ജനപ്രതിനിധികളുള്‍പ്പെട്ട കേസുകള്‍ കേസുകള്‍ വേഗത്തില്‍ തീര്‍പ്പാക്കുന്നതിന് കര്‍മ പദ്ധതിയുണ്ടാക്കാന്‍ സുപ്രീം കോടതി, ഹൈക്കോടതി ചീഫ് ജസ്റ്റിസുമാര്‍ക്ക് നിര്‍ദേശം നല്‍കി. കേരളത്തില്‍ ഇത്തരത്തില്‍ 333 കേസുകളുള്ളതില്‍ 310 എണ്ണത്തില്‍ സിറ്റിങ് എംഎല്‍എമാരോ എംപിമാരോ പ്രതിപ്പട്ടികയിലുണ്ട്.

്‌രാഷ്ട്രീയത്തിന്റെ ക്രിമിനല്‍വല്‍ക്കരണം വര്‍ധിക്കുന്നത് തടയണം. ഫലപ്രദമായ പ്രോസിക്യൂഷന്‍ നടപടികളെ സ്വാധീനിക്കാനോ തടയാനോ ജനപ്രതിനിധികള്‍ അധികാരം ഉപയോഗിക്കുന്നു. വോട്ടര്‍മാര്‍ ജനപ്രതിനിധികളില്‍ വിശ്വാസമര്‍പ്പിക്കുന്നു. അപ്പോള്‍, തിരഞ്ഞെടുക്കപ്പെടുന്നവരുടെ പൂര്‍വകാലം വോട്ടര്‍മാര്‍ അറിയേണ്ടതുണ്ട്. ജനാധിപത്യപരമായ തിരഞ്ഞെടുപ്പിലൂടെ ലഭിക്കുന്ന പദവിയുടെ സംശുദ്ധി ഉറപ്പാക്കണം എന്നിങ്ങനെയുള്ള കാരണങ്ങളാണ്, ഇത്തരം കേസുകള്‍ വേഗത്തില്‍ തീര്‍പ്പാക്കേണ്ടതിന്റെ ആവശ്യകതയ്ക്ക് ജസ്റ്റിസ് എന്‍.വി.രമണ അധ്യക്ഷനായ ബെഞ്ച് ചൂണ്ടിക്കാട്ടിയത്.

അഭിഭാഷകന്‍ അശ്വനി കുമാര്‍ ഉപാധ്യായയുടെ ഹര്‍ജിയിലാണ് നടപടി. കേസ് 2 ആഴ്ചയ്ക്കു ശേഷം വീണ്ടും പരിഗണിക്കും.

ജനപ്രതിനിധികളുള്‍പ്പെട്ട കേസുകളുടെ വിചാരണയ്ക്ക് പ്രത്യേക കോടതികള്‍ സ്ഥാപിക്കുക, കേസുകളുടെ പുരോഗതി നിരീക്ഷിക്കാന്‍ ഹൈക്കോടതി ചീഫ് ജസ്റ്റിസുള്‍പ്പെട്ട പ്രത്യേക ബെഞ്ച് രൂപീകരിക്കുക തുടങ്ങിയവ ഉള്‍പ്പെടുന്ന കര്‍മ പദ്ധതി ഒരാഴ്ചയ്ക്കകം നല്‍കാനാണ് നിര്‍ദേശം.

രാജ്യത്ത് വിവിധ കോടതികളിലായി ജനപ്രതിനിധികളോ ജനപ്രതിനിധികളായിരുന്നവരോ പ്രതികളായി നിലവില്‍ 4,442 കേസുകളുണ്ടെന്ന് അമിക്കസ് ക്യൂറി വിജയ് ഹന്‍സാരിയ കോടതിക്കു നല്‍കിയ റിപ്പോര്‍ട്ടില്‍ വ്യക്തമാക്കി. ഇതില്‍ 2,556ല്‍ സിറ്റിങ് എംഎല്‍എയോ എംപിയോ പ്രതിയാണ്.

കേരളത്തിലെ കേസുകളുടെ പട്ടികയില്‍, വധശിക്ഷയോ ജീവപര്യന്തം തടവോ ലഭിക്കാവുന്ന കുറ്റങ്ങളുള്ള 2 എണ്ണമുണ്ട്. ഇവയുടെ വിചാരണ ഹൈക്കോടതി സ്റ്റേ ചെയ്തിരിക്കുകയാണ്. യുപിയിലാണ് ഏറ്റവും കൂടുതല്‍ കേസുള്ളത് 1217. ഇതില്‍ 446ല്‍ സിറ്റിങ് എംഎല്‍എയോ എംപിയോ പ്രതിയാണ്.