ചില ദേശീയ ചാനലുകള്‍, യാക്കൂബ് മേമന്റെ വധശിക്ഷ നടപ്പാക്കിയത് സംബന്ധിച്ച് നടത്തിയ ചര്‍ച്ചകള്‍ അതിരുകള്‍ ലംഘിച്ചുവെന്ന് കേന്ദ്രസര്‍ക്കാര്‍. വധശിക്ഷയുടെ അടിസ്ഥാനത്തില്‍ സര്‍ക്കാര്‍ ന്യൂനപക്ഷ സമുദായത്തെ വേട്ടയാടുന്നു എന്നമട്ടിലുളള പ്രചാരണമാണ് ചാനലുകള്‍ നടത്തിയതെന്ന് സര്‍ക്കാരിന്റെ ഒരു ആഭ്യന്തര റിപ്പോര്‍ട്ടില്‍ പറയുന്നതായി സര്‍ക്കാര്‍ വൃത്തങ്ങള്‍. എന്നാല്‍, 1991 മുതല്‍ വധശിക്ഷയ്ക്ക് വിധേയരാക്കിയ 26 പേരില്‍ നാല് പേര്‍ മാത്രമാണ് മുസ്ലീം സമുദായത്തില്‍ നിന്നുളളവരെന്നും റിപ്പോര്‍ട്ടില്‍ ചൂണ്ടിക്കാണിക്കുന്നു.

ദേശസുരക്ഷക്ക് ഭീഷണിയുയര്‍ത്തുന്ന തരത്തിലുള്ള ചര്‍ച്ചകളായിരുന്നു നാല് ചാനലുകളില്‍ നടന്നതെന്നും അത് മതവിഭാഗങ്ങള്‍ക്കിടയില്‍ അവിശ്വാസത്തിന്റെ വിത്തുകള്‍ വിതച്ചുവെന്നും കേന്ദ്ര വാര്‍ത്താവിതരണ മന്ത്രാലയത്തിന്റെ ആഭ്യന്തര റിപ്പോര്‍ട്ടില്‍ പറയുന്നതായാണ് റിപ്പോര്‍ട്ട്. ആജ്തക്ക്, എബിപി ന്യൂസ്, എന്‍ഡിടിവി, എന്‍ഡിടിവി 24/ 7 എന്നീ ചാനലുകള്‍ക്കെതിരെയാണ് വിമര്‍ശനം ഉയര്‍ന്നിരിക്കുന്നത്. ചാനലുകളില്‍ നിന്ന് സര്‍ക്കാര്‍ വിശദീകരണം തേടുമെന്നാണ് സൂചന.

രാഷ്ട്രപതിയുടെയും നീതിന്യായവ്യവസ്ഥയുടെയും അന്തസ്സിനെ ചോദ്യം ചെയ്യുന്ന തരത്തിലുള്ള ഉളളടക്കം സംപ്രേക്ഷണം ചെയ്തതും ദേശ സുരക്ഷയ്ക്ക് ഭീഷണിയുയര്‍ത്തും വിധം അക്രമത്തിന് പ്രചോദനം നല്‍കിയതുമാണ് ചാനലുകള്‍ക്കെതിരെയുളള കുറ്റം. രണ്ട് ഹിന്ദി ചാനലുകള്‍ ഛോട്ടാ ഷക്കീലിന്റെ അഭിമുഖം എഡിറ്റ് ചെയ്യാതെ സംപ്രേക്ഷണം ചെയ്തത് മതസ്പര്‍ദ്ധ വളര്‍ത്തുന്നതിനും നീതിന്യായവ്യവസ്ഥയെ വിലകുറച്ചുകാണുന്നതിനുമായിരുന്നുവെന്നും റിപ്പോര്‍ട്ടില്‍ കുറ്റപ്പെടുത്തുന്നുണ്ട്.

യാക്കൂബ് മേമനെ തൂക്കിലേറ്റിയത് ദു:ഖകരമായ സംഗതിയാണെന്നു എന്‍ഡിടിവി അവതാരകര്‍ പറഞ്ഞതും എന്‍ഡിടിവി 24/ 7 ല്‍ അഭിഭാഷകന്‍ മജീദ് മേമന്‍ ഇന്ത്യന്‍ നീതിന്യായവ്യവസ്ഥയെ പരിഹസിക്കുന്ന തരത്തിലുളള അഭിപ്രായപ്രകടനം നടത്തുന്ന അഭിമുഖം സംപ്രേക്ഷണം ചെയ്തതും റിപ്പോര്‍ട്ടില്‍ ചൂണ്ടിക്കാണിക്കുന്നുണ്ടെന്നാണ് വിവരം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha