പ്രസിഡന്റിന്റെ വിദ്യാഭ്യാസ അവാര്‍ഡ് നേടിയ ഭിന്നശേഷിയുള്ള യുവാവിനെ വെടിവച്ചു കൊന്നു. ബധിരനും മൂകനുമായ വിനോദ് കുമാറാണ്(31) 300 രൂപയുടെ പേരില്‍ വെടിയേറ്റ് മരിച്ചത്.വടക്ക് കിഴക്കന്‍ ഡല്‍ഹിയിലെ സീമല്‍പൂരില്‍ ചൊവ്വാഴ്ച രാത്രിയാണ് സംഭവം. പ്രദേശത്തെ ചന്തയില്‍ നിന്ന് മടങ്ങിവരവെ വിനോദിനെയും സഹോദരനെയും തടഞ്ഞുനിര്‍ത്തിയ സല്‍മാന്‍(25) എന്നയാള്‍ വെടിവയ്ക്കുകയായിരുന്നെന്നാണ് പൊലീസ് ഭാഷ്യം.

വിനോദിന്റെ മാതാവ് നടത്തുന്ന പലചരക്ക് കടയില്‍ നിന്ന് കടംവാങ്ങിയതുമായി ബന്ധപ്പെട്ടാണ് സല്‍മാന്‍ ഇവരെ തടഞ്ഞത്. പലതവണയായി സല്‍മാന്‍ സാധനം വാങ്ങിയ വകയില്‍ വിനോദിന്റെ മാതാവിന്റെ കടയില്‍ 300 രൂപ തിരികെ കൊടുക്കാനുണ്ടായിരുന്നു. മയക്കുമരുന്നിന് അടിമയായ സല്‍മാന് ഇനി കടം കൊടുക്കേണ്ടെന്ന് വിനോദും സഹോദരനും തീരുമാനിച്ചപ്പോള്‍ ഇവര്‍ക്കെതിരെ വധഭീഷണി മുഴക്കിയതായും പൊലീസ് പറയുന്നു.

തുടര്‍ന്നാണ് കഴിഞ്ഞദിവസം വഴിതടഞ്ഞതെന്ന് വിനോദിന്റെ സഹോദരന്‍ കമാല്‍ പൊലീസിനോട് പറഞ്ഞു. ഇരുവരെയും തടഞ്ഞുനിര്‍ത്തിയശേഷം വിനോദിനെ കടന്നുപിടിയ്ക്കുകയായിരുന്നു. പ്രതിരോധിയ്ക്കാന്‍ ശ്രമിക്കുന്നതിനിടെ കൈയ്യില്‍ കരുതിയ തോക്കെടുത്ത് വെടിവച്ചു. നെറ്റിയില്‍ വെടിയേറ്റ് വീണപ്പോഴേക്ക് സല്‍മാന്‍ ഓടി രക്ഷപ്പെട്ടിരുന്നു. തുടര്‍ന്ന് ആശുപത്രിയിലെത്തിച്ചെങ്കിലും മരിക്കുകയായിരുന്നു.

സല്‍മാന്റെ ഫോണ്‍ നിരീക്ഷണത്തിലാണെന്നും ഉടന്‍ പിടികൂടുമെന്നും പൊലീസ് അറിയിച്ചു. മിണ്ടാനും കേള്‍ക്കാനുമാകാത്ത ഈ പാവത്തിനെ കൊന്നതുകൊണ്ട് എന്താണ് നേട്ടമെന്ന് വിനോദിന്റെ ബന്ധു ചോദിയ്ക്കുന്നു. ഒരു വഴക്കിനും പോവാതെ പഠിത്തത്തില്‍ ശ്രദ്ധിച്ചിരുന്നയാളാണ് വിനോദെന്നും ഇവര്‍ പറയുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha