കഴിഞ്ഞ രണ്ടു ദിവസങ്ങളിലായി രാജ്യത്ത് മിന്നലേറ്റ് മരിച്ചത് 68 പേർ ഇതിൽ ഏഴ് കുട്ടികളും... ഞായര്‍, തിങ്കള്‍ ദിവസങ്ങളിലായി ഉത്തര്‍പ്രദേശ്, മധ്യപ്രദേശ്, രാജസ്ഥാന്‍ എന്നീ സംസ്​ഥാനങ്ങളിലാണ് മിന്നലേറ്റ്​ 68 പേര്‍ മരിച്ചത്. ഉത്തര്‍പ്രദേശില്‍ 41 പേരും രാജസ്ഥാനില്‍ 20 പേരും മധ്യപ്രദേശില്‍ ഏഴ് പേരുമാണ്​ മരണപ്പെട്ടത്​.

യു.പിയിലെ പ്രയാഗ്​രാജില്‍ മാത്രം 14 പേര്‍ മരിച്ചു. കാണ്‍പൂര്‍ ദേഹത്ത്, ഫത്തേപൂര്‍ എന്നിവിടങ്ങളില്‍ അഞ്ച് പേര്‍ വീതം മരണപ്പെട്ടു. കൗശമ്ബിയില്‍ നാല് പേര്‍, ഫിറോസാബാദില്‍ മൂന്നുപേര്‍, കാണ്‍പൂര്‍ നഗറില്‍ രണ്ട് പേര്‍, ഉന്നാവ്​, ഹാമിര്‍പൂര്‍, സോണ്‍ഭദ്ര, പ്രതാപ്ഗഡ് ഹാര്‍ദോയി, മിര്‍സാപൂര്‍ എന്നിവിടങ്ങളില്‍ ഓരോരുത്തര്‍ക്കും ജീവന്‍ നഷ്ടമായി.

20 മരണം റിപ്പോര്‍ട്ട്​ ചെയ്​ത രാജസ്​ഥാനില്‍, രണ്ടു ജില്ലകളിലായി ഏഴുകുട്ടികളും മരണപ്പെട്ടു​​. മരിച്ചവരുടെ കുടുംബാംഗങ്ങള്‍ക്ക് രാജസ്ഥാന്‍ മുഖ്യമന്ത്രി അശോക് ഗെഹ്​ലോട്ട് അഞ്ചുലക്ഷം രൂപ വീതം നഷ്ടപരിഹാരം പ്രഖ്യാപിച്ചു. ഇതില്‍ 4 ലക്ഷം രൂപ അടിയന്തര ദുരിതാശ്വാസ നിധിയില്‍ നിന്നും ഒരു ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയില്‍ നിന്നും നല്‍കും.

മൂന്നുസംസ്​ഥാനങ്ങഴിലും മരിച്ചവരുടെ കുടുംബങ്ങള്‍ക്ക്​ പ്രധാനമന്ത്രിയുടെ ദേശീയ ദുരിതാശ്വാസ നിധിയില്‍ നിന്ന് (പി‌എം‌എന്‍‌ആര്‍‌എഫ്) രണ്ട് ലക്ഷം രൂപ വീതം സഹായധനം നല്‍കുമെന്ന്​ നരേന്ദ്രമോദി പ്രഖ്യാപിച്ചു. പരിക്കേറ്റവര്‍ക്ക് 50,000 രൂപ വീതവും ധനസഹായം നല്‍കും.