പ്രകാശ് കാരാട്ടിന് പകരക്കാരന്‍ ആര് എന്നതാണ് ഇന്നാരംഭിക്കുന്ന സി.പി.എം പാര്‍ട്ടി കോണ്‍ഗ്രസില്‍ ഏറ്റവും ആകാംക്ഷ ഉയര്‍ത്തുന്ന ചോദ്യം ഇതാണ്. ഈ ചോദ്യങ്ങള്‍ക്കുള്ള ഉത്തരങ്ങള്‍ തേടി മാധ്യമങ്ങള്‍ നേതാക്കളെ പലവുരി കണ്ടതാണ്. സാധാരണ, പാര്‍ട്ടി കോണ്‍ഗ്രസിന് മുമ്പ് തന്നെ പുതിയ ജനറല്‍ സെക്രട്ടറിയെ സംബന്ധിച്ച് കൃത്യമായ ധാരണ സി.പി.എമ്മില്‍ രൂപപ്പെടാറുള്ളതാണ്. എന്നാല്‍ ഇത്തവണ അത്തരമൊരു ധാരണ രൂപപ്പെടാത്തതിനാല്‍ പാര്‍ട്ടി കോണ്‍ഗ്രസ് അവസാനിക്കുന്ന 19 വരെ കാത്തിരിക്കേണ്ടി വരും . മുതിര്‍ന്ന പി.ബി അംഗം സീതാറാം യെച്ചൂരിയുടെ പേരിന് തന്നെയാണ് ഇപ്പോഴും മേല്‍ക്കൈ. എസ്. രാമചന്ദ്രന്‍ പിളളയുടെ പേരും പാര്‍ട്ടി ഗൗരവമായി പരിഗണിക്കുന്നുണ്ട്. ആന്ധ്രയില്‍ നിന്നുളള പി.ബി അംഗം ബി. വി.രാഘവലു കടന്നു വരാനുളള സാദ്ധ്യതയും തളളാനാവില്ല.
 സംഘടനാ ചുമതല വഹിക്കുന്ന പി.ബി അംഗം ജനറല്‍ സെക്രട്ടറിയാവുകയെന്ന പതിവനുസരിച്ചാണെങ്കില്‍ സാദ്ധ്യത എസ്.ആര്‍.പിക്കാണ്. 77 കാരനായ എസ്. ആര്‍.പിയെ ജനറല്‍ സെക്രട്ടറിയാക്കണമെന്ന താല്‍പ്പര്യം കേരള ഘടകത്തിനുണ്ട്. അതേ സമയം, ദേശീയ രാഷ്ട്രീയത്തിലെ സജീവ ഇടപെടലുകളും, പൊതു സ്വീകാര്യതയും ബംഗാള്‍ ഘടകത്തിന്റെ പിന്തുണയും യെച്ചൂരിയുടെ പേരിന് പ്രാമുഖ്യം നല്‍കുന്നു. സ്ഥാനമൊഴിയുന്ന കാരാട്ടിന്റെ നിലപാടും ഇക്കാര്യത്തില്‍ നിര്‍ണായകമാവും. ജനറല്‍ സെക്രട്ടറി സ്ഥാനത്തേക്ക് മത്സരമുണ്ടാവില്ലെന്ന് നേതാക്കള്‍ പറയുന്നു. അവസാന ദിവസത്തിന് മുമ്പ് പി.ബിയില്‍ ധാരണയുണ്ടാക്കാനുളള ശ്രമത്തിലാണ് കാരാട്ട്. പ്രകാശ് കാരാട്ടും സീതാറാം യെച്ചൂരിയും എസ്. ആര്‍.പിയും 1985 ല്‍ കേന്ദ്ര കമ്മിറ്റിയിലും 1992 ല്‍ പി.ബിയിലും എത്തിയത് ഒരുമിച്ചാണ്. ജനറല്‍ സെക്രട്ടറിയായിരുന്ന പി. സുന്ദരയ്യയാണ് മൂവരെയും നേതൃത്വത്തിലേക്ക് കൊണ്ടുവന്നത്.
ബംഗാള്‍ മുന്‍ മുഖ്യമന്ത്രി ബുദ്ധദേവ് ഭട്ടാചാര്യയും നിരുപം സെന്നും പൊളിറ്റ് ബ്യൂറോയില്‍ നിന്ന് ഒഴിവാകുമെന്നാണ് സൂചന.തന്നെ ഒഴിവാക്കണമെന്ന് ബുദ്ധദേവ് ആവശ്യപ്പെട്ടിട്ടുണ്ട്. കടുത്ത ആരോഗ്യ പ്രശ്‌നങ്ങള്‍ കാരണം നിരുപം സെന്നും ഒഴിഞ്ഞേക്കും. പകരം, കിസാന്‍സഭാ ജനറല്‍ സെക്രട്ടറിയായ ബംഗാളില്‍ നിന്നുളള മുതിര്‍ന്ന കേന്ദ്ര കമ്മിറ്റി അംഗം ഹനന്‍മുളള പി.ബിയില്‍ എത്തിയേക്കും. മുഹമ്മദ് സലിം , സുഭാഷിണി അലി എന്നിവരുടെ പേരുകളും പരിഗണിക്കുന്നുണ്ട്. 15 അംഗ പൊളിറ്റ് ബ്യൂറോയില്‍ കേരളത്തില്‍ നിന്ന് കൂടുതല്‍ പേരെത്താനുളള സാധ്യത കുറവാണ്. എന്നാല്‍, എ.കെ. ബാലന്‍ കേന്ദ്ര കമ്മിറ്റിയില്‍ എത്തുമെന്ന് ഏറെക്കുറെ ഉറപ്പായിട്ടുണ്ട്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha