ആന്ധ്രാപ്രദേശിലെ പെനുകോണ്ടയ്ക്കടുക്കുള്ള മലയിടുക്കിലേക്ക് ബസ് മറിഞ്ഞ് നാല് വിദ്യാര്‍ത്ഥികളുള്‍പ്പടെ പതിനാല് പേര്‍ മരിച്ചു. നിരവധി പേര്‍ക്ക് പരിക്കേറ്റു. എട്ട് വിദ്യാര്‍ത്ഥികളുടെ നില ഗുരുതരമായി തുടരുകയാണ്. ബുധനാഴ്ച രാവിലെ 8.15നാണ് സംഭവം.
അമരപുരത്തിനും ആനന്ദ്പൂരിനും ഇടയില്‍ സര്‍വീസ് നടത്തുന്ന സംസ്ഥാന ഗവണ്‍മെന്റിന്റെ ബസാണ് അപകടത്തില്‍പ്പെട്ടത്. എതിരെ വന്ന ഓട്ടോറിക്ഷയില്‍ ഇടിക്കാതിരിക്കാനായി  ബസ് വെട്ടിച്ചപ്പോള്‍ നിയന്ത്രണം വിട്ട് ഇരുപത് അടി താഴ്ചയുള്ള മലയിടുക്കിലേക്ക് വീഴുകയായിരുന്നു. അറുപതോളം യാത്രക്കാരാണ് ബസിലുണ്ടായിരുന്നത്. ഇതിലേറെയും വിദ്യാര്‍ത്ഥികളായിരുന്നു.
പൊലീസും ജില്ലാ അധികൃതരും സ്ഥലത്തെത്തി ബസിനുള്ളില്‍ കുടുങ്ങിക്കിടന്നവരെ പുറത്തെടുത്തു. ഗുരുതരമായി പരിക്കേറ്റവരെ ആനന്ദ്പൂര്‍ ആശുപത്രിയിലും പുട്ടപര്‍ത്തി സത്യസായിബാബ ആശുപത്രിയിലും പ്രവേശിപ്പിച്ചിരിക്കുകയാണ്. ചിലരെ ബംഗളൂരുവിലെ ആശുപത്രിയിലും പ്രവേശിപ്പിച്ചിട്ടുണ്ട്. മരണസംഖ്യ ഇനിയും ഉയരാന്‍ സാധ്യതയുണ്ടെന്നാണ് റിപ്പോര്‍ട്ടുകള്‍.
സംഭവത്തില്‍ മുഖ്യമന്ത്രി ചന്ദ്രബാബു നായിഡു അനുശോചനം രേഖപ്പെടുത്തി. പരിക്കേറ്റ് ആശുപത്രിയിലായവര്‍ക്ക് മികച്ച ചികിത്സ ലഭ്യമാക്കണമെന്ന് ആനന്ദ്പൂര്‍ ജില്ലാ അധികൃതരോട് അദ്ദേഹം നിര്‍ദ്ദേശിച്ചിട്ടുണ്ട്. മരിച്ചവരുടെ കുടുംബത്തിന് അഞ്ച് ലക്ഷം രൂപയും ഗുരുതരമായി പരിക്കേറ്റവര്‍ക്ക് രണ്ട് ലക്ഷം രൂപയും ധനസഹായം നല്‍കുമെന്ന് അദ്ദേഹം പറഞ്ഞു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha