തെരഞ്ഞെടുപ്പ് എന്നാൽ ജനാധിപത്യം ആണെന്നും മറിച്ച് പണാധിപത്യം അല്ലെന്നും എൽഡിഎഫ് സ്ഥാനാർത്ഥി പി എ മുഹമ്മദ് റിയാസ്. മണ്ഡലം തെരഞ്ഞെടുപ്പ് കമ്മിറ്റി ഓഫീസിൽ വാർത്താസമ്മേളനത്തിൽ സംസാരിക്കുകയായിരുന്നു അദ്ദേഹം.

ബേപ്പൂർ പണത്തിനു മീതെ പറക്കും എന്നതിന്റെ തെളിവായിരിക്കും ഇത്തവണത്തെ തിരഞ്ഞെടുപ്പ് ഫലം. എന്നാൽ ചിലരുടെ ധാരണ പണത്തിനു മീതെ പരുന്തും പറക്കില്ല എന്നാണ്. തെരഞ്ഞെടുപ്പിൽ പണം ചെലവഴിച്ച് മത്സരിക്കുന്നത് വിനോദമായി കാണുന്നവരുണ്ട്. വിലകൊടുത്ത് വാങ്ങാൻ കഴിയുന്നവരല്ല ബേപ്പൂരിലെ വോട്ടർമാർ. അവർ രാഷ്ട്രീയ പ്രബുദ്ധതയുള്ള വരാണ്.

രാഷ്ട്രീയ പ്രവർത്തനം എന്നാൽ ആശയ സംവാദമാണ്, മറിച്ച് വ്യക്തിപരമായ അധിക്ഷേപമല്ല. വ്യക്തിപരമായ ശത്രുത ആരുമായും ഇല്ല. വ്യക്തിബന്ധം നിലനിർത്തിക്കൊണ്ട് രാഷ്ട്രീയം പറയാനുള്ള ശ്രമമാണ് എപ്പോഴും നടത്തിയിട്ടുള്ളത്. രാഷ്ട്രീയവും വികസനത്തിന്റെ രാഷ്ട്രീയവും പറഞ്ഞാണ് തെരഞ്ഞെടുപ്പിനെ നേരിടുന്നത്.

യുഡിഎഫ് സ്ഥാനാർത്ഥിയിൽ നിന്ന് വ്യക്തിപരമായ അധിക്ഷേപം നേരിടുന്ന ആദ്യ രാഷ്ട്രീയ പ്രവർത്തകൻ അല്ല താൻ. യുഡിഎഫിന്റെ തന്നെ സമുന്നതരായ നേതാക്കളെ വ്യക്തിപരമായി അധിക്ഷേപിച്ചിട്ടുണ്ട്. കോൺഗ്രസ് നേതാവ് രാഹുൽ ഗാന്ധിയോട് രാഷ്ട്രീയമായ അഭിപ്രായവ്യത്യാസം ഉണ്ടെങ്കിലും അദ്ദേഹത്തിൻ്റെ പിതൃത്വത്തെ താൻ ചോദ്യം ചെയ്തിട്ടില്ല.

പാണക്കാട് തങ്ങളുമായി ബന്ധപ്പെട്ട വിവാദമുണ്ടായപ്പോൾ അത് തെറ്റാണെന്ന നിലപാടാണ് സ്വീകരിച്ചത്. തങ്ങൾക്ക് യൂത്ത് ലീഗിന്റെ നിലവാരമേ ഉള്ളൂ എന്ന അഭിപ്രായം ഞാൻ പറഞ്ഞിട്ടില്ല. വ്യക്തിപരമായ അധിക്ഷേപം നേരിട്ടപ്പോഴും തിരികെ ഇന്നുവരെ ആ രീതിയിൽ പ്രതികരിച്ചിട്ടില്ല, ഇനി ഉണ്ടാവുകയുമില്ല.

യുഡിഎഫ് സ്ഥാനാർത്ഥിയുടെ ആരോപണങ്ങൾക്ക് ജനങ്ങൾ വോട്ടെടുപ്പിലൂടെ മറുപടി കൊടുക്കും. രാഷ്ട്രീയമാണോ വ്യക്തിപരമായ അധിക്ഷേപം ആണോ മുഖ്യം എന്നത് മണ്ഡലത്തിൽ ചർച്ച ചെയ്യപ്പെടുന്നുണ്ട്. വിമർശിക്കാൻ വേണ്ടി വിമർശിക്കുകയും പ്രശ്നങ്ങൾ സൃഷ്ടിക്കുകയും ആണ് ചിലർ ചെയ്യുന്നത്.

രാഷ്ട്രീയ കാലാവസ്ഥ എൽഡിഎഫിന് അനുകൂലമാണ്. കക്ഷി-രാഷ്ട്രീയ ഭേദമെന്യേ ബേപ്പൂരിൽ ജനം എൽഡിഎഫിന് വോട്ട് ചെയ്യും. പൊതുമരാമത്ത് വകുപ്പ് റസ്റ്റ് ഹൗസ് ഉൾപ്പെടെ നാട് മുന്നോട്ട് വെച്ച ആവശ്യങ്ങളാണ് കഴിഞ്ഞ അഞ്ചുവർഷം പദ്ധതികളായി വന്നത്. വികസനത്തിന്റെ കാര്യത്തിൽ ബേപ്പൂരിലെ ജനങ്ങൾ സംതൃപ്തരാണെന്നും മുഹമ്മദ് റിയാസ് പറഞ്ഞു.