എം.എല്‍.എമാര്‍ക്ക് 400 ശതമാനം ശമ്പള വര്‍ദ്ധന ശുപാര്‍ശ ചെയ്യുന്ന ബില്ല് ഡല്‍ഹി നിയമസഭ പാസാക്കി. അടിസ്ഥാന ശമ്പളവും മറ്റ് ആനുകൂല്യങ്ങളും പെന്‍ഷനും അടക്കം വര്‍ദ്ധിപ്പിക്കാനാണ് ബില്ല് ശുപാര്‍ശ ചെയ്യുന്നത്. ബില്ല് കേന്ദ്രത്തിന്റെ അനുമതിയ്ക്കായി അയയ്ക്കും. അതേസമയം, ആംആദ്മി സര്‍ക്കാര്‍ പൊതുഖജനാവിലെ പണം ധൂര്‍ത്തടിയ്ക്കുകയാണെന്ന് ആരോപിച്ച് ബില്ലിന്റെ വോട്ടെടുപ്പ് ബി.ജെ.പി എം.എല്‍.എമാര്‍ ബഹിഷ്‌കരിച്ചു.
അടിസ്ഥാന ശമ്പളം പന്ത്രണ്ടായിരം രൂപയില്‍ നിന്ന് അന്‍പതിനായിരം രൂപയാക്കി വര്‍ദ്ധിപ്പിക്കാനാണ് ബില്ലില്‍ ശുപാര്‍ശ. അതോടെ മറ്റ് ആനുകൂല്യങ്ങളും കൂടി ചേര്‍ന്ന് പ്രതിമാസം 210,000 രൂപയോളം എം.എല്‍.എമാര്‍ക്ക് ലഭിക്കും. അടിസ്ഥാന ശമ്പളവും മറ്റ് ആനുകൂല്യങ്ങളും അടക്കം 88,000 രൂപയാണ് എം.എല്‍.എമാര്‍ക്ക് നിലവില്‍ ലഭിച്ചുകൊണ്ടിരിക്കുന്നത്. ഇത് നാലിരട്ടിയായാണ് വര്‍ദ്ധിപ്പിക്കുന്നത്. ബില്ല് കേന്ദ്രം അംഗീകരിച്ചാല്‍ അംഗങ്ങള്‍ ഏറ്റവും അധികം ശമ്പളം പറ്റുന്ന നിയമസഭയാകും ഡല്‍ഹി. പാര്‍ലമെന്റ് അംഗങ്ങള്‍ കൈപ്പറ്റുന്നതിനേക്കാള്‍ വേതനമാകും ഡല്‍ഹി എം.എല്‍.എമാര്‍ക്ക് ലഭിക്കുക.
എം.എല്‍.എമാര്‍ അവരുടെ മേഖലകളില്‍ കാര്യക്ഷമമായി പ്രവര്‍ത്തിക്കുന്നതിനു വേണ്ടിയാണ് ശമ്പളം വര്‍ദ്ധിപ്പിക്കുന്നതെന്ന് ബില്ല് അവതരിപ്പിച്ചുകൊണ്ട് ഉപമുഖ്യമന്ത്രി മനീഷ് സിസോദിയ വ്യക്തമാക്കി. മുന്‍ ലോക്‌സഭാ സെക്രട്ടറി പി.ഡി.റ്റി. ആചാര്യ അദ്ധ്യക്ഷനായ മൂന്നംഗ ബെഞ്ചിന്റെ നിര്‍ദ്ദേശങ്ങളെല്ലാം അംഗീകരിച്ചുകൊണ്ടാണ് ബില്ലിന് രൂപം നല്‍കിയതെന്നും അദ്ദേഹം പറഞ്ഞു.
നിലവിലെ ശമ്പളം ജീവിതച്ചെലവുകള്‍ക്ക് ഒട്ടും തികയുന്നില്ലെന്നും ശമ്പളം പരിഷ്‌കരിക്കണമെന്നും ഒരും സംഘം ഭരണകക്ഷി എം.എല്‍.എമാര്‍ ജൂലായില്‍ ആവശ്യപ്പെട്ടതനുസരിച്ചാണ് സര്‍ക്കാര്‍ കമ്മീഷനെ നിയോഗിച്ചത്. എ.എ.പിയുടെ എം.എല്‍.എമാരില്‍ ഭൂരിപക്ഷവും മറ്റ് ജോലികള്‍ ഉപേക്ഷിച്ച് രാഷ്ട്രീയത്തില്‍ വന്നവരാണ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha