ബിഹാറില് നിതീഷ് കുമാര് മുഖ്യമന്ത്രിയായി ഇന്ന് അധികാരമേല്ക്കും, സത്യപ്രതിജ്ഞാ ചടങ്ങില് മുഖ്യമന്ത്രി ഉമ്മന് ചാണ്ടിയും പങ്കെടുക്കും
ബിഹാറില് നിതീഷ് കുമാര് മുഖ്യമന്ത്രിയായി വെള്ളിയാഴ്ച അധികാരമേല്ക്കും. ജനതാദള് (യു) നേതാവാണ് ഇദ്ദേഹം. പട്നയിലെ ഗാന്ധി മൈതാനത്ത് ഉച്ചയ്ക്ക് രണ്ടുമണിക്കാണ് സത്യപ്രതിജ്ഞ. നിതീഷിനൊപ്പം 35 മന്ത്രിമാരും ചുമലയേല്ക്കും. മന്ത്രിമാരുടെ പേരുവിവരങ്ങള് പരസ്യമാക്കിയിട്ടില്ലെങ്കിലും അന്തിമ തിരുമാനത്തിലെത്തിയെന്നാണ് സൂചന.
അഞ്ച് എം.എല്.എ. മാര്ക്ക് ഒരു മന്ത്രി എന്ന കണക്കാണ് ഇക്കാര്യത്തില് പരിഗണിക്കുന്നത്. അതനുസരിച്ച് മഹാസഖ്യത്തിന്റെ ഭാഗമായ ആര്.ജെ.ഡി.ക്ക് 16 മന്ത്രിമാരാണ് ഉണ്ടാകുക. തിരഞ്ഞെടുപ്പില് ഏറ്റവും വലിയ ഒറ്റകക്ഷിയായ ആര്.ജെ.ഡി.ക്ക് 80 സീറ്റാണുള്ളത്. 71 സീറ്റുകളുള്ള ജെ.ഡി.യു.വിന് 14ഉം 27 സീറ്റുള്ള കോണ്ഗ്രസ്സിന് അഞ്ചും മന്ത്രിമാരെ ലഭിച്ചേക്കും. ചടങ്ങില് കേന്ദ്രസര്ക്കാറിനെ പ്രതിനിധീകരിച്ച് പാര്ലമെന്ററി കാര്യമന്ത്രി വെങ്കയ്യ നായിഡു, സഹമന്ത്രി രാജീവ് പ്രതാപ് റൂഡി എന്നിവര് പങ്കെടുക്കും. പ്രധാനമന്ത്രി നരേന്ദ്രമോദിയെ നിതീഷ് കുമാര് ക്ഷണിച്ചിരുന്നുവെങ്കിലും കേന്ദ്രസര്ക്കാറിനെ പ്രതിനിധീകരിക്കാനുള്ള ചുമതല ഈ മന്ത്രിമാര്ക്ക് കൈമാറുകയായിരുന്നു.
മോദി ഉയര്ത്തുന്ന രാഷ്ട്രീയത്തിനെതിരെയുള്ള ഒത്തുചേരലാക്കി സത്യപ്രതിജ്ഞാ ചടങ്ങ് മാറ്റാനാണ് മഹാസഖ്യത്തിന്റെ ശ്രമം. കോണ്ഗ്രസ് ഉപാധ്യക്ഷന് രാഹുല്ഗാന്ധി, മുന് പ്രധാനമന്ത്രി ദേവഗൗഡ, എന്.സി.പി. നേതാവ് ശരദ് പവാര്, ലോക്സഭയിലെ കോണ്ഗ്രസ് നേതാവ് മല്ലികാര്ജുന ഖാര്ഗെ, രാജ്യസഭാ പ്രതിപക്ഷ നേതാവ് ഗുലാം നബി ആസാദ് തുടങ്ങിയ ദേശീയ നേതാക്കള് സത്യപ്രതിജ്ഞാ ചടങ്ങിനെത്തും. ബി.ജെ.പി. നേതാക്കളായ എല്.കെ. അദ്വാനി, ശത്രുഘന് സിന്ഹ തുടങ്ങിയവരെ ക്ഷണിച്ചെങ്കിലും പങ്കെടുത്തേക്കില്ല. ബംഗാള് മുഖ്യമന്ത്രി മമതാ ബാനര്ജി, ഡല്ഹി മുഖ്യമന്ത്രി അരവിന്ദ് കെജ്രിവാള്, ഉത്തര്പ്രദേശ് മുഖ്യമന്ത്രി അഖിലേഷ് യാദവ്, ഇടത് നേതാക്കളായ സീതാറാം യെച്ചൂരി, ഡി. രാജ, ഡി.എം.കെ. പ്രതിനിധി എം.കെ. സ്റ്റാലിന് എന്നിവരും ചടങ്ങില് പങ്കെടുക്കും.
സത്യപ്രതിജ്ഞാ ചടങ്ങില് മുഖ്യമന്ത്രി ഉമ്മന് ചാണ്ടിയും പങ്കെടുക്കും. കോണ്ഗ്രസ് ഭരിക്കുന്ന ഏഴ് സംസ്ഥാനങ്ങളിലെ മുഖ്യമന്ത്രിമാരെയും ചടങ്ങിന് ക്ഷണിച്ചിട്ടുണ്ട്. ജെ.ഡി.യുവിനെ പ്രതിനിധീകരിച്ച് കേരളത്തില് നിന്ന് കൃഷിമന്ത്രി കെ.പി. മോഹനന്, യുവജനതാദള് ദേശീയ സെക്രട്ടറി സലിം മടവൂര്, പാര്ലമെന്ററി ബോര്ഡ് ചെയര്മാന് ചാരുപാറ രവി എന്നിവരും സത്യപ്രതിജ്ഞാ ചടങ്ങിനെത്തും.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
