ പിലിബിത്തില്‍ നിന്നുള്ള ബിജെപി സ്ഥാനാര്‍ഥിയാണ് വരുണ്‍. നേരത്തെ മനേകാ ഗാന്ധിയുടെ മണ്ഡലമായിരുന്നു പിലിബിത്ത്. ഏതായാലും ഈ തിരഞ്ഞെടുപ്പ് സമയത്ത് തന്നെ ഗാന്ധി കുടുംബത്തില്‍ നിന്നുള്ള പരാമര്‍ശം കോണ്‍ഗ്രസിന് പണിയാകുുമെന്ന് തന്നെയാണ് വിലയിരുത്തല്‍. ഇതു വരെ സഹോദര സ്‌നേഹത്തില്‍ പലതും പറയാതിരുന്ന രാഹുലും പ്രിയങ്കയും കളം മാറ്റി ചവിട്ടുമോ, പ്രതികരിക്കുമോ. അതാണ് ഇനി കാണേണ്ടത്.