അഹമ്മദാബാദില്‍ ബലാത്സംഗക്കേസില്‍ പ്രതിക്ക് എതിരെ കുറ്റം ചുമത്താതിരിക്കന്‍ പ്രതിയില്‍ നിന്ന് 35 ലക്ഷം രൂപ കൈക്കൂലി വാങ്ങിയെന്ന കേസില്‍ വനിത പൊലീസ് സബ് ഇന്‍സ്‌പെക്ടര്‍ അറസ്റ്റില്‍. അഹമ്മദാബാദ് വെസ്റ്റ് മഹിള പൊലീസ് സ്‌റ്റേഷന്‍ ഇന്‍ ചാര്‍ജ് ശ്വേത ജഡേജയ്ക്ക് എതിരെയാണ് എഫ് ഐ ആര്‍ രജിസ്റ്റര്‍ ചെയ്തത്. ബലാത്സംഗകേസിലെ പ്രതിയില്‍ നിന്ന് 35 ലക്ഷം രൂപ ആവശ്യപ്പെട്ടെന്ന് ആരോപിച്ചാണ് ശ്വേതയെ അറസ്റ്റ് ചെയ്തത്.

എഫ് ഐ ആര്‍ അനുസരിച്ച് അഹമ്മദാബാദിലെ ഒരു സ്വകാര്യ കമ്ബനിയിലെ രണ്ട് വനിതാജീവനക്കാര്‍ കമ്ബനിയുടെ മാനേജിംഗ് ഡയറക്ടറായ കെനാല്‍ ഷായ്ക്ക് എതിരെ ബലാത്സംഗ പരാതി നല്‍കിയിരുന്നു. എന്നാല്‍, അന്വേഷണത്തിന് ഇടയില്‍ ശ്വേത ജഡേജ പ്രതിയില്‍ നിന്ന് 35 ലക്ഷം രൂപ കൈക്കൂലി ആവശ്യപ്പെട്ടു. സാമൂഹിക വിരുദ്ധ പ്രവര്‍ത്തന നിയമം അനുസരിച്ച് ഷായ്‌ക്കെതിരെ കേസ് രജിസ്റ്റര്‍ ചെയ്യാതിരിക്കാന്‍ വേണ്ടിയാണ് ഇത്രയും തുക കൈക്കൂലിയായി ആവശ്യപ്പെട്ടത്. ഈ നിയമം അനുസരിച്ച് പൊലീസിന് പ്രതിയെ അയാളുടെ ജില്ലയ്ക്ക് പുറത്തുള്ള ജയിലിലേക്ക് അയയ്ക്കാന്‍ കഴിയും.
കെനാല്‍ ഷായുടെ സഹോദരന്‍ ഭാവേഷില്‍ നിന്നാണ് ശ്വേത 35 ലക്ഷം ആവശ്യപ്പെട്ടത്. 2019ലാണ് ബലാത്സംഗക്കേസ് രജിസ്റ്റര്‍ ചെയ്തത്. കൈക്കൂലി ആവശ്യപ്പെട്ട് ശ്വേത ജഡേജ ഭാവേഷിനെ വിളിക്കുകയും ഇരുപക്ഷവും 20 ലക്ഷം രൂപയ്ക്ക് ഇരുവിഭാഗവും സമ്മതിക്കുകയും ചെയ്തു.
ക്രൈംബ്രാഞ്ച് തയ്യാറാക്കിയ എഫ്.ഐ.ആര്‍ അനുസരിച്ച് ഇടനിലക്കാരന്‍ വഴി 20 ലക്ഷം രൂപയാണ് ശ്വേത സ്വീകരിച്ചത്. തുടര്‍ന്ന്, ബലാത്സംഗക്കേസില്‍ 15 ലക്ഷം രൂപ അധികമായി ആവശ്യപ്പെടുകയും ചെയ്തു. ഫെബ്രുവരിയില്‍ 20 ലക്ഷം സ്വീകരിച്ചതിനു ശേഷം ബാക്കിയുള്ള തുകയ്ക്കായി സമ്മര്‍ദ്ദം ചെലുത്തി. വെള്ളിയാഴ്ചയാണ് അഴിമതി നിരോധന നിയമപ്രകാരം ശ്വേതയെ അറസ്റ്റ് ചെയ്തതെന്ന് ഉദ്യോഗസ്ഥര്‍ അറിയിച്ചു.
ശനിയാഴ്ച സെഷന്‍സ് കോടതിയില്‍ ഹാജരാക്കിയ ഇവരെ ഏഴു ദിവസത്തേക്ക് റിമാന്‍ഡ് ചെയ്തു. അതേസമയം, കൈക്കൂലിയായി സ്വീകരിച്ച 20 ലക്ഷം രൂപ കണ്ടെത്തുകയെന്നുള്ളതാണ് അന്വേഷണസംഘത്തിന് മുന്നിലെ അടുത്ത കടമ്ബ.
അഹമ്മദാബാദിലെ ക്രോപ് സൊല്യൂഷന്‍ കമ്ബനിയിലെ മാനേജിംഗ് ഡയറക്ടറാണ് ഷാ. ഇന്ത്യന്‍ പീനല്‍ കോഡ് സെക്ഷന്‍ 376 അനുസരിച്ച് രണ്ട് വ്യത്യസ്ത് ബലാത്സംഗ കേസുകളാണ് ഷായ്‌ക്കെതിരെ രജിസ്റ്റര്‍ ചെയ്തിരിക്കുന്നത്. ഇതില്‍ ഒരു കേസാണ് ശ്വേത അന്വേഷിച്ചിരുന്നത്.