കര്ഷക സംഘടനകള്ക്കുള്ളിലെ അഭിപ്രായഭിന്നത മുതലെടുക്കാനൊരുങ്ങി സര്ക്കാര്; കേന്ദ്ര സര്ക്കാരും കര്ഷകരുമായുള്ള പതിനൊന്നാംവട്ട ചര്ച്ചയും പരാജയം; കൂടുതല് വിട്ടുവീഴ്ചയ്ക്കു തയാറല്ലെന്ന് നരേന്ദ്ര സിംഗ് തോമര്; ചര്ച്ചയ്ക്കെത്തിയ തങ്ങളെ മന്ത്രി അപമാനിച്ചെന്ന് കര്ഷകര്
കേന്ദ്ര സര്ക്കാരും കര്ഷകരുമായുള്ള പതിനൊന്നാംവട്ട ചര്ച്ചയും പരാജയം. കര്ഷകരും സര്ക്കാരും തങ്ങളുടെ മുന് നിലപാടില് ഉറച്ചുനിന്നതോടെയാണ് ചര്ച്ച പരാജയപ്പെട്ടത്. കൂടുതല് വിട്ടുവീഴ്ചയ്ക്കു തയാറല്ലെന്ന് ചര്ച്ചയില് സര്ക്കാര് അറിയിച്ചു.
ചര്ച്ച തുടരണമെങ്കില് സംഘടനകള്ക്ക് തീയതി അറിയിക്കാമെന്നും സര്ക്കാര് നിലപാട് എടുത്തു. സംഘടനകള് ആലോചിച്ച് ശനിയാഴ്ച 12 ന് മുന്പ് ചര്ച്ചയ്ക്കുള്ള പുതിയ തീയതി അറിയിക്കണമെന്നാണ് സര്ക്കാര് അറിയിച്ചിരിക്കുന്നത്. 18 മാസം നിയമങ്ങള് മരവിപ്പിക്കാമെന്ന നിര്ദേശം മികച്ചതാണെന്നും അത് പരിഗണിച്ചില്ലെങ്കില് കൂടുതല് ചര്ച്ചയ്ക്കില്ലെന്നുമാണ് സര്ക്കാര് നിലപാട്. സര്ക്കാര് നിര്ദേശം പരിഗണിക്കാന് ആവശ്യപ്പെട്ട മന്ത്രിമാര് കാര്ഷിക നിയമങ്ങളില് അപകാതയില്ലെന്ന് ആവര്ത്തിച്ചു. സര്ക്കാര് നിര്ദേശം കര്ഷകര് പരിഗണിക്കാന് തയാറായാല് മാത്രമേ അടുത്ത ഘട്ട ചര്ച്ചകള് നടക്കുകയുള്ളൂവെന്ന് കൃഷിമന്ത്രി നരേന്ദ്ര സിംഗ് തോമര് അറിയിച്ചു.
നിങ്ങളുടെ ആശങ്കകള് പരിഹരിക്കാന് ഞങ്ങള് ആലോചിച്ചു. സര്ക്കാര് മുന്നോട്ടുവച്ച നിര്ദേശത്തില് കുഴപ്പമുണ്ടായതിനാലല്ല ഇത്. മികച്ചൊരു നിര്ദേശമാണ് സര്ക്കാര് നല്കിയത്. നിര്ഭാഗ്യവശാല് നിങ്ങള് അത് നിരസിച്ചു- മന്ത്രി യോഗത്തില് പറഞ്ഞു.
കേന്ദ്രം മുന്നോട്ടുവച്ച ഉപാധികള് സംബന്ധിച്ച് കര്ഷക സംഘടനകള്ക്കുള്ളിലെ അഭിപ്രായഭിന്നത മുതലെടുക്കാനാണ് സര്ക്കാര് തയാറെടുക്കുന്നത്. ഏതാനും സംഘടനകള് സര്ക്കാര് നിര്ദേശം അംഗീകരിക്കാമെന്ന നിലപാടിലാണ്. കര്ഷക നേതാക്കളും അഭിപ്രായഭിന്നത ഉണ്ടെന്ന വസ്തുത മറച്ചുവച്ചില്ല.
എന്നാല് 96 ശതമാനം സംഘനകള്ക്കും ഒരേ നിലപാടാണെന്നാണ് നേതാക്കള് പറയുന്നത്. ചില സംഘടനകള്ക്ക് സര്ക്കാര് മുന്നോട്ടുവച്ച ഫോര്മുല അംഗീകരിക്കണമെന്നുണ്ട്. ഇത് ചര്ച്ച ചെയ്യും ഇവര് പറയുന്നു.
എന്നാല് ചര്ച്ചയ്ക്കെത്തിയ തങ്ങളെ മന്ത്രി അപമാനിച്ചെന്ന് കര്ഷകര് ആരോപിച്ചു. മൂന്നരമണിക്കൂറോളം മന്ത്രി തങ്ങളെ കാത്തിരുത്തിയെന്ന് കിസാന് മസ്ദൂര് സംഘര്ഷം കമ്മിറ്റി നേതാവ് എസ്എസ് പാന്ഥര് പറഞ്ഞു.
മന്ത്രി ചര്ച്ചയ്ക്കെത്തിയ ഉടന് സര്ക്കാര് നിര്ദേശം പരിഗണിക്കാന് അദ്ദേഹം ആവശ്യപ്പെട്ടു. യോഗം അവസാനിപ്പിക്കുകയാണെന്നും അറിയിച്ചു. സമരം സമാധാനപരമായി തുടരുമെന്നും പാന്ഥര് കൂട്ടിച്ചേര്ത്തു.
https://www.facebook.com/Malayalivartha