ആഗോള എണ്ണ വ്യാപാരത്തിന്റെ സിരയായ ഹോര്‍മുസ് കടലിടുക്കില്‍ നിയന്ത്രണങ്ങള്‍ കടുപ്പിച്ച് ഇറാന്‍. തങ്ങളുടെ തുറമുഖങ്ങള്‍ക്കുമേല്‍ അമേരിക്ക ഏര്‍പ്പെടുത്തിയിരിക്കുന്ന നാവിക ഉപരോധം പൂര്‍ണ്ണമായും പിന്‍വലിക്കാതെ മേഖലയില്‍ സാധാരണ നില പുനഃസ്ഥാപിക്കില്ലെന്ന് ഇറാന്‍ പാര്‍ലമെന്റ് സ്പീക്കര്‍ മുഹമ്മദ് ബാഗര്‍ ഖാലിബാഫ് പ്രഖ്യാപിച്ചു. ഇതോടെ പശ്ചിമേഷ്യയില്‍ വീണ്ടും കടുത്ത സംഘര്‍ഷാവസ്ഥ ഉടലെടുത്തിരിക്കുകയാണ്.

ബുധനാഴ്ച ഹുര്‍മുസ് ഇടുക്കിലൂടെ കടന്നുപോയ രണ്ട് വിദേശ ചരക്കുകപ്പലുകള്‍ ഇറാന്‍ റെവല്യൂഷണറി ഗാര്‍ഡ് പിടിച്ചെടുത്തു. അന്താരാഷ്ട്ര കപ്പല്‍ ഗതാഗത ചട്ടങ്ങള്‍ ലംഘിച്ചതിനാലാണ് നടപടിയെന്ന് തെഹ്‌റാന്‍ അവകാശപ്പെടുന്നുണ്ടെങ്കിലും, അമേരിക്കന്‍ ഉപരോധത്തോടുള്ള നേരിട്ടുള്ള തിരിച്ചടിയായാണ് ലോകരാഷ്ട്രങ്ങള്‍ ഇതിനെ കാണുന്നത്. നിലവില്‍ ഇറാന്‍ തുറമുഖങ്ങളെ ലക്ഷ്യമിട്ട് ഏകദേശം 10,000 സൈനികരെ അണിനിരത്തിയാണ് അമേരിക്ക ഉപരോധം ശക്തമാക്കിയിരിക്കുന്നത്. ബുധനാഴ്ച മാത്രം 31 കപ്പലുകളെ അമേരിക്കന്‍ സേന തടയുകയും തിരിച്ചയക്കുകയും ചെയ്തു.

അമേരിക്കയും ഇസ്രായേലും ചേര്‍ന്ന് വെടിനിര്‍ത്തല്‍ കരാറുകള്‍ ലംഘിക്കുകയാണെന്ന് ഇറാന്‍ ആരോപിച്ചു. ഏപ്രില്‍ 13ന് അമേരിക്ക ഏകപക്ഷീയമായി ഏര്‍പ്പെടുത്തിയ നാവിക ഉപരോധം സമാധാന ശ്രമങ്ങള്‍ക്കേറ്റ കനത്ത പ്രഹരമാണെന്ന് ഖാലിബാഫ് ചൂണ്ടിക്കാട്ടി. ഈ നടപടിയില്‍ പ്രതിഷേധിച്ച് പാകിസ്ഥാന്‍ തലസ്ഥാനമായ ഇസ്!ലാമാബാദില്‍ നടക്കാനിരുന്ന രണ്ടാം വട്ട സമാധാന ചര്‍ച്ചകളില്‍ നിന്ന് ഇറാന്‍ ഔദ്യോഗികമായി പിന്മാറി.