പ്രധാനമന്ത്രി നരേന്ദ്ര മോദി സന്ദര്‍ശനം നടത്തിയ ദന്തേവാഡിക്ക് അരികില്‍ നിന്ന് ഇരുനൂറോളം ഗ്രാമീണരെ തട്ടിക്കൊണ്ടു പോയ മാവോയിസ്റ്റുകള്‍ അവരില്‍ ഒരാളെ വധിച്ചു. മറ്റുള്ളവരെ വിട്ടയച്ചു. അതിനിടെ, മാവോയിസ്റ്റുകളുടെ കലാപത്തിന് ഭാവിയില്ലെന്ന് ജനങ്ങളെ അഭിസംബോധന ചെയ്യവെ പ്രധാനമന്ത്രി പറഞ്ഞു. ഇതിനിടെയാണ് തട്ടിക്കൊണ്ടുപോയവരില്‍ ഒരാളെ മാവോയിസ്റ്റുകള്‍ വധിച്ചത്.
ഛത്തീസ്ഗഡിലെ നക്‌സല്‍ ശക്തികേന്ദ്രമായ ദന്തേവാഡ മേഖലയില്‍ വെള്ളിയാഴ്ച അര്‍ധരാത്രിയാണ് ഇരുനൂറോളംപേരെ മാവോയിസ്റ്റുകള്‍ തട്ടിക്കൊണ്ടുപോയത്. ഇവരില്‍ ഒരാളായ ഗ്രാമമുഖ്യന്റെ സഹോദരനെയാണ് കൊലപ്പെടുത്തിയത്.
സംസ്ഥാന സര്‍ക്കാര്‍ മാവോയിസ്റ്റുകളുമായി ഒത്തുതീര്‍പ്പുചര്‍ച്ച നടത്തുന്നതിനിടെ ശനിയാഴ്ച രാത്രിയോടെയാണ് മറ്റുള്ളവരെ വിട്ടയച്ചത്. മോദിയുടെ പൊതുസമ്മേളനവേദിക്ക് 60 കിലോമീറ്റര്‍ അകലെയാണ് സംഭവം. സ്ഥലത്തെ ഒരു പാലത്തിന്റെ നിര്‍മ്മാണത്തില്‍ അതൃപ്തിയുണ്ടായിരുന്ന മാവോയിസ്റ്റുകള്‍ നിര്‍മ്മാണവുമായി സഹകരിച്ചിരുന്ന ഗ്രാമീണരെ ബന്ദികളാക്കുകയായിരുന്നു.
പതിനായിരക്കണക്കിന് കേന്ദ്ര സേനാംഗങ്ങളെ വിന്യസിച്ച മേഖലയില്‍ മാവോയിസ്റ്റുകള്‍ നടത്തിയ നീക്കം സുരക്ഷാസേനയെ ഞെട്ടിച്ചു. മോദിയുടെ സന്ദര്‍ശനത്തെ എതിര്‍ത്ത് ബസ്തര്‍ മേഖലയില്‍ മാവോയിസ്റ്റുകള്‍ ബന്ദാചരിച്ചു. വെള്ളിയാഴ്ച അര്‍ധരാത്രിയോടെയാണ് സുഖ്മ ജില്ലയിലെ മരേന്‍ഗ ഗ്രാമം നൂറോളം മാവോയിസ്റ്റുകള്‍ വളഞ്ഞത്. സ്ത്രീകളും കുട്ടികളുമടക്കം നാനൂറോളം പേരെ തട്ടിക്കൊണ്ടുപോയെന്നായിരുന്നു ആദ്യ റിപ്പോര്‍ട്ട്. ആദ്യം സംഭവം നിഷേധിച്ച മുഖ്യമന്ത്രി രമണ്‍സിങ് 200 ഗ്രാമീണരെ തട്ടിക്കൊണ്ടുപോയെന്ന് പിന്നീട് സമ്മതിച്ചു.
സുഖ്മയിലെ ചിന്ദ്ഗാഡ് ബ്ലോക്കിലെ ഉള്‍വനത്തിലേക്കാണ് ഇവരെ കൊണ്ടുപോയതെന്ന് കരുതുന്നു. നദിക്ക് കുറുകെ വനമേഖലയിലേക്ക് പാലം പണിയുന്നതിന് മാവോയിസ്റ്റുകള്‍ എതിരാണ്. നിര്‍മ്മാണം നിര്‍ത്തണമെന്നാണ് മാവോയിസ്റ്റുകളുടെ ആവശ്യം. ദന്തേവാഡയില്‍ സ്വകാര്യകമ്പനികളുടെ സാഹയത്തോടെ 24,000 കോടിയുടെ വികസനമെത്തിക്കുമെന്ന് മോദി പ്രഖ്യാപിക്കുന്നതിന് തലേന്നാണ് തട്ടിക്കൊണ്ടുപോകല്‍. ദന്തേവാഡയിലെ ദിമിലി ഗ്രാമത്തില്‍ ഉരുക്ക് നിര്‍മ്മാണശാല, റെയില്‍വേപ്പാത നിര്‍മ്മാണം എന്നിവയുടെ ധാരണാപത്രം ഒപ്പുവയ്ക്കാനാണ് മോദി എത്തിയത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha