എസ്.രാമചന്ദ്രന്‍ പിള്ളയെ തള്ളി സീതാറാം യെച്ചൂരിക്ക് പരസ്യമായി വിജയാശംസകള്‍ നേര്‍ന്ന് സിപിഎം കേന്ദ്ര കമ്മിറ്റി അംഗവും മുതിര്‍ന്ന നേതാവുമായ വി.എസ്. അച്യുതാനന്ദന്‍. തന്റെ വിജയം താങ്കളുടെയും എല്ലാവരുടെയും വിജയമാണെന്ന് യച്ചൂരി മറുപടിയായി വിഎസിനോട് പറഞ്ഞു. നേതാക്കള്‍ താമസിക്കുന്ന ഹോട്ടലിന് പുറത്ത് ഇരുവരും കണ്ടു മുട്ടിയപ്പോഴായിരുന്നു സംഭാഷണം. യെച്ചൂരി ജനറല്‍ സെക്രട്ടറിയാകണമെന്നാണ് ആഗ്രഹമെന്ന് വിഎസ് പറഞ്ഞത് കേന്ദ്ര നേതൃത്വത്തെ ഞെട്ടിച്ചിട്ടുണ്ട്. കൂടുതല്‍ ചെറുപ്പക്കാര്‍ നേതൃനിരയിലേക്ക് വരണമെന്നും വിഎസ് പറഞ്ഞു.
സിപിഎമ്മിന്റെ പുതിയ ജനറല്‍ സെക്രട്ടറി സ്ഥാനത്തേക്ക് സീതാറാം യച്ചൂരിയുടെ പേര് രംഗത്തുണ്ട്. എന്നാല്‍ എസ്.രാമചന്ദ്രന്‍ പിള്ളയുടെ പേരും സജീവമായി പരിഗണിക്കപ്പെടുന്നുണ്ട്. ഇക്കാര്യത്തില്‍ ഇതുവരെ തീരുമാനം ഉണ്ടായിട്ടില്ല. സിപിഎം ജനറല്‍ സെക്രട്ടറി സ്ഥാനത്തിനായി തുറന്ന പോരാണ് നടക്കുന്നത്. പാര്‍ട്ടി സെക്രട്ടറിയെ സംബന്ധിച്ചുള്ള തീരുമാനം നാളെയേ അറിയാനാകൂ. ഇതുമായി ബന്ധപ്പെട്ടുള്ള അനൗപചാരിക ചര്‍ച്ചകള്‍ക്ക് ഇന്നലെ തന്നെ പ്രകാശ് കരാട്ട് തുടക്കമിട്ടിരുന്നു.
ത്രിപുര മുഖ്യമന്ത്രി മണിക് സര്‍ക്കാരുമായും ബംഗാള്‍ മുന്‍മുഖ്യമന്ത്രി ബുദ്ധദേവ് ഭട്ടാചാര്യയുമായും പ്രകാശ് കരാട്ട് ബന്ധപ്പെട്ടു ചര്‍ച്ച നടത്തി. ഇവര്‍ യെച്ചൂരിയുടെ പേര് പറഞ്ഞതായാണ് സൂചന. തീരുമാനം സുഗമമായിരിക്കുമെന്നു നേതൃത്വം പറയുമ്പോഴും സീതാറാം യച്ചൂരിയുടെയും എസ്. രാമചന്ദ്രന്‍ പിള്ളയുടെയും പേരുകള്‍ പരിഗണിക്കപ്പെടുന്നുവെന്നതു വ്യക്തം.
തങ്ങള്‍ മല്‍സരത്തിലാണെന്നതു യച്ചൂരിയും എസ്. രാമചന്ദ്രന്‍പിള്ളയും നിഷേധിക്കുന്നുമില്ല. പാര്‍ട്ടി തലപ്പത്തേക്കു തുറന്ന പോര് ഇതാദ്യമാണ്. പൊതുധാരണയോടെ പുതിയ ജനറല്‍ സെക്രട്ടറിയെ നിശ്ചയിക്കുകയെന്ന പതിവാണു ഇപ്പോള്‍ തെറ്റുന്നത്. കേരളത്തില്‍ നിന്നുള്ള അംഗങ്ങള്‍ കൂടുതലും എസ്ആര്‍പിയെ അനുകൂലിക്കുന്നവരാണ്. ഇത്തരം രണ്ടഭിപ്രായം നിലനില്‍ക്കുമ്പോഴാണ് വിഎസ് യച്ചൂരിക്ക് പരസ്യ പിന്തുണ അറിയിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha