ദേശീയ ചലച്ചിത്ര പുരസ്‌കാരങ്ങള്‍ പ്രഖ്യാപിച്ചു. പ്രധാന പുരസ്‌കാരങ്ങള്‍ ഇല്ലെങ്കിലും മലയാളത്തിന്റെ സാന്നിധ്യവും ശ്രദ്ധേയമായി. മികച്ച പരിസ്ഥിതി ചിത്രമായി ജയരാജ് സംവിധാനം ചെയ്ത ഒറ്റാല്‍ തെരഞ്ഞെടുക്കപ്പെട്ടു. തിരക്കഥയ്ക്കുള്ള പുരസ്‌കാരവും ഒറ്റാലിന് ലഭിച്ചിട്ടുണ്ട്. ജോഷി മംഗലത്താണ് ചിത്രത്തിനു തിരക്കഥ രചിച്ചത്. മികച്ച പശ്ചാത്തല സംഗീതത്തിനുള്ള പുരസ്‌കാരം 1983 എന്ന ചിത്രത്തിലെ മികവിന് ഗോപി സുന്ദറിന് ലഭിച്ചു. സിദ്ധാര്‍ഥ് ശിവ സംവിധാനം ചെയ്ത ഐനാണ് മികച്ച മലയാള ചിത്രം. ഈ ചിത്രത്തിലെ അഭിനയത്തിന് മുസ്തഫ പ്രത്യേക ജൂറി പരാമര്‍ശത്തിന് അര്‍ഹമായി.
മികച്ച നടനായി തെരഞ്ഞെടുക്കപ്പെട്ടത് കന്നഡ താരമായ സഞ്ചാരി വിജയ് ആണ്. \'നാനു അവനല്ല അവളു\' എന്ന ചിത്രത്തിലെ അഭിനയത്തിനാണ് പുരസ്‌കാരം. മികച്ച നടിയായി ക്വീന്‍ എന്ന ചിത്രത്തിലെ മികവിന് കങ്കണ റനൗട്ടിനെ തെരഞ്ഞെടുത്തു. മറാഠി ചിത്രമായ കോര്‍ട്ടാണ് മികച്ച സിനിമ.
മികച്ച നടനുള്ള മത്സരത്തില്‍ അവസാന റൗണ്ടില്‍ ഉള്‍പെട്ടിരുന്ന മമ്മൂട്ടിയും ജയസൂര്യയും പുറത്തായിരുന്നു. മുന്നറിയിപ്പിലെ അഭിനയത്തിന് മമ്മൂട്ടിയെയും പികെയിലെ പ്രകടനത്തിന് ആമിര്‍ ഖാനെയും ഹൈദറിലെ നായകനായ ഷാഹിദ് കപൂറിനെയും അപ്പോത്തിക്കിരിയിലെ പ്രകടനത്തിന് ജയസൂര്യയെയും പുരസ്‌കാരത്തിന് പരിഗണിക്കുന്നതായി റിപ്പോര്‍ട്ടുകള്‍ പുറത്തുവന്നിരുന്നു. ഇവരെയെല്ലാം മറികടന്നാണ് നടനുള്ള പുരസ്‌കാരത്തിന് കന്നഡ താരം അര്‍ഹനായത്.
നാന്‍ അവനല്ല അവളു, ഹാരിവു എന്നീ സിനിമകള്‍ക്കാണ് കന്നട നടന്‍ സഞ്ചാരി വിജയ് പരിഗണിക്കപ്പെട്ടത്. തമിഴ് സംവിധായകന്‍ ഭാരതിരാജ അധ്യക്ഷനായ ജൂറിയാണ് പുരസ്‌കാരപ്രഖ്യാപനം നടത്തിയത്. ഭാരതിരാജായെ കൂടാതെ, ഭാഗ്യരാജ്, മലയാളി നിരൂപകന്‍ ഡോ. നന്ത്യത്ത് ഗോപാലകൃഷ്ണന്‍ എന്നിവരാണ് ദക്ഷിണേന്ത്യയില്‍ നിന്നുള്ള ജൂറിയംഗങ്ങള്‍.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha