പ്രകാശ് കരാട്ടിനെ വിമര്ശിച്ച് സീതാറാം യെച്ചൂരി, ആണവക്കരാറിന്റെ പേരില് യു.പി.എ. സര്ക്കാരിനുള്ള പിന്തുണ പിന്വലിച്ചതു തെറ്റായ തീരുമാനമെന്ന് സിപിഎം ജനറല് സെക്രട്ടറി
പ്രകാശ് കരാട്ടിനെ പരോക്ഷമായി വിമര്ശിച്ച് സിപിഎം ജനറല് സെക്രട്ടറി സീതാറാം യെച്ചൂരി. ആണവക്കരാറിന്റെ പേരില് ഒന്നാം യു.പി.എ. സര്ക്കാരിനുള്ള പിന്തുണ പിന്വലിച്ചതു തെറ്റായ തീരുമാനമെന്നാണ് യെച്ചൂരി പറഞ്ഞത്. പി.ടി.ഐക്ക് നല്കിയ അഭിമുഖത്തിലാണ് യെച്ചൂരി ഇക്കാര്യം പറഞ്ഞത്. വിലക്കയറ്റം പോലെയുള്ള മറ്റെന്തെങ്കിലും ജനകീയ പ്രശ്നം ഉന്നയിച്ചു വേണമായിരുന്നു പിന്തുണ പിന്വലിക്കേണ്ടിയിരുന്നതെന്ന് അദ്ദേഹം അഭിമുഖത്തില് പറഞ്ഞു. ആണവകരാറിന്റെ പേരില് പിന്തുണ പിന്വലിക്കാന് പാടില്ലായിരുന്നെന്ന് അടുത്തിടെ പറഞ്ഞത് യെച്ചൂരി തിരുത്തി. അതല്ലാതെ മാര്ഗമുണ്ടായിരുന്നില്ലെന്നാണ് അദ്ദേഹം ഇന്നലെ അഭിപ്രായപ്പെട്ടത്.
പിന്തുണ പിന്വലിച്ചശേഷം 2009ലെ ലോക്സഭാ തെരഞ്ഞെടുപ്പില് ആണവകരാറിനെ ജനകീയ പ്രശ്നമാക്കി അവതരിപ്പിച്ചു വോട്ടാക്കി മാറ്റാന് ഇടതു പാര്ട്ടികള്ക്കു കഴിഞ്ഞില്ലെന്നും യെച്ചൂരി ചൂണ്ടിക്കാട്ടി. എന്നാല്, ആണവകരാറിനെ എതിര്ത്ത പാര്ട്ടി നിലപാടില് പശ്ചാത്താപമില്ല. യു.പി.എയുടെ പൊതു മിനിമം പരിപാടിയുടെ ഭാഗമായിരുന്നില്ല ഇന്തോയു.എസ്. ആണവകരാര്. അമേരിക്കയുടെ താല്പര്യത്തിന് ഒപ്പം നില്ക്കാന് ഇന്ത്യക്കുമേല് വന് സമ്മര്ദമുണ്ടായിരുന്നു. അതിനെ അനുകൂലിക്കാന് ഇടതു പാര്ട്ടികള്ക്കു കഴിയില്ലായിരുന്നു.
സി.പി.എം. ഇതുവരെ സ്വീകരിച്ച നിലപാട് തിരുത്തുന്നതാണു യെച്ചൂരിയുടെ വാക്കുകള്. യു.പി.എ. സര്ക്കാരിനുള്ള പിന്തുണ പിന്വലിക്കാനുള്ള തീരുമാനം നൂറു ശതമാനം ശരിയാണെന്നായിരുന്നു 2009ല് ചേര്ന്ന സി.പി.എം. കേന്ദ്രകമ്മിറ്റി നിലപാട്. അമേരിക്കയുമായി തന്ത്രപ്രധാന സഹകരണമുള്ള സര്ക്കാരിനെ പിന്തുണയ്ക്കാന് കഴിയില്ലെന്നും അന്നത്തെ കേന്ദ്രകമ്മിറ്റി നിലപാട് എടുത്തിരുന്നു. പാര്ട്ടിയില്നിന്നുള്ള കൊഴിഞ്ഞുപോക്ക് അവസാനിപ്പിക്കുയാണു ജനറല് സെക്രട്ടറിയെന്ന നിലയില് പ്രഥമ ലക്ഷ്യമെന്ന് യെച്ചൂരി പറഞ്ഞു. ജനവിശ്വാസം മടക്കിക്കൊണ്ടുവരാനുള്ള നടപടി ഉണ്ടാകും. സംഘടനാശക്തി കൂട്ടുന്നതു ചര്ച്ച ചെയ്യാന് ഈ വര്ഷം പ്ലീനം വിളിച്ചുകൂട്ടും.
പൊതു അജന്ഡയുടെ അടിസ്ഥാനത്തില് ഇടതുപാര്ട്ടികളെ ഒരുമിച്ചുകൊണ്ടുവരാനുള്ള ശ്രമം നടത്തും. സാമ്പത്തിക നയങ്ങളുടെ പേരിലാണു കോണ്ഗ്രസുമായുള്ള പ്രധാന വിയോജിപ്പ്. കോണ്ഗ്രസിനുള്ള ബദല് ഇതുവരെ ഉരുത്തിരിഞ്ഞു വന്നിട്ടില്ല. ഇതിനായുള്ള കാത്തിരിപ്പിലാണ്. പാര്ലമെന്റില് മതേതര പാര്ട്ടികളുമായി സഹകരിക്കും. പാര്ലമെന്റിനു പുറത്ത് പാര്ട്ടിയെ ശക്തിപ്പെടുത്തുകയാണു ലക്ഷ്യമെന്ന് അദ്ദേഹം പറഞ്ഞു.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
