ശബരിമല സ്വർണകൊള്ള കേസിൽ പ്രതിയായ മുൻ തിരുവിതാംകൂർ ദേവസ്വം പ്രസിഡൻറ് എ പത്മകുമാറിന് സിപിഎം നോട്ടീസ് നൽകി. പാർട്ടിക്ക് അവമതിപ്പുണ്ടാക്കിയതിൽ വിശദീകരണം നൽകണമെന്നാണ് നോട്ടീസിന്റെ ഉള്ളടക്കം. തപാലിലാണ് പത്തനംതിട്ട ജില്ലാ നേതൃത്വം നോട്ടീസ് നൽകിയിരിക്കുന്നത്. വിശദീകരണം തേടിയ ശേഷം പാർട്ടി നടപടി സ്വീകരിച്ചേക്കുമെന്നാണ് സൂചനകളുള്ളത്.

സിപിഎം സംസ്ഥാന നേതൃത്വത്തിന്റെ അറിവോടെയാണ് പത്തനംതിട്ട ജില്ലാ നേതൃത്വം പത്മകുമാറിന് നോട്ടീസ് നൽകിയതെന്നാണ് റിപ്പോർട്ടുകളുള്ളത്. കഴിഞ്ഞദിവസം പത്തനംതിട്ട ജില്ലാ കമ്മിറ്റിയുടെ വാട്സ്ആപ്പ് ഗ്രൂപ്പിൽ നിന്ന് പത്മകുമാറിനെ പുറത്താക്കിയിട്ടുണ്ടായിരുന്നു.

അതേസമയം തിരുവിതാംകൂര്‍ ദേവസ്വം ബോര്‍ഡ് മുന്‍ പ്രസിഡന്റായ എ പത്മകുമാര്‍ നിലവില്‍ സിപിഎം പത്തനംതിട്ട ജില്ലാ കമ്മിറ്റി അംഗമാണ്. ശബരിമല സ്വര്‍ണക്കൊള്ള കേസില്‍ അറസ്റ്റിലായി മൂന്നര മാസത്തോളം ജയിലില്‍ കിടന്ന പത്മകുമാര്‍ ഈയടുത്തിടെയാണ് ജാമ്യം നേടി പുറത്തിറങ്ങിയത്.