ഒടുവില്‍ പ്രാര്‍ത്ഥനകള്‍ക്ക് അവസാനമായി. ഇന്ത്യന്‍ മഹാസമുദ്രത്തില്‍നിന്നും കണ്ടെത്തിയ യാത്രവിമാനത്തിന്റെ അവശിഷ്ടങ്ങള്‍ ഒരു വര്‍ഷം മുമ്പ് കാണാതായ മലേഷ്യന്‍ വിമാനത്തിന്റേതാണെന്ന് സ്ഥിരീകരിച്ചു. ജീവനക്കാരുള്‍പ്പെടെ 239 പേരുമായി കാണാതായ മലേഷ്യന്‍ എയര്‍ലൈന്‍സിന്റെ ബോയിങ് 777 എന്ന വിമാനത്തിന്റെ ഭാഗങ്ങളാണ് കണ്ടെത്തിയത്. മലേഷ്യന്‍ ഗതാഗതമന്ത്രി അബ്ദുള്‍ അസീസ് കപ്രാവിയാണ് ഇക്കാര്യം സ്ഥിരീകരിച്ചതായ വാര്‍ത്ത പുറത്തുവിട്ടത്.
ബുധനാഴ്ച ഇന്ത്യന്‍ മഹാസമുദ്രത്തില്‍ ആഫ്രിക്കയുടെ കിഴക്കന്‍ തീരത്ത് സ്ഥിതിചെയ്യുന്ന ഫ്രഞ്ച് അധീനതയിലുള്ള റീയൂണിയന്‍ ദ്വീപില്‍ വിമാനത്തിന്റെ ചിറകിന്റെ ഭാഗം കണ്ടെത്തുകയായിരുന്നു. കണ്ടെത്തിയ ഭാഗത്തിന് രണ്ടു മീറ്റര്‍ നീളം വരുമെന്നാണ് റിപ്പോര്‍ട്ട്. ചൈനീസ് നിര്‍മിത വെള്ളക്കുപ്പി ഉള്‍പ്പടെ യാത്രക്കാര്‍ ഉപയോഗിച്ചത് എന്നു കരുതുന്ന ചില വസ്തുക്കളും ദ്വീപില്‍നിന്നും കണ്ടെത്തിയതായ റിപ്പോര്‍ട്ടുകളുമുണ്ട്.
2014 മാര്‍ച്ച് എട്ടിന് ക്വലാലംപൂരില്‍നിന്നും ബെയ്ജിങ്ങിലേക്ക് പുറപ്പെട്ട മലേഷ്യന്‍ വിമാനമാണ് കാണാതായത്. പറന്നുയര്‍ന്ന് ഒരുമണിക്കൂറിനുള്ളില്‍ വിമാനവുമായുള്ള ബന്ധം നഷ്ടപ്പെട്ടിരുന്നു. കാണാതാകുമ്പോള്‍ അഞ്ചു ഇന്ത്യന്‍ വംശജരും വിമാനത്തിലുണ്ടായിരുന്നു. തെക്കേ ഇന്ത്യന്‍ മഹാസമുദ്രത്തിന് കുറുകെ സഞ്ചരിക്കുമ്പോള്‍ പ്രതികൂല കാലാവസ്ഥയാകാം അപകട കാരണമെന്നാണ് വിലയിരുത്തല്‍. ഒരുവര്‍ഷത്തോളം വിമാനത്തിനായി തെരച്ചില്‍ നടത്തിയെങ്കിലും യാതൊരു സൂചനകളും കണ്ടെത്താന്‍ കഴിഞ്ഞിരുന്നില്ല. ഇതോടെ വിമാനത്തിനൊപ്പം കാണാതായവര്‍ മരിച്ചതായി മലേഷ്യന്‍ അധികൃതര്‍ പ്രഖ്യാപിച്ചിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha