സുനന്ദ പുഷ്‌കറുടെ മരണവുമായി ബന്ധപ്പട്ട് ഭഭര്‍ത്താവ് ശശി തരൂര്‍ എംപിയെ വീണ്ടും ചോദ്യം ചെയ്യും. ആന്തരികാവയവ പരിശോധനാ ഫലത്തിന്റെ അടിസ്ഥാനത്തിലാണ് ചോദ്യം ചെയ്യുന്നത്. ഈ മാസം അവസാനത്തോടെ ചോദ്യം ചെയ്‌തേക്കും. മരണത്തിന്റെ കാരണം സംബന്ധിച്ച് ഇതുവരെ വ്യക്തതയില്‍ എത്താന്‍ കഴിഞ്ഞിട്ടില്ല.

സുനന്ദയുടെ ശരീരത്തില്‍ അല്‍പ്രാക്‌സ് ഗുളികയുടെ സാന്നിധ്യം കണ്ടെത്തിയിരുന്നു. സുനന്ദയ്ക്ക് ഡോക്ടര്‍ അല്‍പ്രാക്‌സ് ഗുളിക നിര്‍ദ്ദേശിച്ച് നല്‍കിയതാണെന്ന് ശശി തരൂര്‍ മുന്‍പ് പറഞ്ഞിരുന്നു. ഇത് സംബന്ധിച്ച് കൂടുതല്‍ വിവരം പൊലീസ് ശശി തരൂരിനോട് ആരായും. സുനന്ദ പുഷ്‌കറുടെ മരണകാരണം പൊളോണിയമോ മറ്റേതെങ്കിലും റേഡിയോ ആക്ടീവ് പദാര്‍ത്ഥമോ അല്ലെന്നായിരുന്നു പരിശോധനാഫലം. അമേരിക്കയില്‍ നടത്തിയ ആന്തരികാവയവങ്ങളുടെ പരിശോധനാഫലത്തിലാണ് ഇക്കാര്യം തെളിഞ്ഞത്.
ശശി തരൂരും സുനന്ദയുമായി തര്‍ക്കങ്ങള്‍ ഉണ്ടായിരുന്നുവെന്ന് മുന്‍പ് മൊഴിയില്‍ പറഞ്ഞിരുന്നു. ഈ തര്‍ക്കങ്ങളാണോ മരണത്തിന് കാരണമായതെന്നും തരൂരിനോട് ചോദിക്കും. സാമ്പത്തിക കുറ്റകൃത്യങ്ങള്‍ അന്വേഷിക്കുന്ന പൊലീസ് സംഘം ഐപിഎല്‍ ടീമുമായി ബന്ധപ്പെട്ട വിഷയങ്ങളും ചോദിക്കും.
കഴിഞ്ഞ വര്‍ഷം ജനുവരിയിലാണ് ഡല്‍ഹിയിലെ ഹോട്ടലില്‍ സുനന്ദ പുഷ്‌കറിനെ മരിച്ച നിലയില്‍ കണ്ടെത്തിയത്. ആത്മഹത്യയാണെന്നായിരുന്നു ആദ്യം കരുതിയിരുന്നതെങ്കിലും ഈ വര്‍ഷം ആദ്യം സുനന്ദയെ വിഷം നല്‍കി കൊലപ്പെടുത്തുകയായിരുന്നുവെന്ന് ഡല്‍ഹി പൊലീസ് കണ്ടെത്തുകയായിരുന്നു. കൊലപാതകത്തിന് കേസെടുക്കുകയും ചെയ്തു.

ഇതുവരെ ആരെയും പ്രതി ചേര്‍ത്തിട്ടില്ല. ശശി തരൂരിന്റെ വീട്ടുജോലിക്കാരനായ നരേന്‍ സിംഗ് ഉള്‍പ്പെടെ ആറ് പേര്‍ക്ക് പോളിഗ്രാഫ് ടെസ്റ്റ് നടത്തിയിരുന്നു. തരൂരിനെയും പൊലീസ് നിരവധി തവണ ചോദ്യം ചെയ്തിരുന്നു.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha